MATEWU 28

₁Eku heteleleni ka Savata, hi siku ro sungula ra vhiki, loko ri tsuvuka, Mariya wa Magadala, na Mariya lo un'wana va ya languta sirha. ₂Kutani ku tsekatseka lokukulu ka misava ku va kona, hikuva ntsumi ya Hosi a yi xikile hi le tilweni, yi ta vumbuluxa ribye enyangweni ya sirha, yi tshamisa ehenhla ka rona. ₃Mombo wa yona a wu kotisa rihati, ni tinguvu ta yona a ti ri leto basa kukotisa gamboko. ₄Kutani valanguteri va rhurhumela hi ku chava, va hundzuka swa nga hi vafi. ₅Ntsumi yi vulavula yi ku eka vavasati: “Loko mi ri n'wina mi nga chaveni, hikuva ndza swi tiva leswaku mi lava Yesu loyi ngi a vambiwile; ₆a nga kona la, hikuva u pfukile hilaha a tshameke a mi byela. Tanani mi ta vona byetlelo bya yena, ₇mi ta hatlisa mi ya byela vadyondzisiwa va yena leswaku u pfukile eku feni; kutani maswivo, u ta mi rhangela emahlweni eGaleliya, mi ta n'wi vona kona; hi sweswo, ndzi mi byerile.” ₈Kutani va hatlisa va huma esirheni hi ku chava ni ku tsaka lokukulu, va tsutsuma va ya byela vadyondzisiwa va yena. ₉Va ko va ha ya va byela, va vona Yesu a va hlangaveta, a ku: “Avuxeni!” Kutani va tshinela, va khoma milenge ya yena, va n'wi khinsamela. ₁₀Yesu a ku eka vona: “Mi nga chaveni, yanani, mi ya byela vamakwerhu leswaku va ya eGaleliya, hi kona va nga ta ndzi vona.”

₁₁Kuteloko va sukile, valanguteri van'wana va ya emutini, va ya byela vaprista lavakulu hinkwaswo leswi humeleleke. ₁₂Kuteloko vaprista va hlengeletanile ni vakulukumba, va kanela makungu, va nyika masocha mali leyo tala, va ku: ₁₃“Mi nge: ‘Vadyondzisiwa va yena va tile nivusiku, va n'wi yiva hi etlele.’ ₁₄Kutani, hambi hosi yi twa mhaka yoleyo hina hi ta yi khorwisa, hi mi sirheleta.” ₁₅Valanguteri va teka mali, va endla hilaha va lerisiweke hakona; kutani mhaka yoleyo yi twakarile exikarhi ka Vayuda ni namuntlha.

₁₆Kutani vadyondzisiwa lava khume na un'we va ya eGaleliya, entshaveni leyi va yi lerisiweke hi Yesu. ₁₇Kuteloko va n'wi vonile va n'wi khinsamela, kambe van'wana va vilela. ₁₈Kutani Yesu a va tshinelela a vulavula na vona, a ku: “Ndzi nyikiwile vuhosi hinkwabyo etilweni ni le misaveni; ₁₉yanani hakona mi ya dyondzisa va matiko hinkwawo, mi va khuvula hi vito ra Tatana, ni ra N'wana ni ra Moya lowo Kwetsima, ₂₀mi va dyondzisa ku hlayisa hinkwaswo leswi ndzi mi leriseke swona; kutani vonani, ndzi na n'wina hi masiku hinkwawo, ku ko ku hela misava.”