Sihlabelelo 34

₁Simakadze ngiyawumbonga

ngato tonkhe tikhatsi,

ngimdvumise ngemlomo wami ngingakhawuli.

₂Umphefumulo wami

utigabatisa ngaSimakadze,

labahluphekako abeve bajabule.

₃Dvumisani Simakadze kanye nami,

siphakamise libito lakhe kanyekanye.

₄Ngakhuleka kuSimakadze, wangiphendvula,

wangikhulula kuko konkhe kwesaba kwami.

₅Lababheka kuye bayamamatseka,

buso babo bungeke budliwe ngemahloni.

₆Ngangingumuntfu losihlupheki,

ngakhala kuSimakadze, wangiva,

wangisindzisa

kuko konkhe kuhlupheka kwami.

₇Ingilosi yaSimakadze yakha umtsangala

lotungeleta labo labamesabako,

ibakhulule, iphindze ibavikele.

₈Ase ninambitse

nibone kutsi Simakadze muhle unemusa!

Ubusisiwe lowo lokhosela kuye!

₉Yesabani Simakadze,

nine labangcwele,

ngobe abesweli lutfo labamesabako.

₁₀Ngisho nemabhongwana emabhubesi

ayeswela alambe,

kodvwa labo labafuna Simakadze

bangeke beswele lutfo loluhle.

₁₁Wotani, bantfwabami, ningilalele,

ngitanifundzisa kumesaba Simakadze.

₁₂Ngubani lotsandza kuphila

adzimate adle tinyoni tebantfwabakhe?

₁₃Lowo-ke akagcine lulwimi lwakhe ebubini,

netindzebe takhe tingakhulumi emanga.

₁₄Khwesha kulokubi wente lokuhle;

funisisa kuthula, ukubambisise.

₁₅Emehlo aSimakadze akesuki kulabalungile,

tindlebe takhe atisuki ekukhaleni kwabo.

₁₆Buso baSimakadze

buphambene nalabenta lokubi,

kuze abashabalalise,

bangabe basakhunjulwa emhlabeni.

₁₇Labalungile nabakhala bacela lusito,

Simakadze uyabeva,

abakhulule kuto tonkhe tinhlupheko tabo.

₁₈Simakadze uhlala asedvute nabo

labanetinhlitiyo letephukile

uyabasindzisa labanemoya lowephukile.

₁₉Lolungile uhlala ajingwe

tinhlupheko letinyenti,

kodvwa Simakadze umkhulula kuto tonkhe,

₂₀alondvolote onkhe ematsambo akhe,

kungephuki ngisho nome linye.

₂₁Sikhohlakali siyawubulawa ngulokubi,

nalabatondza lolungile bayawudliwa licala.

₂₂Simakadze uyakuhlenga

kuphila kwetinceku takhe,

labakhosela kuye bangeke badliwe licala.