Risimu ra Hana.
1Kavaloko Hana a khongela, a ku:
“Mbilu yanga yi titsakela eka Yehovha.
Matimba ya mina ma tlakusiwa hi Yehovha,
Nomu wa mina wu tipfulele valala va mina;
Hikuva ndza titsakela eku hlayisekeni ka wena.
2“La kwetsimaka kukotisa Yehovha, a nga kona;
Hikuva a ku na Xikwembu ehandle ka wena;
A ku na Ribye lero tiya kukota Xikwembu xa hina.
3Mi nga ha tarisi marito ya n'wina ya ku tikurisa;
Ku tikukumuxa ku nga ha humi emilon'wini ya n'wina;
Hikuva Yehovha i Xikwembu lexi nga ni vutivi,
Hi yena la ringanisaka maendlelo ya vanhu.
4Vurha bya lava matimba byi tshoviwile,
Kambe lava tsaneke va tiboha hi matimba.
5Lava xurheke va tirhela vuswa,
Kambe lava tweke ndlala, va wisa;
Lowa mhika u veleka eka ntlhanu na kambirhi,
Kambe la nga ni vana lavo tala, u tshama ntsena.
6I Yehovha la lovisaka ni la hanyisaka,
Wa xikisa vanhu exivandleni xa vafi,
kutani a va humesa kona.
I Yehovha la endlisaka vusiwana ni ku fuwisa,
7Wa tsongahata, kambe wa tlakusa,
Wa humesa swisiwana entshurini,
8Wa pfuxa mupfumari ethyakeni,
Ku va tshamisa ni tihosi,
Ni ku va avela swiluvelo swa ntwalo.
Hikuva masungulo ya misava i ya Yehovha;
U tiyisile misava ehenhla ka wona.
9“Wa hlayisa mikondzo ya lava n'wi rhandzaka,
Kambe lavo biha va miyela emunyameni;
Hikuva munhu a nga ka a nga kurisiwi hi matimba.
10Valala va Yehovha va ta rhurhumela,
U ta va balesela hi rihati a ri etilweni.
Yehovha u ta avanyisa makumu
ya misava; U ta nyika ku fuma eka hosi ya yena,
U ta tlakusa rimhondzo ra Muhlawuriwa wa yena.”
11Elikana a tlhelela ekaya ka yena eRhama, kutani wandzisanyana a pfuna entirhweni wa Yehovha, emahlweni ka Heli, muprista.
Ta ku biha ka vana va Heli.
12Vana va Heli a va ri vana va Beliyali (lavo biha); a va nga tivi Yehovha. 13Mikhuva ya vaprista lava eka tiko a yi ri leyi: Loko munhu a humesa gandzelo, nandza wa muprista a fika loko va ri karhi va sweka nyama, a tamele evokweni ra yena foroko ya meno manharhu; 14kutani a tlhava embiteni, kumbe enkambaneni, kumbe ekhuwaneni, kumbe epotweni, kutani hinkwaswo leswi humesiwaka hi foroko, muprista a titekela swona. Va tshama va endlisa sweswo eka Vaisraele hinkwavo lava taka kona eXilo. 15Swi tsandza ni loko va nga si hisa mafurha, nandza wa muprista a a tshama a ta, a ku eka munhu la humesaka gandzelo: “Ndzi nyike nyama, ndzi yi oxela muprista, a nga ka a nga amukeli eka wena nyama leyi swekiweke, kambe a lava leyimbisi.” 16Kungakuloko munhu a n'wi hlamula a ku: “U ta teka leswi u swi rhandzaka loko va hisile mafurha,” muprista a a ku: “U ta ndzi nyika sweswi, loko swi nga ri tano, ndzi ta yi teka hi matimba.” 17Sweswo ku dyoha ka majaha lawa a ku ri lokukulu emahlweni ka Yehovha, hikuva a va sandza mihlengo ya Yehovha.
18Samiele a tshama a tirha ntirho emahlweni ka Yehovha, a ri wandzisanyana la ambaleke efodi ya ntsembyana. 19Mana wa yena a a n'wi rhungela xingubyana hi lembe rin'wana ni rin'wana, kutani a n'wi tisela xona loko a tlhandluka ni nuna wa yena ku humesa gandzelo ra lembe rin'wana ni rin'wana. 20Heli a katekisa Elikana ni nsati wa yena, a ku: “Yehovha a a ku kumise vana hi nsati loyi, ematshan'weni ya n'wana loyi a n'wi lombeke Yehovha.” Kavaloko va tlhelela eka rikwavo. 21Kuteloko Yehovha a endzele Hana, a tika nyimba, kutani a veleka vana vavanuna vanharhu ni vanhwanyana vambirhi. Kambe wandzisanyana Samiele a a kulela emahlweni ka Yehovha.
22Kambe Heli a a dyuhele ngopfu; kutani a twa hinkwaswo leswi vana va yena va swi endlaka eka Vaisraele hinkwavo, a twa ni leswaku va etlela ni vavasati lava hlengeletanaka enyangweni ya tabernakela ya nhlengeletano. 23Kutani a ku eka vona: “Xana mi endlela yini leswi xana? Hikuva ndzi twa timhaka leto biha ta n'wina hi tiko hinkwaro. 24A hi swona vana vanga; leswi ndzi swi yingisaka a swi lulamanga; mi dyohisa tiko ra Yehovha. 25Kungakuloko munhu a dyohele munhukulobye, Xikwembu xi ta n'wi avanyisa; kambe loko a dyohela Yehovha, i mani la nga ta n'wi khongelela?” Kambe a va yingisangi rito ra tata wa vona, hikuva Yehovha a a rhandza ku va lovisa.
26Loko a ri wandzisanyana Samiele, a kula, a tsakisa Yehovha ni vanhu.
27Kutani munhu wa Xikwembu a ta eka Heli, a ku eka yena: Yehovha a vula sweswo, a ku: “Xana a ndzi tikombisanga eka yindlu ya tata wa wena loko va ri eEgipta, endlwini ya Faro xana? 28Ndzi n'wi hlawurile xikarhi ka tinxaka hinkwato ta Israele leswaku a va muprista wa mina, ni ku gandzela ealitarini ya mina, ni ku hisa mirhi ya risuna, ni ku ambala efodi emahlweni ka mina; kambe ndzi nyikile yindlu ya tata wa wena magandzelo hinkwawo lama hisiwaka ya vana va Israele. 29Xana mi kandziyela yini hi milenge magandzelo ya mina ni mihlengo ya mina, leswi ndzi swi leriseke ku swi humesa endlwini ya mina-ke? U dzunisile vana va wena ku tlurisa mina, mi tinonisa hi swirhangana hinkwaswo swa Israele, tiko ra mina. 30Hikwalaho-ke Yehovha, Xikwembu xa Israele, u vula sweswo, a ku: ‘A ndzi vurile leswaku yindlu ya wena ni yindlu ya tata wa wena yi ta famba emahlweni ka mina hilaha ku nga heriki,’ kambe sweswi, Yehovha u vurisa, a ku: ‘A swi ve kule na mina! Hikuva ndzi ta dzunisa lava ndzi dzunisaka, kambe lava ndzi sandzaka va ta tsongahatiwa. 31Masiku ma ta, lawa ndzi nga ta tshova voko ra wena ni voko ra yindlu ya tata wa wena leswaku ku nga ha vi na wanuna la dyuhalaka endlwini ya wena. 32U ta vona nala endlwini ya mina, enkarhini lowu Israele a nga ta nyikiwa ku kateka hi Yehovha. A ku nga ha vi na munhu la dyuhaleke endlwini ya wena hi masiku. 33Ndzi ta tshika un'wana wa wena ekusuhi ni alitari ya mina, ku hisa mahlo ya wena ni ku dyisa moya wa wena mbitsi; kambe hinkwavo va yindlu ya wena va ta fa va nga si dyuhala. 34Xikombiso xa wena, hi leswi nga ta humelela eka vana vambirhi va wena, Hofini na Finiyasi: va ta fa havambirhi hi siku rin'we. 35Ndzi ta tivekela muprista la tshembekeke; u ta endla hi ku rhandza ka mbilu yanga ni moya wa mina, ndzi ta n'wi akisela yindlu leyi tiyeke, kutani u ta famba hilaha ku nga heriki emahlweni ka Muhlawuriwa wa mina. 36Kutani mani na mani la nga ta sala endlwini ya wena u ta ta n'wi khinsamela, leswaku a ta kuma malinyana ni xipandzwa xa vuswa, u ta ku: “Wa nga ndzi nghenisa entirhweni wun'wana wa vuprista, ndzi ta kuma vuswanyana, ndzi dya.” ’ ”
