YEREMIYA 13

₁Kutani ndzi byeriwa hi Yehovha, a ku: “Yana, u ya tixavela vamba ra ntsembyana, u tiboha xisuti ha rona, kambe u nga tshuki u ri peta ematini.” ₂Kutani ndzi ya tixavela vamba hi ku lerisa ka Yehovha, ndzi tiboha xisuti ha rona. ₃Kava laha rito ra Yehovha ri taka eka mina ra vumbirhi, ri ku: ₄“Teka vamba leri u ri xaveke, leri nga exisutini xa wena, kutani u suka, u ya eYufrata, u ya ri fihla kona ebakweni ra ribye.” ₅Kutani ndzi ya, ndzi ya ri fihla enambyeni wa Yufrata hilaha Yehovha a ndzi leriseke hakona. ₆Endzhaku ka masiku layo tala, Yehovha a ku eka mina: “Suka u ya eYufrata, u ya teka kona vamba leri ndzi nga ku lerisa leswaku u ri fihla kona.” ₇Kavaloko ndzi ya eYufrata, ndzi cela, ndzi teka vamba kwalaho ingi ndzi ri fihlile kona: Kutani maswivo, vamba a ri borile, a ri nga ha pfuni nchumu.

₈Kutani rito ra Yehovha ri ta eka mina, ri ku: ₉“Ku vula Yehovha, a ku: ‘Ndzi ta borisisa sweswo vumbhurhi bya Yuda, ni vumbhurhi lebyikulu bya Yerusalema. ₁₀Hikuva tiko leri ro homboloka leri alaka ku yingisa rito ra mina, leri tifambelaka hi ku navela ka mbilu ya rona, leri landzelaka swikwembu swa matiko man'wana ku swi tirhela ni ku swi khinsamela, ri ta hundzuka ri fana ni vamba leri nga pfuniki nchumu. ₁₁Hikuva kukotisa loko vamba ri namarhele xisuti xa munhu, a ndzi tinamarhetile yindlu hinkwayo ya Israele ni ya Yuda hinkwayo, ku vula Yehovha, leswaku ri va tiko ranga ni ku twala ka mina, ni ku dzuna ka mina, ni ku kwetsima ka mina. Kambe va arile ku yingisa.

₁₂“ ‘U engeta u va byela mhaka leyi: Ku vula Yehovha, Xikwembu xa Israele, a ku: “Mbita yin'wana ni yin'wana yi ta cheriwa vhinyo, yi tala.” ’ Kutani va ta ku eka wena: ‘Xana na hina a hi swi tivi leswaku mbita yin'wana ni yin'wana yi ta cheriwa vhinyo xana?’ ₁₃Loko swi ri tano, u nge eka vona: ‘Yehovha u ri: Vonani, vaaki hinkwavo va tiko leri, ni tihosi leti tshameke exiluvelweni xa Davhida, ni vaprista ni vaprofeta, ni vaaki hinkwavo va Yerusalema, ndzi ta va tata hi leswi pyopyisaka. ₁₄Kambe ndzi ta va faya un'wana ni un'wana ni warikwavo, vatatana swin'we ni vana,’ ku vula Yehovha. ‘Ndzi nga ka ndzi nga vi na musa, ni loko ku ri ku tsetselela, hambi ku ri ku va twela vusiwana, leswaku ndzi nga va lovisi.’ ”

₁₅Yingisani, mi rhiya tindleve: Mi nga tshuki mi tidzunisa, hikuva Yehovha u vurisile. ₁₆Dzunisani Yehovha, Xikwembu xa n'wina, a nga siki humesa munyama, ni milenge ya n'wina yi nga siki khunguvanyeka etintshaveni ta vusiku, ni loko a nga siki hundzula ku vonakala kuloku mi ku languteleke, ndzhuti wa rifu ni ku humesa ntima. ₁₇Kungakuloko mi nga yingisi sweswo, mbilu ya mina yi ta rila exihundleni hikwalaho ka ku tikukumuxa ka n'wina, mahlo ya mina ma ta rila, ma va ma rila ma halata mihloti, hikuva ntlhambi wa Yehovha wa yisiwa evukhumbini.

₁₈Byela hosi ni nkosikazi, u ku: “Titsongahateni, mi tshamisa ehansi hikuva harhi ya vuhosi ya ku kwetsima ka n'wina yi wile etinhlokweni ta n'wina.” ₁₉Miti ya tlhelo ra dzonga yi pfariwile, kutani a ku na la nga yi pfulaka; va Yuda hinkwavo va yisiwile evukhumbini, va yisiwile hinkwavo eku bohiweni. ₂₀“Yimisa mahlo ya wena, u languta lava humaka en'walungwini! Wu kwihi ntlhambi lowu ngi u wu nyikiwile, ntlhambi wa ku twala ka wena?

₂₁“U ta ku yini, siku ku vekiwaka ehenhla ka wena ku ku fuma, lava u va toloveteke rirhandzu ra wena xana? Xana u nga ka u nga khomiwi hi ku vaviseka, kukotisa wansati la velekaka-ke? ₂₂Loko u nga tivula embilwini ya wena, u ku: ‘Xana swilo leswi swi ndzi humelela hikwalaho ka yini?’ Ndzi ku: Hikwalaho ka ku biha ka wena lokukulu, matlhelo ya nguvu ya wena ma tlakusiwile, ni swirhendze swa wena swi biwile hi matimba.

₂₃“Xana Muetiyopiya a nga tihundzula nhlonge ya yena, kumbe yingwe yi nga tihundzula mavala ya yona-ke? Loko swi ri tano, mi nga swi tiva ku endla swinene, n'wina lava mi titoloveteke ku endla leswo biha. ₂₄Kambe ndzi ta va hangalasa kukotisa mungu lowu hahisiwaka hi moya wa mananga. ₂₅Hi kona ku averiwa ka wena, i nyiko leyi ndzi ku ringaniseleke yona, ku vula Yehovha hikuva u ndzi rivele, kutani u titshembele mavunwa. ₂₆Kutani mina ndzi ta ku tlakusela swiambalo ku fika emombyeni wa wena, leswaku ku voniwa tingana ta wena. ₂₇Ndzi vonile vuoswi bya wena, ni ku navela ka wena lokukulu, ni vugangu bya wena lebyi tlurisaka, ni manyala ya wena etintshaveni, ni le switsungeni! ₂₈Yo! Wena Yerusalema, xana u nga ka u nga basisiwi ku yisa kwihi xana?”