SWIVURISO 16

₁Makungu ya mbilu i ya munhu;

Loko ku ri ku hlamula ka ririmi ku huma eka Yehovha.

₂Mikhuva hinkwayo ya munhu yi lulamile emahlweni ka yena,

Kambe Yehovha u pima mimoya.

₃Nyiketa Yehovha timhaka ta wena hinkwato,

Kutani makungu ya wena ma ta tiya.

₄Yehovha u lerisile swilo hinkwaswo emakungwini ya yena,

Na yena lowo biha, u endleriwe siku ra khombo.

₅Munhu un'wana ni un'wana la tikurisaka hi mbilu, i manyala eka Yehovha;

Kunene u ta biwa, a nga ka a nga poni.

₆Ku dyoha ku funengetiwa hi tintswalo ni ntiyiso,

Hi ku chava Yehovha, vanhu va fularhela swo biha.

₇Yehovha loko a tsakisiwa hi ku famba ka munhu,

U twananisa na yena hambi va ri valala va yena.

₈Rifuwo leri tsanana leri nga ni ku lulama,

Ri tlula ku bindzula ka xuma xo tala lexo homboloka.

₉Mbilu ya munhu yi tikanelela ndlela;

Kambe i Yehovha la lulamisaka mikondzo ya yena.

₁₀Ku bvumbha ku le milon'wini ya hosi;

Nomu wa yona a wu hoxi eku avanyiseni ka timhaka.

₁₁Mpimo ni xikalo lexo lulama i swa Yehovha,

Hinkwawo maribye ya ku pima lama nga enkwameni, i ntirho wa yena.

₁₂I manyala eka tihosi ku endla leswi nga lulamangiki,

Hikuva xitshamo xa vuhosi xi tiyisiwa hi ku lulama.

₁₃Hosi yi tsakisiwa hi milomu leyinene,

Yi rhandza lava vulavulaka leswo lulama.

₁₄Ku hlundzuka ka hosi ku kota ntsumi ya rifu,

Kambe munhu wa vutlhari u ta yi rheleta mbilu.

₁₅Eku vonakaleni ka mombo wa hosi ku ni vutomi,

Rirhandzu ra yena i papa leri nisaka mpfula ya le ndzhaku.

₁₆Ku fuwa vutlhari, ku tlula nsuku,

Ni ku fuwa ku twisisa ku tlula silivhere.

₁₇Gondzo ra lavo lulama, i ku fularhela swo biha,

La hlayisaka moya wa yena u xiya mafambele ya yena.

₁₈Ku tikurisa ku rhangela ku lova,

Ku tidzunisa ku rhangela ku wa.

₁₉Ku tsongahatiwa ni lavatsongo,

Ku tlula ku avelana xuma ni lava tikurisaka.

₂₀La anakanyaka etimhakeni u ta vona vunene,

Ni loyi a tshembaka Yehovha u katekile.

₂₁Wa mbilu yo tlhariha u vuriwa la twisisaka,

Nomu wa yena wa nandziha, wu tatisa ku tiva.

₂₂Ku twisisa i xihlovo xa vutomi eka lava ku fuweke,

Kambe swihunguki swi layiwa hi vuphukuphuku.

₂₃Mbilu ya la tlhariheke yi tlharihisa nomu wa yena,

U tiyisa tidyondzo hi ku vulavula ka yena.

₂₄Marito yo saseka i xihlenga xa vulombe,

Ma tsakisa moya, ma hanyisa marhambu.

₂₅Ndlela yi kona leyi vonekaka eka munhu ingi yi lulamile,

Kasi makumu ya yona, ma yisa eku feni.

₂₆La tirhaka hi mavoko wa titirhela,

Hikuva u susumetiwa hi ku dya.

₂₇Munhu wa lunya u cela khele ra khombo,

Kutani nomu wa yena wu ni langavi ro hisa.

₂₈Munhu wa lunya u byala timholovo,

Muhlevi u hambanyisa vanakulobye.

₂₉Munhu wa nsele u boha loyi a fambaka na yena,

A n'wi kokela endleleni leyo biha.

₃₀La tshunyetaka hi mahlo ku kanela swa lunya,

Ni la putsamaka nomu, va endlile leswo biha.

₃₁Misisi ya timpfu i harhi ya xichavo,

Yi kumeka endleleni ya ku lulama.

₃₂La hlwelaka ku kariha u tlula nhenha,

Ni la hlulaka mbilu ya yena u tlula la tekaka miti.

₃₃Va hoxa vuhlolotwana engubyeni,

Kambe lexi vuriwaka hi byona xi huma eka Yehovha.