Sililo 4

₁Yeka legolide leseyilahlekelwe bucwebecwebe bayo,

igolide lebeyicolisakele seyigucuke yafiphala.

Ematje laligugu endlu lengcwele asasakateleke

emaphetselweni ato tonkhe titaladi.

₂Maye, emadvodzana labalulekile aseSiyoni,

noko nawo ake alingana negolide lecengekile,

njengaloku nyalo asatsatfwa

njengetindziwo telibumba nje,

umsebenti wetandla tencondzi

yetekubumba ngelibumba!

₃Ngisho netimphungutja tiyayikhipha imibele yato

timunyise emazinyane ato,

kodvwa bantfu bami sebagucuke bangabi nanhlitiyo,

baba njengetinshi tasehlane.

₄Ngenca yekoma,

lulwimi lwalabamunyako lunamatsela elwangeni;

bantfwana bacela kudla,

kodvwa kubete lobapha kona.

₅Labo labake badla kahle batamasa,

nyalo sebangimizulane netindzindzi etitaladini.

Labo lababekhuliswa ngaletibukhwebeletane,

nyalo sebalala emataleni etincunjini temlotsa.

₆Sijeziso sebantfu bami sikhulu kunesalabo baseSodoma,

lababhujiswa ngemzuzwana munye,

kwabate nasinye sandla lesabelekelela.

₇Tikhulu tabo taticwebetela kwendlula sitfwatfwa,

timhlophe kwendlula lubisi.

Imitimba yato yayibovu yendlula emarubi,

kubonakala kwato kwakunjengekwemasafire.

₈Kodvwa nyalo setimnyama kwengca umsiti,

atatiwa ngisho nasetitaladini.

Sikhumba sato sesishwaphene sanamatsela ematsanjeni ato,

sesome saba njengelukhuni.

₉Labo lababulawa ngenkemba bancono kunalabo labafa babulawa yindlala;

badvutjutwe yindlala,

baze baguga baphela

ngenca yekweswela kudla emasimini.

₁₀Bafati labanesihawu badzimate bapheka

bantfwababo ngetabo tandla,

bagucuka baba kudla kwabo

ngesikhatsi bantfu bakitsi babhujiswa.

₁₁Simakadze ulufeze

ngalokuphelele lulaka lwakhe,

uyitfululile intfukutselo yakhe levutsako.

ESiyoni uphembe umlilo lowadla tisekelo tayo.

₁₂Kute emakhosi emhlaba,

ngisho nasinye sive lesisemhlabeni,

lesake sakukholwa

kutsi titsa nalabaphambene nayo

bangangena emasangweni aseJerusalema.

₁₃Kodvwa kwenteka ngenca yetono tebaphrofethi bayo,

nangetiphambuko tebaphristi bayo,

labacitsa ingati yalabamsulwa ekhatsi kuyo.

₁₄Nyalo baphrofethi nebaphristi sebadvukuta etitaladini

njengemadvodza latimphumphutse.

Tingubo tabo setishone ingati,

tadzimate tangcola lokwekutsi sekute namunye

lofisa nekutitsintsa ngesandla tembatfo tabo.

₁₅Bantfu bayabacosha, batsi:

“Hambani la! Sukani la! Ningcolile!

Khweshani! Khweshani! Ningasitsintsi!”

Ngesikhatsi baphrofethi nebaphristi

babaleka bayewuzulazula,

bantfu betive ngetive batsi:

“Bangeke basachubeka nekuhlala lapha!”

₁₆Simakadze cobo lwakhe ubasakatile, akasabelusi.

Baphristi abasahlonishwa,

nalabadzala abasaphatfwa ngemusa.

₁₇Ngetulu kwaloko,

emehlo etfu adzimate akhatsala

solomane agolotele lusito lungaveli,

sabukisisa emibhoshongweni yetfu,

silindzele sive lesasingeke sisisindzise.

₁₈Emadvodza asibekela lugibe

kuto tonkhe tinyatselo tetfu,

ngaloko asikhonanga kuhamba etitaladini tetfu,

kuphela kwetfu kwakusedvute,

nemalanga etfu abesabaliwe,

ngobe kuphela kwetfu kwase kufikile.

₁₉Batingeli betfu babegijima

kwendlula lusweti lwasesibhakabhakeni;

basigijimisa etintsabeni,

basibhacela ehlane.

₂₀Logcotjiwe waSimakadze, lokunguyena

angimitsambo yekuphila kwetfu,

wabhajwa etingibeni tabo.

Besicabanga kutsi siyawukhosela

ngaphansi kwematfunti akhe,

siphile emkhatsini wetive ngetive.

₂₁Awu, Ndvodzakati yase-Edomu, jabula utsakase,

wena lohlala eveni lase-Usi.

Kodvwa nakuwe itakwendluliselwa lendzebe,

uyawudzakwa uhlutjulwe ube ngcunu.

₂₂Awu, Ndvodzakati yaseSiyoni,

kujeziswa kwakho kutawuphela;

Simakadze angeke aselule sikhatsi sekudzingiswa kwakho.

Kodvwa, awu, wena Ndvodzakati yase-Edomu,

uyawujeziswa ngenca yesono sakho,

abubeke ebaleni bubi bakho.