Sihlabelelo 17

₁Awu, Simakadze, ase ulalele

kuncusa kwami lokumsulwa.

Beka indlebe yakho emthandazweni wami,

lophuma emlonyeni lote inkhohliso.

₂Kwehlulelwa kwami akuvele kuwe,

emehlo akho abuke lokulungile.

₃Uvivinye inhlitiyo yami,

wangivakashela utengihlolisisa ebusuku,

kepha awutfolanga lutfo lolubi kimi.

Nome ngicabange lokubi,

kodvwa umlomo wami

awuzange ukhulume lokubi.

₄Macondzana nemisebenti yebantfu

mine ngitigadze ngekulalela livi lakho,

ngaticwaya tindlela talabatidlova.

₅Tinyatselo tami tisemikhondvweni yakho,

ngiko nje tinyawo tami tingasheleli.

₆Ngincusa kuwe,

ngobe wena, Nkulunkulu, utangiphendvula;

beka indlebe yakho,

ulalele emavi ami.

₇Khombisa ubonakalise

umusa wakho lomangalisako.

Wena ungumsindzisi walabo

labatsi nababaleka etitseni tabo

bete kuwe, njengesiphephelo sabo.

₈Ngilondvolote njengenhlavu yeliso.

Ngifihle ngaphansi kwemaphiko akho,

₉ungivikele kulababi labangihlaselako

nasetitseni tami lese tingitungeleta.

₁₀Tinhlitiyo tabo atinasihawu,

imilomo yabo ikhuluma

kutigabatisa kodvwa.

₁₁Nome siyaphi bayasihaca,

emehlo abo bawabhekise ngakitsi,

kutsi basiwise.

₁₂Banjengelibhubesi lelifuna

kubamba inyamatane;

bafana neliwundlwana lelibhubesi

lelibhace etindzaweni letisitsele.

₁₃Vuka Simakadze!

Hlangabeta lomubi umlahle phansi.

Sindzisa umphefumulo wami kuye

ngenkemba yakho.

₁₄Simakadze, ngephule ngesandla sakho

etandleni talabagungubele

ngetintfo talomhlaba.

Bajezise ngekuhlupheka

lobabekele kona.

Shangatsi kungenela bona

kanye nebantfwababo,

kwendlulele nakubatukulu

bebatukulu babo.

₁₅Mine-ke ngiyawububona buso bakho,

ngobe ngingulolungile,

mhlazana ngivuka

ngiyakweneliswa bukhona bakho.