Matewu 27

₁Ekuseni lokwa ngeluvivi baphristi labakhulu netibondza tesive benta lisu lekubulala Jesu. ₂Bambopha, bamtsatsa, bammikisa kuLusibalukhulu Philatu.

₃Judasi, labengumtsengisi wakhe, nakabona kutsi Jesu bamlahle ngelicala lekufa, watisola, wabuyisela letinhlavu letingema-30 kubaphristi labakhulu kanye netibondza, ₄atsi: “Ngonile ngekutsengisa ngengati lengenacala!”

Bona batsi kuye: “Pho, singenaphi lapho tsine? Tibonele wena!”

₅Judasi wasakata phansi lemali ethempelini, wahamba wayawutikhunga.

₆Baphristi labakhulu bayicobonga lemali batsi: “Lemali ngeyengati, kantsi kuphambene nemtsetfo wakitsi kutsi imali lenje ifakwe esikhwameni selithempeli.” ₇Emvakwekuvumelana ngaloko, lemali batsenga ngayo iNsimi yeMbumbi, kuze ibe yindzawo yekungcwabela tihambi. ₈Ngiko nje lensimi kuze kube ngulamuhla ibitwa ngekutsi: “YiNsimi yeNgati.”

₉Ngako kwagcwaliseka loko lokwashiwo ngumphrofethi Jeremiya kutsi: “Batsatsa tinhlavu letingema-30 tesiliva, intsengo yakhe. Lentsengo ngaye yalungiswa ngulabanye bemadvodzana aka-Israyeli. ₁₀Batsenga ngayo insimi yembumbi, njengobe iNkhosi ingiyalile.”

₁₁Jesu wemiswa embikwaLusibalukhulu lowambuta watsi: “Wena ungiyo yini inkhosi yemaJuda?”

Jesu waphendvula watsi: “Usho kona.” ₁₂Kepha ngesikhatsi baphristi labakhulu netibondza bametfwesa emacala abengaphendvuli.

₁₃Ngako Philatu watsi kuye: “Awuweva yini lamacala langaka labakubeka wona?”

₁₄Kepha Jesu akazange amphendvule, ngisho nangalinye nje. Lusibalukhulu wamangala kakhulu.

₁₅Ngesikhatsi semkhosi Lusibalukhulu abenemkhuba wekukhulula sinye siboshwa lesasifunwa sicuku sebantfu. ₁₆Ngaso leso sikhatsi-ke kwakunesiboshwa lesasidvume ngebubi baso lebesinguBharaba. ₁₇Ngako-ke satsi kube lesicumbi sibutsane, Philatu wasibuta watsi: “Nifuna nginikhululele bani emkhatsini waBharaba naJesu lowatiwa ngekutsi nguKhristu?” ₁₈Abati kahle kamhlophe kutsi Jesu babemletse ngobe babenemona naye.

₁₉Watsi Philatu asahleti esihlalweni sekwehlulela, umfati wakhe watfumela kuye livi atsi: “Ungatifaki endzabeni yalowo muntfu longenacala, ngobe angikalali ngihlushwa ngaye ngeliphupho ebusuku balamuhla.”

₂₀Kepha baphristi labakhulu netibondza bativumisa leticumbi kutsi ticele Bharaba, kubulawe Jesu. ₂₁Kodvwa Lusibalukhulu wababuta watsi: “Nifuna nginikhululele muphi emkhatsini walaba lababili?”

Baphendvula batsi: “Bharaba!”

₂₂Philatu wababuta watsi: “Ngenteni-ke ngaloJesu lekutsiwa nguKhristu?” Bonkhe baphendvula batsi: “Mbetsele esiphambanweni!”

₂₃Kodvwa Philatu wababuta futsi watsi: “Ngobe ente cala lini?” Kepha kwaba ngukhona bamemeta bonkhe batsi: “Mbetsele esiphambanweni!”

₂₄Watsi kube abone Philatu kutsi kute langaphindze akwente, nekutsi sekusuka siphitsiphitsi, watsatsa emanti, wageza tandla embikwebantfu bonkhe watsi: “Anginacala ngengati yalomuntfu! Tiboneleni nine!”

₂₅Sonkhe sive saphendvula satsi: “Ingati yakhe ayibesetikwetfu nasetikwebantfwana betfu!”

₂₆Philatu wase ubakhululela Bharaba; kepha Jesu asashayiwe wase umnikela kubo kutsi abetselwe esiphambanweni.

₂₇Emasotja aLusibalukhulu ase atsatsa Jesu ammikisa esigodlweni saLusibalukhulu. Lonkhe libutfo lemasotja lasondzela lamtungeleta. ₂₈Lamhlubula tingubo takhe, lamembatsisa ingubo lebovu. ₂₉Lase leluka umchele ngemanyeva, lawufaka enhloko yakhe, lambambisa umhlanga ngesekudla, laguca embikwakhe, lamphukuta latsi: “Bayethe! Nkhosi yemaJuda!” ₃₀Lamkhafulela ngematse, latsatsa lomhlanga, lamshaya enhloko. ₃₁Naselicedzile kumphukuta, lamkhumula lengubo lebovu, laphindze futsi lamembatsisa letakhe tingubo, lase liphuma naye layakumbetsela esiphambanweni.

₃₂Libutfo lemasotja latsi lisaphuma nje lahlangana nalenye indvodza yaseSirene, lenguSimoni libito layo, layicindzetela kutsi yetfwale siphambano saJesu. ₃₃Nasebafikile endzaweni lekutsiwa yiGolkotha, lokusho kutsi: “YiNdzawo yeSikobho,” ₃₄lamnatsisa liwayini lelalibhicwe nenyongo; watsi kube alive walala, wangete walinatsa.

₃₅Selimbetsele esiphambanweni, lase lenta inkatho, lehlukaniselana ngetingubo takhe. ₃₆Lahlala phansi, lamgadza. ₃₇Ngetulu kwenhloko yakhe labeka satiso selicala lagwetjwe ngalo sitsi: “lona ngujesu, inkhosi yemajuda.” ₃₈Kwase kubetselwa kanye naye tigebengu letimbili, lesinye ngesekudla, lesinye ngesancele.

₃₉Bantfu lababendlula lapho babemetfuka banikine tinhloko, ₄₀batsi: “Wena lobhidlita lithempeli uphindze ulakhe ngemalanga lamatsatfu! Tisindzise phela, nangabe uyiNdvodzana yaNkulunkulu! Yehla lapho esiphambanweni!”

₄₁Kanjalo futsi nebaphristi labakhulu, netati temtsetfo, netibondza bamphukuta, batsi: ₄₂“Wabasindzisa labanye, kodvwa yena angeke atisindzise! Kantsi akasiyo iNkhosi yema-Israyeli yini? Akehle phela! Nangabe angehla esiphambanweni, sitawukholwa nguye! ₄₃Wetsembele kuNkulunkulu. Akamehlise phela loNkulunkulu wakhe namtsandza! Ngobe watsi: ‘NgiyiNdvodzana yaNkulunkulu.’ ”

₄₄Ngisho nalabo lababili lababebetselwe kanye naye, bametfuka nabo.

₄₅Kepha kusukela ngeli-awa leli-12 emini umhlaba wonkhe waba mnyama, kwaze kwaba li-awa lesitsatfu. ₄₆Kwatsi ngensimbi yesitsatfu entsambama Jesu wakhala kakhulu watsi: “Eli, Eli, lama sabakthani?” lokusho kutsi: “Nkulunkulu wami, Nkulunkulu wami, ungishiyeleni?”

₄₇Labanye bantfu lababelapho labamuva batsi: “Ase nimuve! Ubita Elija!” ₄₈Lomunye wabo wagijima masinyane waya kuye nesiponji, wasenya ewayinini lelimunyu, wasihloma elutsini lwemhlanga wetama kumnatsisa.

₄₉Kodvwa labanye batsi: “Ase nimyekele, sibone kutsi lo-Elija utawufika yini atemsindzisa!”

₅₀Jesu waphindze wakhala ngelivi lelikhulu kakhulu, wase uyafa.

₅₁Bheka, indvwangu leyayilenga ethempelini yadzabuka ekhatsi, kusukela etulu kuya phansi. Umhlaba watamatama, emadvwala achekeka ekhatsi, ₅₂emathuna avuleka, bantfu labanyenti baNkulunkulu labebafile bavuswa ekufeni. ₅₃Bawashiya emathuna; emvakwekuvuka kwaJesu ekufeni baya bangena edolobheni lelingcwele, lapho babonwa bantfu labanyenti.

₅₄Indvuna yemphi nemasotja labenawo labelindze Jesu, nabakubona lokutamatama kwemhlaba, nako konkhe lokwenteka, befikelwa kwesaba lokukhulu baze batsi: “Ngempela lomuntfu abeyiNdvodzana yaNkulunkulu!”

₅₅Kwakunebafati labanyenti lapho lababemlandzela basita Jesu kusukela eGalile; babebukela, babucalu. ₅₆Emkhatsini wabo bekukhona Mariya waseMagdala, naMariya, unina waJakobe naJosefa, nenina wemadvodzana aZebedi.

₅₇Nakuhwalalako, kwefika Josefa labeyinjinga yase-Arimathiya, naye futsi abengulomunye webafundzi baJesu. ₅₈Waya kuPhilatu kuyawucela sidvumbu saJesu. Philatu wakhipha livi watsi akanikwe. ₅₉Ngako Josefa wasitsatsa lesidvumbu, wasigocota ngendvwangu lenhle, yelineni lecolisakele, ₆₀wasibeka ethuneni lelisha labesandza kuligubha edvwaleni. Wase ugicitela litje lelikhulu emnyango walelithuna wavala ngalo, wesuka wahamba. ₆₁Kepha Mariya waseMagdala nalomunye Mariya babehleti khona lapho, macondzana nelithuna.

₆₂Ngakusasa, lokusho kutsi, ngelilanga lelilandzela lelemalungiselelo, baphristi labakhulu nebaFarisi bahlangana naPhilatu, ₆₃batsi kuye: “Nkhosi, siyakhumbula kutsi lomkhohlisi asaphila watsi: ‘Ngiyawuvuka emvakwemalanga lamatsatfu.’ ₆₄Ngako khipha umyalo kutsi lelithuna lakhe ligadzisiswe kahle kuze kube lilanga lesitsatfu, kuze bafundzi bakhe bangayi kuyawumeba, bese batjela bantfu batsi: ‘Uvusiwe kulabafile,’ bese kutsi lamanga akhe ekugcina abe makhulu kakhulu kunalawa ekucala.”

₆₅Philatu watsi kubo: “Tsatsani naba balindzi nihambe niyekulelusa njengekubona kwenu.”

₆₆Besuka bahamba, bayawuligadzisisa lelithuna: balivalisisa, baze bashiya neluphawu etjeni, babeka nebalindzi.