Sihlabelelo 141

₁Ngikhala kuwe, Simakadze;

vani livi lami, nangikhala kuwe.

₂Shangatsi umthandazo wami

ungaba njengemphepho kuwe;

nekuphakamisa kwami tandla

akube kuwe njengemihlatjelo yakusihlwa.

₃Simakadze,

beka umlindzi emlonyeni wami;

ungeluse,

ngingakhulumi lutfo ngemawala.

₄Ngente ngingakutsandzi kwenta lokubi,

ngingahlanganyeli nalababi

emisebentini yabo lemibi,

ngingahlanganyeli nasemadzilini abo.

₅ Ngingamane ngijeziswe

ngumuntfu lolungile,

loko kungumusa kimi;

angamane angitsetsise,

loko kungemafutsa enhloko yami,

kodvwa umkhuleko wami

uphambene netento letimbi talababi.

₆Mhlazana babusi babo

bayawujikijelwa phansi emaweni,

ngumzukwana bayawufundza

kutsi emavi ami aliciniso.

₇Njengetinkhuni tijutjwa tiba ticucu,

ngalokufananako ematsambo abo

ayawusakateka ngasekungeneni kwelithuna.

₈Awu, Simakadze, Somandla,

emehlo ami anamatsele kuwe

ngiphephela kuwe,

ungangiyekeleli ekufeni.

₉Ngihlenge elugibeni

labangibekele lona,

ungigcine kubosochaka balababi.

₁₀Lababi ababanjwe tingibe tabo,

kodvwa mine ngendlule ngiphephile.