Ta ku vitaniwa ka Samiele.
1Wandzisanyana Samiele a a tirhela Yehovha emahlweni ka Heli. Kambe rito ra Yehovha a ri kala emasikwini lawa; ni mahlori ma nga talanga. 2Rin'wana siku, loko Heli a etlele endlwini ya yena, kambe mahlo ya yena ma sungurile ku phumela, a nga ha voni, 3rivoningo ra Xikwembu loko ri nga si timeka, na yena Samiele a a etlela endlwini ya Yehovha, laha areka ya Xikwembu ingi yi ri kona; 4Yehovha a vitana Samiele. Yena a ku: “Hi mina loyi.” 5Kutani a tsutsuma, a ya eka Heli, a ku eka yena: “Hi mina loyi, hikuva u ndzi vitanile.” Heli a ku eka yena: “A ndzi ku vitananga; tlhela u ya etlela.” Kutani a ya etlela.
6Yehovha a vitana kambe Samiele; kutani Samiele a pfuka, a ya eka Heli, a ku eka yena: “Hi mina loyi, hikuva u ndzi vitanile.” Heli a ku eka yena: “A ndzi ku vitananga, n'wananga; famba u ya etlela.” 7A ku ri loko Samiele a a nga si tiva Yehovha, ni loko rito ra Yehovha ri nga si humelela eka yena.
8Yehovha a vitana kambe Samiele ra vunharhu. Kavaloko Samiele a pfuka, a ya eka Heli, a ku eka yena: “Hi mina loyi, hikuva u ndzi vitanile.” Heli a twisisa leswaku Yehovha a a vitana wandzisanyana. 9Kutani Heli a ku eka Samiele: “Famba u ya etlela. Kutakuloko u vitaniwa, u ta ku: ‘Vulavula, Yehovha, hikuva nandza wa wena wa yingisa.’ ” Kutani Samiele a famba a ya etlela endhawini ya yena.
10Kutani Yehovha a ta, a yima, a vitana kambe kukotisa eku sunguleni, a ku: “Samiele, Samiele!” Kutani Samiele a ku: “Vulavula, hikuva nandza wa wena wa yingisa.” 11Kavaloko Yehovha a ku eka Samiele: “Waswivo, ndzi ta endla eIsraeleni mhaka leyi; kutakuloko munhu a yi twa, tindleve ta yena ti ta pfuma. 12Hi siku lero ndzi ta hetisa henhla ka Heli hinkwaswo leswi ndzi swi vuleke hikwalaho ka yindlu ya yena; ndzi ta sungula, ndzi va ndzi heta. 13Ndzi n'wi byerile leswaku ndzi ta avanyisa yindlu ya yena hilaha ku nga heriki hikwalaho ka xidyoho lexi a xi tivaka. Hikuva vana va yena va tilavele ndzhukano ehenhla ka vona, kambe a nga va layanga. 14Hikwalaho ndzi hlambanyile ehenhla ka yindlu ya Heli leswaku ku dyoha ka yindlu ya Heli ku nga ka ku nga hlanguriwi, hambi hi magandzelo, hambi hi mihlengo hi masiku.”
15Samiele a etlela ku fika nimixo; kutani a pfula tinyangwa ta yindlu ya Yehovha; kambe Samiele a a chava ku ya byela Heli mahlori. 16Kambe Heli a vitana Samiele, a ku: “Samiele, n'wananga!” A ku: “Hi mina loyi.” 17Heli a ku: “Yehovha u ku byele rito rihi Xana? U nga ndzi fihleli nchumu. Xikwembu a xi ku endlise hi matimba ni ku engetela, loko u ndzi fihlela rito rin'we ra hinkwaswo leswi xi ku byeleke swona!” 18Kavaloko Samiele a n'wi byela hinkwaswo, a nga n'wi fihlelanga nchumu, Kutani Heli a ku: “Yehovha; a a endle hi ku twisisa ka yena.”
19Samiele a a kula, kutani Yehovha a a ri na yena; kambe a nga tshikanga rito rin'we ra marito hinkwawo ya yena ri wa ehansi. 20Kutani Vaisraele hinkwavo, ku suka eDani ku fika eBerexeba, va tiva leswaku Samiele a vekiwile muprofeta wa Yehovha. 21Yehovha a tshama a humelela eXilo; hikuva Yehovha a a tihlavutela eka Samiele eXilo, hi rito ra Yehovha.
Kutani rito ra Samiele ri tshama ri yisiwa eka Vaisraele hinkwavo.
