Sihlabelelo 35

₁Cabana nalabo labacabana nami,

ulwe nalabo labalwa nami, Simakadze.

₂Tsatsa lihawu lelincane nalelikhulu,

uphutfume utengisita!

₃Hoshula sikhali sakho,

uvimbe labo labangicoshako;

khuluma emphefumulweni wami, utsi:

“Mine ngiyinsindziso yakho!”

₄Shangatsi bangajabha, bahlazeke,

labo labafuna umphefumulo wami;

shangatsi bangahlakateka

labo labacondze kungicitsa.

₅Ababe njengemakhoba wona

apheshulwa ngumoya,

ingilosi yaSimakadze isabadvungulula.

₆Indlela yabo ayihlwe, ishelele,

ingilosi yaSimakadze isabacosha.

₇Njengobe bangibekele lugibe

ngaphandle kwesono,

bangimbela umgodzi lolugibe

ngingenacala,

₈shangatsi bangehlelwa yimbhubhiso

ngekutumeka lokukhulu,

nelugibe labangetsiye ngalo lubambe bona.

Umgodzi lolugibe labangetsiye ngawo

uhholokoshisele bona, babhubhe.

₉Ngako umphefumulo wami

uyawujabula kuSimakadze,

ujabule nangensindziso yakhe.

₁₀Ematsambo onkhe ami ayawutsi:

“Yebo, Simakadze,

ngubani lofana nawe,

wena lokhulula lobutsakatsaka

etandleni tesichwaga,

ukhulule lobutsakatsaka naloweswele

etandleni temcindzeteli?”

₁₁Kuvumbuka bofakazi labanebudlova,

bangibuta tintfo lengingatati.

₁₂Bangiphindzisela lokuhle ngalokubi,

umphefumulo wami bawudzabukisile.

₁₃Kantsi nakugula bona,

mine ngembatsa inzilo;

umphefumulo wami

ngawugongonya ngekuzila,

noko ngacinisela ekuthandazeni.

₁₄Kimi kwafanana nekutsi

babangani bami nome bomnaketfu.

Ngahamba ngikhala,

kwaba shangatsi ngifelwe ngumake,

ngadzabuka ngaba nelusizi.

₁₅Kodvwa kwatsi nangikhubeka ngiwa,

batsakasa, bahlangana ndzawonye;

bahlanganela kumelana nami,

tinkhubela lengingatati

tingihlanganyela tinginyembenye siphelane.

₁₆Labantfu bashuca

nalabahlambalata Nkulunkulu,

bahlose bubi ngami.

₁₇Simakadze,

kuyawuze kube ngunini ungibukelela?

Ngisindzise ebudloveni babo,

wephule umphefumulo wami kulamabhubesi!

₁₈Ngiyawubonga ebandleni lelikhulu

ngikudvumise

nasemkhambatsini lomkhulu webantfu.

₁₉Ungativumeli titsa tami,

letingicambela emanga,

kutsi titijabulise ngami.

Ungabavumeli

labangitondzela lite

kutsi baficelane emehlo ngami,

bangente inhlekisa.

₂₀Abakhulumi lokumele kuthula,

kodvwa bacala tindzaba letingemanga

ngebantfu labanekuthula eveni.

₂₁Bakhamise imilomo yabo,

bakhuluma baphambane nami, batsi:

“Hha! Hha! Sikubonile lokukhulu!”

₂₂Nawe, Simakadze,

wakubona lokwenteka;

ngako-ke phutfuma ungabindzi,

ungakhweshi kimi, Simakadze.

₂₃Phaphama uvuke, ungiphutfume,

Nkulunkulu wami, Nkhosi yami,

ngikhulumele ungimele ecaleni lami.

₂₄Awu, Simakadze, Nkulunkulu wami,

ngehlulele ngekulunga kwakho;

ungabavumeli kutsi bangente inhlekisa.

₂₅Ungabavumeli bangicoloshele, batsi:

“Yehhehhe! Nako-ke lebesikufuna!”

Ungabavumeli bakhulume batsi:

“Sesimehlulile.”

₂₆Bonkhe labatsakasela kuhlupheka kwami

abahlazeke, badliwe ngemahloni,

abembatsiswe emahloni nelihlazo

labo labangicoloshelako.

₂₇Labo labatsakasele kutsi ngimsulwa

abamemete ngekujabula batfokote,

njalonjalo, batsi:

“Akadvunyiswe Simakadze,

lojabulela inhlalakahle yenceku yakhe!”

₂₈Ngako lulwimi lwami luyakhuluma,

lumemetele ngekulunga kwakho,

lukudvumise onkhe emalanga.