Jobe 13

₁“Emehlo ami akubonile konkhe loku,

netindlebe tami tikuvile takucondza loku.

₂Lenikwatiko nine nami ngiyakwati,

anincono ngalutfo kunami.

₃Kodvwa mine ngifisa kukhuluma kuSomandla,

nekuphikisana naNkulunkulu ngalendzaba yami.

₄Noko, nine ningibhoca ngemanga,

nonkhe nifanana netinyanga, kantsi anikwati kwelapha!

₅Kube mane nonkhe niyabindza,

loko bekungaba kuhlakanipha kini.

₆Ase nilalele naku lengitakukhuluma,

nive kutsi ngitsini ngemlomo wami.

₇Ingabe lobubi nibukhulumela Nkulunkulu yini?

Yona lenkhohliso niyikhuluma egameni lakhe yini?

₈Netama kumvikela yini?

Ningayimelela yini indzaba yaNkulunkulu?

₉Kunganihambela kahle yini nakanganihlolisisa?

Ningamkhohlisa yini njengobe nikhohlisa bantfu?

₁₀Nakanjani Nkulunkulu utanidalula,

nangabe nikhetsana ngasese.

₁₁Inkhatimulo yakhe ingeke yini inesabise?

Lulaka lwakhe lungeke yini lwehlele etikwenu?

₁₂Loku lenikukhulumako kungumbhedvo nje,

netivikelo tenu titivikelo telibumba nje.

₁₃“Ase nibindze, kukhulume mine,

ningiyekele ngehlelwe nome ngayini.

₁₄Ngitifakelani engotini

ngekutsatsa imphilo yami

ngiyiphatse ngesandla?

₁₅Nome angangibulala,

noko ngitakwetsembela kuye.

Nakanjani ngitatikhulumela embikwakhe

ngetindlela tami.

₁₆Ngempela, loko kungahle kunginike

siciniseko semphumelelo yami,

ngobe kute umuntfu longamesabi Nkulunkulu

longahle asondzele kuye.

₁₇Lalelisisani kahle emavi ami;

tindlebe tenu atikutsatse loku lengikushoko.

₁₈Manje njengobe sengiyilungisile indzaba yami,

ngiyati kutsi kute lengikonile.

₁₉Ngubani nje longangibeka licala?

Nakunjalo, ngitawubindza ngife.

₂₀“Awu, Nkulunkulu, ngicela ungiphe

nati tintfo letimbili,

khona-ke ngingeke ngibhace embikwakho:

₂₁Susa sandla sakho kimi,

uyekele kungetfusa ngetesabiso takho.

₂₂Ngibite, mine ngitawube sengiyaphendvula,

nome-ke angikhulume,

wena bese uyaphendvula.

₂₃Tingakhi tiphambuko netono lese ngitentile?

Ngikhombise licala lami nesono sami.

₂₄Ubufihlelani buso bakho,

ungitsatse njengesitsa sakho?

₂₅Ungalivisa yini buhlungu

licembe leliphephukako?

Ungacoshana yini nemakhoba lomile?

₂₆Ungibeka emacala lamatima,

ungetfwese emacala etono lengatenta ngisemusha.

₂₇Tinyawo tami utinkinka ngetinketane,

uticaphele tonkhe tinyatselo tami lengititsatsako,

ngekubeka timphawu entsendzeni yetinyawo tami.

₂₈“Ngako umuntfu uyadleka njengentfo lebolako,

nanjengendvwangu ledliwa ngumvunya.”