Licebo lekubulala Jesu
1Jesu watsi kube acedze kufundzisa, watsi kubafundzi bakhe: 2“Njengobe nati kutsi sekusele emalanga lamabili kutsi kube nguMkhosi weliPhasika, iNdvodzana yeMuntfu itawunikelwa kuze ibetselwe esiphambanweni.”
3Baphristi labakhulu netibondza temaJuda babutsana esigodlweni sakaKhayafase, umPhristi Lomkhulu, 4bakha lisu lekubamba Jesu ngebucili, bambulale. 5Kepha batsi: “Kufanele singakwenti ngesikhatsi semkhosi, ngobe bantfu bangahle bente siphitsiphitsi.”
Jesu ugcotjiswa emafutsa eBhetani
6Watsi Jesu aseseBhetani endlini yaSimoni labenebulephelo, 7kwefika umfati kuye aphetse sigujana lesasakhiwe ngelitje lembiza, sigcwele emafutsa langemakha ladule kakhulu, wawatsela enhloko yaJesu, asadla. 8Kepha bafundzi, nabakubona loku, batfukutsela batsi: “Kumoselwani? 9Ngobe lamakha ngabe atsengiswe ngemali lenkhulu, kwanikwa labamphofu!”
10Kepha Jesu akwati loko, watsi kubo: “Nimhluphelani lomfati? Ngobe wente umsebenti lomuhle kimi. 11Ngobe labamphofu nihlala nabo onkhe emalanga; kepha mine, anihlali nami onkhe emalanga. 12Ngekutsela lamakha kimi ungilungiselele lithuna. 13Ngicinisile, ngitsi kini: Nome ngukuphi lapho liyawushunyayelwa khona leliVangeli emhlabeni wonkhe, kuyawukhulunywa ngalesento sakhe, kube sikhumbuto ngaye.”
Judasi ufuna kutsengisa Jesu
14Kwase kusuka lomunye webafundzi labali-12, longuJudasi Skariyothe, uya kubaphristi labakhulu. 15Wafike watsi: “Nitanginikani nanginganiniketa loJesu?” Base bamnika tinhlavu tesiliva letingema-30. 16Kusukela ngalelo langa Judasi wacala kufuna litfuba lekunikela Jesu kubo.
Jesu ulungiselela kudla liPhasika nebafundzi bakhe
17Ngelilanga lekucala leMkhosi Wesinkhwa Lesingenambiliso bafundzi beta kuJesu batsi: “Ungatsandza sikulungiselele kuphi Sidlo seliPhasika?”
18Watsi kubo: “Hambani niye kumuntfu lotsite edolobheni, nifike nimtjele nitsi: ‘UMfundzisi utsi: “Sikhatsi sami sesifikile; mine nebafundzi bami siyeta sitawudlela liPhasika endlini yakho.” ’ ”
19Bafundzi-ke benta njengobe Jesu abebatjelile, befike balungisa Sidlo seliPhasika.
Jesu ukhuluma ngalowo lotamtsengisa
20Kusihlwa Jesu nebafundzi bakhe labali-12 bahlala, badla. 21Batsi basadla, Jesu watsi kubo: “Ngicinisile, ngitsi kini: Lomunye wenu utangitsengisa.”
22Bafundzi badzabuka kakhulu, bacala babuta, kwaba ngulowo watsi: “Kungahle kube ngimi yini, Nkhosi?”
23Jesu waphendvula watsi: “Lowo lofaka sandla kanye nami esitjeni sinye, nguye lotangitsengisa. 24INdodzana yeMuntfu itawufa kambe, njengobe kubhaliwe ngayo, kepha maye kulowo muntfu, iNdvodzana yemuntfu letawutsengiswa nguye! Bekuyawuba ncono kulowo muntfu kube fane akatalwanga!”
25Wase uyabuta naJudasi labetamtsengisa watsi: “Kungabe ngimi yini, Mfundzisi?” Jesu wamphendvula watsi: “Usho kona.”
Sidlo seNkhosi
26Batsi basadla, Jesu watsatsa sinkhwa, wasibusisa, wasihlephula, wasinika bafundzi, watsi: “Tsatsani nidle, loku ngumtimba wami.”
27Wase utsatsa indzebe uyabonga, wabanika watsi: “Natsani kuyo nonkhe, 28ngobe loku kuyingati yami yesivumelwane, lecitselwe labanyenti kube kutsetselelwa kwetono. 29Kepha ngitsi kini: Kusukela lamuhla angisayiwunatsa kulesitselo semvini, kuyawudzimate kufike lelo langa lengiyakusinatsa ngalo nani sesisisha embusweni waBabe.”
30Batsi sebacedze kuhlabela liculo lekubonga, baphuma baya eNtsabeni Yemincumo.
Jesu ukhuluma ngekuphikwa nguPhetro kungakefiki
31Jesu watsi kubo: “Nonkhe nitangihlamuka kulobusuku, ngobe umBhalo utsi:
“ ‘Ngitawushaya ngibulale umelusi,
umhlambi wetimvu uhlakateke.’
32“Kepha emvakwekuvuka kwami ekufeni ngiyawuhamba kucala kunani kuya eGalile.”
33Phetro watsi kuye: “Nome bangakushiya bonkhe, kepha mine ngeke ngikushiye!”
34Jesu watsi kuye: “Ngicinisile, ngitsi kuwe: Kulobusuku balamuhla, lichudze litawutsi likhala, utabe sewungiphike katsatfu.”
35Phetro waphendvula watsi: “Nome ngingaze ngife nawe, ngingeke ngikuphike!”
Nalaba labanye bafundzi basho njalo.
Jesu uthandaza eGetsemane
36Jesu wahamba nebafundzi bakhe, waze wefika eGetsemane, watsi kubo: “Salani la, mine ngisaya kuyawuthandaza lapha.” 37Watsatsa Phetro nemadvodzana lamabili aZebedi. Wacala kufikelwa ngumunyu nelusizi, 38watsi kubo: “Umphefumulo wami ulusizi, kuze kubesekufeni. Salani la, nilindze kanye nami.”
39Yena wachubeka libangana, wawa phansi ngebuso, athandaza atsi: “Babe, nakungenteka, yendlulise kimi lendzebe yelusizi. Kepha hhayi ngekufisa kwami, kodvwa kuye ngentsandvo yakho.”
40Wabuyela kubafundzi bakhe wabakhandza balele, watsi kuPhetro: “Beningeke yini nilindze kanye nami li-awa libe linye nje? 41Lindzani, nithandaze, kuze ningetikungena ekulingweni! Umoya uyavuma, kodvwa inyama ibutsakatsaka.”
42Waphindze wahamba futsi kwesibili wathandaza atsi: “Babe, nangabe lendzebe ingeke yendlule kimi ngingakayinatsi, akwenteke intsandvo yakho!” 43Waphindze futsi wabuya, wabakhandza balele, ngobe emehlo abo abesindvwa butfongo.
44Waphindze wabashiya futsi, wahamba wayawuthandaza kwesitsatfu, asho wona lawo mavi. 45Jesu wefika kubafundzi bakhe watsi: “Nisalele namanje, niyaphumula? Bukani-ke, sikhatsi sesisondzele, iNdvodzana yeMuntfu seyiniketwe etandleni tetoni. 46Sukumani sambe! Bukani, lona longitsengisako sewusondzele!”
Kuboshwa kwaJesu
47Watsi asakhuluma loko, kwefika Judasi labengulomunye walababeli-12, anesicuku lesikhulu sebantfu, sihlome ngetinkemba netindvuku, sitfunywe baphristi labakhulu kanye netibondza temaJuda. 48Lona labemtsengisa abevumelene nabo watsi: “Lendvodza lengitawuyanga, ngiyo-ke lena leniyifunako. Nibobamba yona!”
49Wefika kuJesu masinyane watsi: “E, Mfundzisi!” Wamanga.
50Jesu watsi kuye: “Mngami, yenta loko lokutele la!”
Base bayamdvumela bambamba. 51Lomunye walaba babehamba naJesu wakhipha inkemba yakhe, wahhumbula indlebe yesigcili semPhristi Lomkhulu, yalahleka phansi. 52Jesu watsi kuye: “Buyisela inkemba yakho emgodleni wayo, ngobe bonkhe labaphatsa inkemba bayawufa ngenkemba. 53Ucabanga kutsi bengingete ngacela yini mine kuBabe angehlisele tinkhulungwane letingetulu kweli-12 tetingilosi? 54Pho, ingagcwaliseka kanjani imiBhalo letsi kumele kube njalo?”
55Ngaleso sikhatsi Jesu watsi eticukwini: “Bekudzingeke ngani kutsi nite netinkemba kanye netindvuku kutengibopha shangatsi ngisigebengu? Bengihleti nani ethempelini onkhe emalanga ngifundzisa, kodvwa anizange seningibophe. 56Kodvwa konkhe loku kwentekele kutsi kugcwaliseke loko lokwabhalwa baphrofethi emiBhalweni.”
Bafundzi bakhe bonkhe bamshiya khona lapho, babaleka.
Jesu embikweLiqoqo
57Ngako labo lababebophe Jesu bamyisa kuKhayafase, umPhristi Lomkhulu, lapho kwakuhlangene khona bafundzisi bemtsetfo netibondza. 58Kepha Phetro bekamlandzela khashane, waze wangena esibuyeni sendlu yemPhristi Lomkhulu. Wafike wahlala nebalindzi, afuna kubona kutsi sigcino kutawuba yini.
59Baphristi labakhulu neLiqoqo lonkhe baphenyisisa Jesu bafuna bufakazi lobungemanga, khona batewumlahla ngelicala lekufa. 60Kodvwa abazange babutfole ngisho nabunye, kwala nome bofakazi labanyenti bemacebo sebetama kubuveta. Ekugcineni kweta ngembili emadvodza lamabili, 61afike atsi: “Lendvodza yatsi: ‘Mine ngingalibhidlita lelithempeli laNkulunkulu, ngibuye ngilakhe ngemalanga lamatsatfu.’ ”
62UmPhristi Lomkhulu wasukuma watsi kuJesu: “Akukho yini longatiphendvulela ngako kuloku labakubeke licala ngako?” 63Kodvwa Jesu wabindza. Waphindze wakhuluma umPhristi Lomkhulu watsi kuye: “Egameni laNkulunkulu lophilako, sengiyakufungisa-ke manje kutsi sitjele nawunguKhristu, iNdvodzana yaNkulunkulu.”
64Jesu waphendvula watsi: “Usho kona. Noko ngitsi kini:
“ ‘Kusukela manje seniyakuyibona
iNdvodzana yeMuntfu
ihleti ngesekudla saLonemandla,
ita ngemafu asezulwini.’ ”
65Nasasho loku, umPhristi Lomkhulu wadzabula tingubo takhe watsi: “Vele, sewuhlambalatile; asisabudzingi lobunye bufakazi, seniyivile inkhulumo yakhe lehlambalatako! 66Nine nitsini-ke?”
Baphendvula batsi: “Kufanele afe!”
67Base bamkhafulela ngematse ebusweni, bamhlukumeta kamatima, bammukula 68batsi: “Phrofetha, Khristu, usitjele kutsi ngubani lokushayile!”
Phetro uphika Jesu
69Phetro bekahleti ngephandle esibuyeni. Kweta intfombatana leyayisisebenti yafike yatsi: “Nawe bewunaye lomGalile longuJesu.”
70Kodvwa wakuphika embikwabo bonkhe watsi: “Angikwati loku lokhuluma ngako.” 71Watsi asesukile asatimele eceleni kwemphundvu yesibuya, kwaphindze kwefika lenye intfombatana lesisebenti yambuka yase ikhuluma kulamadvodza labelapho, imkhomba, yatsi: “Nalona abenaye loJesu waseNazaretha.”
72Wabuye waphika, afunga atsi: “Angimati lomuntfu.”
73Emvakwesikhashana lamadvodza labeme lapho asondzela kuPhetro afike atsi: “Ngempela nawe ungulomunye wabo, ngisho nekukhuluma kwakho kuyatisho nje.”
74Phetro wacala kuticalekisa nekufunga watsi: “Angimati lomuntfu!”
Asasho njalo lakhala lichudze. 75Phetro wase uyawakhumbula emavi aJesu ngesikhatsi atsi: “Lichudze litakutsi likhala, utakube sewungiphike katsatfu.”
Wase uphumela ngephandle, wakhala kabuhlungu.
