Jobe 21

₂“Lalelisisani lamavi ami,

nimane ningidvudvute ngaloko.

₃Ngibeketeleleni nangikhuluma,

ngitsi ngingakhuluma, bese niyachubeka nekuphukuta.

₄“Kusola kwami kucondzene nemuntfu yini?

Kwentiwa yini kutsi ngingakhoni kubeketela?

₅Bukani mine nimangale,

nibambe wangentasi.

₆Nangicabanga ngaloko,

ngifikelwa kwesaba,

kutfutfumela kubambe umtimba wami.

₇Kwentiwa yini kutsi lababi

baphile sikhatsi lesidze,

bakhule baze baguge, baphindze babe nemandla lamakhulu?

₈Babona bantfwababo baphumelela,

babone ngisho nebatukulu babo.

₉Emakhaya abo avikelekile, akanako kwesaba.

Indvuku yaNkulunkulu ayikho etikwabo.

₁₀Tinkhomati tabo atilatelwa,

ngobe tinkunzi tabo tiyatalisa.

₁₁Bakhipha bantfwana babo njengemhlambi.

Bantfwana babo bayajabula bagidze.

₁₂Bahlabelela ngekuhambisana nemafahlawane, nemahabhu,

batijabulise ngekudlala imintjingozi.

₁₃Timphilo tabo baticitsa ngekunaka umcebo,

behlela endzaweni yalabafile ngekuthula.

₁₄Noko bakhuluma kuNkulunkulu, batsi:

‘Ase uyekele tsine!

Site sifiso sekwati tindlela takho.

₁₅Ngubani yena loSomandla kutsi singakhonta yena?

Yini nje lesingayitfola ngekuthandaza kuye?’

₁₆Kodvwa umnotfo wabo awukho etandleni tabo,

ngako ngiyatecwaya teluleko talababi.

₁₇“Kukangakhi nje sibane salababi sicinywa?

Ngukangakhi kona lababi behlelwa sehlakalo?

Nkulunkulu uke abajezise ngentfukutselo yini?

₁₈Kukangakhi bafanana netinhlanga emoyeni,

babe njengemakhoba lapheshulwa sivunguvungu?

₁₉Kutsiwa: ‘Nkulunkulu ujezisa bantfwana

ngenca yetono letentiwa nguyise.’

Cha! Nkulunkulu akajezise toni cobo lwato,

kuze titewukwati kahle.

₂₀Lomubi akatibonele ngemehlo akhe kubhujiswa kwakhe,

atinatsele yena lulaka lwaSomandla.

₂₁Ngobe unandzabani nemndeni lawushiya ngemuva,

nakufika kuphela kwetinsuku tekuphila kwakhe?

₂₂“Ukhona yini umuntfu longafundzisa Nkulunkulu lwati?

Ngobe yena wehlulela

ngisho nalabangetulu kwabo bonkhe.

₂₃Lomunye ufa asacine kahle kakhulu,

aphephe waze watinta ngalokuphelele,

kantsi futsi ukhululekile,

₂₄umtimba wakhe uphatseke kahle,

nematsambo akhe agcwele umnkantja.

₂₅Lomunye ufa anelusizi emphefumulweni,

angazange sekativele nome ngabe yini lemnandzi.

₂₆Bobabili balala kanyekanye elutfulini,

netimphetfu tibahlasela ngalokufananako bobabili.

₂₇“Ngati kahle kutsi nicabangani,

ngisho nemacebo lebeningahle ningone ngawo.

₂₈Nitsi: ‘Iphi-ke manje lendlu yalomuntfu lomkhulu,

aphi emathende lapho lababi bebahlala khona?’

₂₉Nake nababuta yini labatihambi?

Anizange niyinake yini imibiko lababuya nayo,

₃₀yekutsi lomubi uyacolelwa ngelilanga lenhlekelele

nekutsi uyakhululeka ngelilanga lelulaka?

₃₁Ngubani longasola simo sakhe embikwakhe?

Ngubani lomkhokhelako ngaloko lakwentile?

₃₂Uyetfwalwa ayiswe edlizeni,

lithuna lakhe lihlala ligadziwe.

₃₃Lenhlabatsi yesigodzi iyanongotela kuye,

bonkhe bantfu balandzela yena,

sicumbi lesikhulu sihamba embikwakhe.

₃₄“Ngako-ke ningangidvudvuta kanjani

ngalenkhulumo yenu lengumbhedvo?

Kute nakunye kwetimphendvulo tenu lokusasele

ngaphandle kwemacebo odvwa nje.”