Ta ku tisola ka tiko.
1Yo mina! Ndzi kotisa nsimu loko ku tshoveriwe mihandzu ya yona, ni nsimu ya tivhinya leyi nkun'hurisiweke; a ka ha ri na xidzumba xa vhinya lexi nga dyiwaka, ni swingana swa nkuwa leswi rhandziwaka hi moya wa mina. 2Munhu lonene u lovile emisaveni, a ka ha ri na la lulameke exikarhi ka vanhu. Hinkwavo va bvutama ku halata ngati, un'wana ni un'wana u rhiyile makwavo hi ntlhamu. 3Va nghenile ha mavoko mambirhi eku biheni, leswaku va ku hetisa: Hosi ya kombela, muavanyisi wa avanyisa ku kuma hakelo, lonkulukumba, yena, u vulavula ku anakanya loku biha ka moya wa yena, va pfilunganya timhaka. 4La tlulaka van'wana hi vunene u kotisa xigatlu, ni loyi a va tlulaka hi ku lulama u fana ni xihlahla xa mitwa. Ku biwa ka wena ku ta humelela hi siku leri vuriwaka hi malandza ya wena, hikwalaho va ta khomiwa hi tingana. 5Mi nga tshembeni vanakuloni, mi nga tixisi hi munghana; hiteka etinyangweni ta nomu wa wena emahlweni ka loyi a etleleke exifuveni xa wena. 6Hikuva n'wana u xandzuka tata wa yena, ni n'wana wa xisati u pfukela mana wa yena, ni n'wingi u pfukela n'wingikulobye. Va yindlu ya munhu, hi vona va nga valala eka yena.
7Loko ndzi ri mina, ndzi ta languta eka Yehovha, ndzi languta eka Xikwembu xa ku hlayiseka ka mina: Xikwembu xa mina xi ta ndzi yingisa! 8U nga tshuki u tsakela khombo ra mina, wena u nga nala eka mina! Hikuva hambi ndzi wile, ndzi ta tlhela ndzi yima; ni loko ndzi tshamile emunyameni, Yehovha i ku vonakala ka mina. 9Ndzi ta rhwala ku kariha ka Yehovha, hikuva ndzi n'wi dyoherile, leswaku a ta ndzi pfuna emitengweni ya mina, kutani a ndzi avanyisela. U ta ndzi humesela eku vonakaleni, kutani ndzi ta hlalela ku lulama ka yena. 10Loyi a nga nala wa mina u ta swi vona, kutani u ta khomiwa hi tingana, loyi a nge eka mina: “Yehovha, Xikwembu xa wena, xi kwihi xana?” Mahlo ya mina ma ta khorwisiwa hi khombo ra yena; kutani u ta kandziyeriwa ku fana ni ndzhope wa tindlela!
11Hi siku ra ku akiwa ka rirhangu ra wena, esikwini lero, ndzilakana wa wena wu ta tshinetiwa ekule. 12Enkarhini lowo ku ta ta eka wena, lava pfaka Asiriya ku ya fika emitini ya Egipta, ni ku suka eEgipta ku yisa enambyeni, ku suka elwandle rin'wana ku ya fika elwandle rin'wana, ni ku suka entshaveni yin'wana ku ya fika entshaveni yin'wana. 13Kambe tiko ri ta onhaka hikwalaho ka vaaki va rona, ni hikwalaho ka mihandzu ya mitirho ya vona.
Tintswalo ta Yehovha.
14Risa hi nhonga tiko ra wena, ti nga tinyimpfu ta ndzhaka ya wena, leti tshameke ti ri toxe exihlahleni lexi nga exikarhi ka Karmele; a ti humele eBaxani ni le Giliyadi, kukotisa masiku ya khale. 15Ndzi ta ku kombisa swihlamariso ku kota siku u humeke etikweni ra Egipta. 16Matiko ma ta swi vona, ma ta khomiwa hi tingana hi matimba ya wona; ma ta tikhoma nomu hi voko, ma sivana tindleve. 17Ma ta dya ntshuri ku fana ni nyoka ni swikokovi swa misava; ma ta huma emakhokholweni ya wona ma tshukile; ma chavela eka Yehovha, Xikwembu xa hina, hi ku rhurhumela, kutani ma ta ku chava.
18Hi xihi Xikwembu lexi fanaka na wena, lexi susaka ku homboloka, lexi khomelaka ku dyoha ka xisalela xa ndzhaka ya xona? A xi nga hlayisi ku kariha ka xona hi masiku, hikuva xi tsakela ku tsetselela. 19Xi ta tlhela xi hi tsetselela, xi kandziyela ku dyoha ka hina, u ta hoxela swidyoho hinkwaswo swa hina eswidziveni swa lwandle. 20U ta kombisa Yakobo vunene, na Abrahama tintswalo leti u nga ti hlayela vatatana hi ku hlambanya ka ha ri emikarhini ya khale.
