YEREMIYA 12

₁Wena Yehovha, u lulamile, ndzi nga tsandzeka ku kanetana na wena; hambiswiritano, ndzi ta tengisana na wena: Xana lavo biha va kateka ha yini, ni vakanganyisi hinkwavo va ni ku rhula ha yini-ke? ₂U va simekile va va va engetela timitsu, va mirile, kutani va vekile mihandzu; u kusuhi ni milomu ya vona, kambe u kule ni timbilu ta vona. ₃Kambe wena Yehovha, wa ndzi tiva, wa ndzi vona, kutani u ringa mbilu ya mina leswaku yi ri yini eka wena! Wa nga va koka tanihi tinyimpfu eku tlhaviweni kutani, u va hlawulela siku ra ku dlawa!

₄Misava yi ta rila ku ri kungani xana, ni byanyi bya masimu hinkwawo byi ta oma ku yisa kwihi xana? Hikwalaho ka ku biha ka vaaki va rona, swiharhi ni tinyanyana swi herile, hikuva va ri: “A nga ka a nga voni ku hela ka hina.” ₅“Swi tsandza ni loko u siyisanile ni va milenge, kutani va ku karhatile; xana u nga siyisananisa ku yini ni va tihanci? Ni loko u nga chavi nchumu etikweni ra ku rhula, Xana eswihlahleni swa Yordani u nga endla yini? ₆Hikuva loko va ri varikwenu ni va yindlu ya tata wa wena, va ku xisa, kutani, na vona, va ku dzumadzumela hi rito lerikulu; ni loko va ku byela marito ya ku nandziha, u nga tshuki u va pfumela.

₇“Ndzi sukerile yindlu ya mina, ndzi lahlile rifuwo ra mina; lexi rhandziwaka hi moya wa mina, ndzi xi nyiketile emavokweni ya lava nga valala eka xona. ₈Hikuva eka mina, ndzhaka ya mina yi kotisa nghala leyi nga exihlahleni, leyi ndzi dzumadzumelaka; ndzi yi vengile hakona. ₉Hikuva eka mina, ndzhaka ya mina i koti ra mavala! Makoti ma ri rhendzele. Tanani, mi hlengeleta swiharhi hinkwaswo swa tiko, swi ta eswakudyeni! ₁₀Varisi lavo tala va onhile nsimu ya mina ya vhinya, va kandziyerile masimu ya mina; nsimu ya mina leyi rhandzekaka, va yi endlile mananga layo biha. ₁₁Va yi onhile; yi rila emahlweni ka mina hikwalaho ka ku onha; tiko hinkwaro ri onhakile, hikuva a ku na munhu la ri anakanyaka embilwini ya yena. ₁₂Vaonhi va karhi va fika eswitsungeni hinkwaswo swa mananga, hikuva fumu ra Yehovha ri lovisa ku suka eku heteleleni hitlhelo rin'wana ra tiko, ku ya fika emakumu man'wana; a ku na nyama ni yin'we leyi nga ni ku rhula. ₁₃Va byarile koro, kutani va tshovele mitwa; va tikarhatile, kambe a va tshovelanga nchumu. Mi va ni tingana eku tshoveleni ka n'wina, hikwalaho ka ku kariha loku hisaka ka Yehovha.”

₁₄Ku vula Yehovha ehenhla ka hinkwavo lavo biha lava xaxameleke na mina, lava phangeke rifuwo ra mina, leri ingi ndzi ri averile tiko ra mina ra Israele: “Vonani ndzi ta va susa etikweni ra vona ni yindlu ya Yuda, ndzi ta yi pambula hi le xikarhi ka yona, ndzi yi susa. ₁₅Kambe kutakuloko ndzi va tsuvurile, ndzi ta tlhela ndzi va tsetselela; kutani ndzi ta va tlherisela un'wana ni un'wana endzhakeni ya yena, un'wana ni un'wana etikweni ra yena. ₁₆Kambe kungakuloko va dyondza swinene milawu ya tiko ra mina, leswaku va ta hlambanya hi vito ra mina, va ku: ‘Ha Yehovha la hanyaka,’ hi laha va dyondziseke tiko ra mina ku hlambanya ha Baali, ndzi ta va akisa xiharhi ka tiko ra mina. ₁₇Kambe kungakuloko va nga yingisi, tiko rero ndzi ta ri susa, ndzi ri tsuvula ndzi va ndzi ri herisa, ku vula Yehovha.”