Ta Davhida loko a lela Solomoni, a fa.
1Loko Davhida a ri ekusuhi ni ku fa, a lerisa Solomoni, n'wana wa yena, a ku: 2“Ndza famba hi ndlela ya misava hinkwayo: Tiyisa mbilu, u va wanuna. 3Hlayisa milawu ya Yehovha, Xikwembu xa wena, u famba etindleleni ta yena, u hlayisa ku lerisa ka yena, ni milawu ya yena, ni ku avanyisa ka yena, ni vumbhoni bya yena, hilaha ku tsariweke hakona enawini wa Muxe leswaku, u tlhariha eswilweni hinkwaswo leswi u nga ta swi endla, ni hinkwako laha u nga ta hundzukela kona; 4leswaku Yehovha a tatisa rito ra yena leri a ri vuleke ehenhla ka mina, loko a te: ‘Kutakuloko vana va wena va tihlayisa etindleleni ta vona, va famba emahlweni ka mombo wa mina hi ntiyiso, etimbilwini ta vona hinkwato, ni le mimoyeni ya vona hinkwayo, a ku nga pfumari munhu wa yindlu ya wena exitshan'weni xa vuhosi xa Israele hilaha ku nga heriki.’
5“Wa swi tiva leswi Yowabu n'wana Seruya a ndzi endleleke swona, leswi a swi endleke eka tindhuna letimbirhi ta nyimpi ya Israele, a ri Abinere, n'wana Neri, na Amasa, n'wana Yetere; u va dlayile; u halatile eku rhuleni ngati ya nyimpi; u totile ngati ya nyimpi evambeni leri nga exisutini xa yena, ni le tintanghwini leti nga emilengeni ya yena. 6U ta n'wi endla hi ku tlhariha ka wena, kambe u nga tshiki misisi ya yena leyo basa yi xikela hi ku rhula exivandleni xa vafi.
7“Loko va ri vana va Barizilayi wa Giliyadi, u ta va endla hi tintswalo: Va ta dya etafuleni ra wena; hikuva va endlise sweswo eka mina loko ndzi ri karhi ndzi baleka emahlweni ka Abixalomu, makwenu.
8“Waswivo, ekusuhi na wena ku na Ximeyi, n'wana Gera, wa Benjamini, wa Bahurimi; u ndzi rhukanile hi mukhuva lowo biha ngopfu siku ndzi yaka eMahanayimi. Kambe u rhelele ku hlangana na mina eYordani, kutani ndzi n'wi hlambanyele hi Yehovha, ndzi te: ‘Ndzi nga ka ndzi nga ku dlayi hi tlhari.’ 9Sweswi, u nga n'wi ringanisi ni la nga riki na nandzu, hikuva wena u munhu la tlhariheke, u tiva leswi u fanelaka ku swi endla; kambe u ta xikisa misisi ya yena leyo basa hi ngati exivandleni xa vafi.”
10Davhida a tietlelela ni vatata wa yena, kutani a lahliwa emutini wa Davhida. 11Masiku hinkwawo lawa Davhida a nga fuma Israele ha wona a ma ri malembe ya mune wa makume: a fuma malembe ya ntlhanu na mambirhi eHebroni, ni malembe ya makume manharhu na manharhu eYerusalema. 12Solomoni a tshamisa exiluvelweni xa Davhida, tata wa yena, kutani vuhosi bya yena byi tiyisiwa swinene.
Solomoni a tiyisa vuhosi bya yena.
13Adoniya, n'wana Hagiti, a ya eka Batixeba, mana wa Solomoni. Kutani yena a ku: “Xana u tile hi ku rhula?” A ku: “Hi ku rhula.” 14A engeta a ku: “Ndzi ni rito leri ndzi rhandzaka ku ku byela rona.” Batixeba a ku: “Vulavula.” 15Kutani a ku: “Wa swi tiva leswaku vuhosi a byi ri bya mina, kutani Vaisraele hinkwavo a va languta eka mina, leswaku ndzi va hosi; kambe vuhosi byi hundzukile, byi ye eka makwerhu, hikuva leswi byi nga ya eka yena swi hume eka Yehovha. 16Sweswi, ndzi ta kombela xilo xin'we eka wena, u nga ndzi arisi!” Batixeba a ku eka yena: “Vulavula.” 17Yena a ku: “Wa nga byela hosi Solomoni (hikuva a nga ka a nga ku arisi nchumu) leswaku a ndzi nyika Abixaga wa Xuneme, a va nsati wa mina.” 18Batixeba a ku: “Hi swona! Ndzi ta ku vulavulela eka hosi.”
19Kutani Batixeba a ya eka hosi Solomoni ku vulavulela Adoniya. Hosi yi pfuka ku ya hlangana na yena, yi khinsama emahlweni ka yena; kutani yi tshamisa exiluvelweni xa yona, yi lerisa xiluvelo xin'wanyana xi vekeriwa mana wa hosi, kutani Batixeba a tshamisa evokweni ra yona ra xinene. 20A ku: “Ndzi ta kombela mhaka leyitsongo eka wena, u nga ndzi ariseri yona.” Hosi yi ku eka yena: “Kombela, manana; hikuva ndzi nga ka ndzi nga ku ariseri nchumu.” 21A ku: “Abixaga wa Xuneme a a nyikiwe Adoniya, makwenu, a va nsati wa yena.” 22Hosi Solomoni a hlamula, a ku eka mana wa yena: “U n'wi kombelelela yini Adoniya, Abixaga wa Xuneme xana? N'wi kombelele ni vuhosi, hikuva makwerhu i hosi ya mina; kunene, u byi kombelela yena, na Abiyatara, muprista, na Yowabu, n'wana Seruya!” 23Kutani hosi Solomoni a hlambanya hi Yehovha, a ku: “Xikwembu a xi ndzi endle hi matimba ni ku engetela! Kunene Adoniya u vurile rito leri lovisaka vutomi bya yena! 24Sweswi Yehovha wa hanya, la nga ndzi tiyisa ni ku ndzi tshamisisa exiluvelweni xa tatana Davhida, a ndzi endla ni yindlu hilaha a vuleke hakona! Kunene namuntlha Adoniya u ta dlawa.” 25Kutani hosi Solomoni a rhuma Benaya, n'wana Yehoyada, a ya n'wi dlaya, a fa.
26Loko a ri Abiyatara, muprista, hosi yi ku eka yena: “Suka u famba emasin'wini ya wena, eAnatoto, hikuva u fanekele hi rifu; kambe namuntlha a ndzi nga ku dlayi, hikuva u pingile areka ya Hosi Yehovha emahlweni ka Davhida, tata wa mina, kambe u tsongahatiwile na tatana, eku tsongahatiweni hinkwako ka yena.” 27Kavaloko Solomoni a hlongola Abiyatara leswaku a nga ha vi muprista wa Yehovha, ni leswaku ku ta hetisiwa rito leri Yehovha a nga ri vula ehenhla ka yindlu ya Heli, eXilo.
28Kambe mpfumawulo wu fikela Yowabu (hikuva Yowabu a a landzile Adoniya, hambi a nga landzanga Abixalomu); kutani Yowabu a ya chavela eTabernakeleni ya Yehovha, a khoma timhondzo ta alitari. 29Va ya byela hosi Solomoni leswaku Yowabu u tsutsumele eTabernakeleni ya Yehovha u le kusuhi ni alitari; kutani Solomoni a rhuma Benaya, n'wana Yehoyada, a ku eka yena: “Famba u n'wi dlaya.” 30Kutani Benaya a fika eTabernakeleni ya Yehovha, a ku eka Yowabu: “Hosi yi vurisa sweswo, yi ku: ‘Huma!’ ” Yena a ku: “E-e, hikuva ndzi ta fa kolaho.” Benaya a ya byela hosi, a ku: “Yowabu u vurisile sweswo, u ndzi hlamule sweswo.” 31Kutani hosi yi ku eka yena: “Endla hilaha a nga vula hakona; n'wi dlaye, u n'wi lahla; sweswo u ta susa ehenhla ka mina ni le henhla ka yindlu ya tatana, ngati leyi Yowabu a yi halateke ntsena. 32Yehovha u ta veka ngati ya yena enhlokweni ya yena, hikuva u dlayile vavanuna vambirhi lavo lulama lavanene ku tlula yena, a va dlaya hi tlhari, tatana Davhida a nga tivanga nchumu: a ri Abinere, n'wana Neri, ndhuna ya nyimpi ya Israele, na Amasa, n'wana Yetere, ndhuna ya nyimpi ya Yuda. 33Ngati ya vona yi ta wela enhlokweni ya Yowabu, ni le tinhlokweni ta vatukulu va yena hi masiku; kambe ku rhula ku ta va eka Davhida ni le vatukulweni va yena, ni le ndlwini ya yena, ni le xiluvelweni xa yena hi masiku.” 34Kutani Benaya n'wana Yehoyada, a tlhandluka, a tlhava Yowabu, a n'wi dlaya; kutani a lahliwa endlwini ya yena, emananga. 35Kavaloko hosi yi veka Benaya, n'wana Yehoyada, ematshan'weni ya Yowabu, enhlokweni ya nyimpi; kutani hosi yi veka Sadoki, muprista, ematshan'weni ya Abiyatara.
36Hosi yi rhuma leswaku va ya vitana Ximeyi, kutani yi ku eka yena: “Tiakele yindlu eYerusalema, u tshama eka yona, u nga humi kona ku ya kwihi ni kwihi. 37Kutaku siku u humaka, u pela xinambyana xa Kedroni, tiva swinene leswaku u ta fa kunene! Ngati ya wena yi ta va enhlokweni ya wena.” 38Ximeyi a ku eka hosi: “Rito leri, rinene; hilaha hosi, n'wini wanga, yi nga vula hakona, nandza wa wena u ta endlisa sweswo.” Kutani Ximeyi a tshama eYerusalema, masiku layo tala.
39Kuteloko ku hundzile malembe manharhu, malandza mambirhi ya Ximeyi ma tsutsumela eka Akixi, n'wana Maaka, hosi ya Gati; kutani va ya byela Ximeyi, va ku: “Waswivo, malandza ya wena ma le Gati.” 40Kavaloko Ximeyi a pfuka, a pana mbhongolo ya yena, a ya eGati, eka Akixi, ku lava malandza ya yena; sweswo Ximeyi a famba a vuyisa malandza ya yena hi le Gati.
41Va tivisa Solomoni leswaku Ximeyi u sukile eYerusalema, u ye eGati, a tlhela a vuya. 42Kavaloko hosi yi rhuma va ya vitana Ximeyi, yi ku eka yena: “Xana a ndzi ku hlambanyelanga hi Yehovha, a ndzi tiyisanga xana ndzi ku eka wena: ‘Tiva swinene leswaku siku u nga ta huma ku ya kwihi na kwihi u ta fa kunene’? Kutani u te eka mina: ‘Rito leri, rinene; ndzi swi twile.’ 43A ku hlayisanga ha yini ku hlambanya ka Yehovha ni ku lerisa loku ndzi ku vekeleke kona xana?” 44Kutani hosi yi ku eka Ximeyi: “Wa tiva ku biha hinkwako loku u ku endleleke Davhida, tata wa mina, mbilu ya wena ya swi tiva; Yehovha u wisele enhlokweni ya wena lunya ra wena; 45hosi Solomoni u ta katekisiwa, ni xiluvelo xa Davhida xi ta tiyisiwa emahlweni ka Yehovha hi masiku.” 46Kavaloko hosi yi lerisa Benaya, n'wana Yehoyada, a huma a ya dlaya Ximeyi; kutani a fa. Kutani vuhosi byi tiyisiwa emavokweni ya Solomoni.
