SWIVURISO 17

₁Swikoko ntsena, laha ku nga ni ku rhula,

Swi tlula hi ku nandziha yindlu leyi teleke hi tinyama, laha timholovo ti nga kona.

₂Nandza wa vutlhari u ta fuma n'wana la khomisaka tingana,

U ta dya ndzhaka ni vana va hosi ya yena.

₃Xirhengele i xa ntsopfu ni swa nsuku,

Kambe la ringetaka timbilu, i Yehovha.

₄La endlaka swo biha u yingisela milomu yo biha,

Ni muhembi u yingisela ririmi ro hleva.

₅La hlekaka xisiwana u sola la n'wi vumbeke,

Ni la tsakelaka makhombo ya van'wana a nga ka a nga poni eku biweni.

₆Vatukulu i xidlodlo xa lava dyuhaleke,

Ku twala ka vana ku huma eka vatata wa vona.

₇Marito yo saseka ya ku tikurisa a ma lulameli xihunguki,

Ngopfu marito ya vunwa ma tshuna nkulukumba.

₈Tinyiko i ribye ra risima eka loyi a ti nyikaka.

Hinkwako laha a nghenaka kona wa dzuneka.

₉La nga fihla milandzu u lava rirhandzu;

La yi pfuxaka u nghenisa ku hambana exikarhi ka lava rhandzanaka.

₁₀Munhu wa ku anakanya u twa ku tshinyiwa

Ku tlula xihunguki loko xi biwa ka dzana.

₁₁Munhu wa lunya u ni ximonyo,

Kambe u ta rhumeriwa ntsumi ya tihanyi.

₁₂Ku hlangana ni bere leyi tekeriweke vana va yona,

Ku tlula ku hlangana ni xihunguki eku hlanyeni ka xona.

₁₃Ku biha ku nga ka ku nga suki endlwini ya munhu

La tlheriselaka swo saseka hi ku biha.

₁₄Ku sungula ku hambana, i ku boxa ka ndhambi;

Hikwalaho, loko mholovo yi nga si sungula, suka.

₁₅La yimelelaka la nga ni nandzu,

ni la kanetaka la nga riki na nandzu,

Ha vambirhi i manyala eka Yehovha.

₁₆Mali yi pfuna yini evokweni ra xihunguki-ke?

Xana i ku xava vutlhari-ke?

Kambe xi pfumala mbilu.

₁₇Munghana wa munhu wa n'wi rhandza hi masiku;

I makwavo emakhombyeni.

₁₈La nga riki na ku anakanya, hi la khomanaka ni un'wana hi mavoko,

A tiboha hi nandzu wa warikwavo.

₁₉La rhandzaka timholovo u rhandza xidyoho,

La kurisaka nyangwa ya yena u lava ku lova.

₂₀Wa mbilu yo soholoka a nga ka a nga kumi ku kateka,

Ni wa ririmi ro soholoka u ta wela eku biheni.

₂₁La velekaka xihunguki u ta fuwa tingana,

Ni tata wa singe a nga ka a nga tsaki.

₂₂Mbilu leyi tsakeke i murhi lowu tiyisaka,

Kasi moya lowu dyaka mbitsi wu omisa marhambu.

₂₃Lowo biha u amukela nyiko leyi fihliweke etingubyini

Ku voyamisa tindlela to lulama.

₂₄Wa ku anakanya u langutisisa vutlhari emahlweni ka yena,

Kambe mahlo ya xihunguki ma rhalarhala emakumu ya misava.

₂₅Xihunguki xa n'wana u khomisa tata wa yena tingana,

U dyisa mbitsi la n'wi velekeke.

₂₆Ku rihisa munhu la pfumalaka nandzu a swi saseki,

Hambi ku ri ku ba lavakulu hikwalaho ka ku lulama ka vona.

₂₇La tikhomaka emaritweni u tiva ku tlhariha,

La tisivaka nomu u ni ku twisisa.

₂₈Swi tsandza ni rihuhu loko ri miyela, ri nga vuriwa la tlhariheke,

Ni la putsamaka nomu i munhu wa ku anakanya.