1Ku hlamula lokunene ka rheleta vukari,
Kambe ku vulavula loku tlhavaka ku pfuxa timholovo.
2Nomu wa lavo tlhariha wu nandzihisa ku tiva,
Kambe nomu wa swihunguki wa humesa vuhunguki.
3Mahlo ya Yehovha ma languta hinkwako,
Ma xiya lavo biha ni lavo lulama.
4Nomu wa ku olova i murhi wa vutomi,
Loko wu ri wo homboloka wu soholota moya.
5Xihunguki xi monya dyondzo ya tata wa xona,
Kambe la yingiselaka ku layiwa wa tlhariha.
6Endlwini ya la lulameke ku ni xuma lexo tala,
Kambe rifuwo ra lowo biha i ku kanakana.
7Milomu ya lavo tlhariha yi hlwanya vutivi,
Kambe mbilu ya lavo hunguka a yi lulamanga.
8Magandzelo ya lavo biha i manyala eka Yehovha,
Kambe u tsakisiwa hi xikhongelo xa vanhu vo lulama.
9Ndlela ya lowo biha i manyala eka Yehovha,
Kambe u rhandza la landzelaka ku lulama.
10Ku laya ku vavisa la hambukeke ndlela;
La vengaka ku tshinyiwa u ta lova.
11Xivandla xa vafi ni xidziva swi le mahlweni ka Yehovha;
Ngopfungopfu timbilu ta vana va vanhu!
12Musandzi a nga rhandzi ku tshinyiwa A nga hlangani ni lavo tlhariha.
13Mbilu leyi tsakeke yi basisa mombo,
Kambe moya wo tshoveka, i ku vava ka mbilu.
14Mbilu ya munhu wo tlhariha yi lava vutivi,
Kambe milomu ya swihunguki yi dya vuhunguki.
15Eka munhu wa nhlomulo, masiku ma bihile hinkwawo;
Kambe mbilu leyi tsakeke i nkhuvo wa masiku.
16Rifuwonyana leri nga ni ku chava Yehovha,
Ri tlurisa rifuwo lerikulu leri nga ni mikarhateko.
17Ku dya matsavu ntsena laha ku nga ni rirhandzu,
Ku tlula homu ya ku nona laha ku nga ni ku vengana.
18Munhu la karihaka u pfuxa ku hambana;
Kambe la hlwelaka ku hlundzuka u tima timholovo.
19Ndlela ya lolo i rihlampfu ra mitwa,
Kambe ndlela ya lavo lulama i ntila lowu khuriweke.
20N'wana la yingisaka u tsakisa tata wa yena,
Kambe xihunguki xi dyisa mana wa xona mbitsi.
21Vuhunguki i ku tsaka ka la pfumalaka ku twisisa,
Kambe munhu wa ku anakanya u famba hi ku lulama.
22Laha ku tsundzuxana ku nga hava, makungu ma hangalaka,
Kambe ma tiya hi ku kanela ka lavo tala.
23Munhu u kuma ku tsaka hi ku hlamula ka nomu wa yena,
Kutani rito leri humesiwaka hi nkarhi lowu fanekelaka ra nandziha swonghasi!
24Eka munhu lonene, ndlela ya vutomi yi tlhandlukela ehenhla,
Yi n'wi tingawukisa xivandla xa vafi ehansi.
25Yehovha u mbundzuxa yindlu ya lava tikurisaka,
Kambe u tiyisa ndzilakana ya nsimu ya noni.
26Meehleketo leyo biha i manyala eka Yehovha,
Kambe marito lamanene ma tengile emahlweni ka yena.
27La navelaka bindzu ra ku phanga u karhata yindlu ya yena,
Kambe la vengaka tinyiko u ta hanya.
28Mbilu ya la lulameke yi anakanya a nga si hlamula,
Kambe milomu ya lavo biha yi humesa swo biha!
29Yehovha u tshama ekule ni lavo biha,
Kambe u yingisa mikhongelo ya lavo lulama.
30Leswi tsakisaka mahlo swi tsakisa mbilu,
Ku byeriwa swo nandziha ku tiyisa marhambu.
31Ndleve leyi yingisaka ku layiwa loku yisaka evutomini,
Yi ta tshama exikarhi ka lavo tlhariha.
32La alaka ku layiwa u sola moya wa yena,
Kambe la yingiselaka ku tshinyiwa u fuwa vutlhari.
33Xichavo xa Yehovha i xikolo xa va vutlhari,
Ku titsongahata ku rhangela ku dzunisiwa.
