1Wansati la tlhariheke u aka yindlu ya yena,
Kambe wa mihoni wa yi hahlula hi mavoko ya yena.
2La fambaka hi ku lulama u chava Yehovha,
Kambe la homboloxaka tindlela ta yena wa n'wi tsan'wa.
3Enon'wini wa xihunguki ku ni nkhavi wa ku ba ku tikukumuxa ka xona,
Kambe milomu ya lavo tlhariha ya va hlayisa.
4Laha tihomu ku nga hava, na rona tshanga ri omile,
Kambe matimba ya tihavi ma engetela rifuwo.
5Mbhoni yo tshembeka a yi vulavuri vunwa,
Kambe mbhoni yo hemba yi vula mavunwa ntsena.
6Musandzi u lava vutlhari, kambe a nga byi kumi,
Kasi mano ma kumeka hi ku olova hi lava nga ni ku twisisa.
7Hambana ni xihunguki,
Hikuva a ku na vutivi emilon'wini ya xona.
8Vutlhari bya la tlhariheke, i ku twisisa ndlela ya yena,
Kambe vuhunguki bya xihunguki ku xisa ntsena.
9Swihunguki swi sandza milandzu,
Kambe eka lavo lulama ku tsakisa ku kona.
10Mbilu yi titivela ku vava ka yona,
Ni ku tsakisisa ka yona ku nga ka ku nga kumiwi hi un'wana.
11Yindlu ya lavo biha yi ta handziwa,
Kambe xitsongana xa lavo lulama xi ta tiya.
12Ndlela yi kona leyi vonekaka eka munhu ingi yi lulamile,
Kasi makumu ya yona ma yisa eku feni.
13Munhu a nga hleka a ri karhi a vaviseka embilwini,
Kasi makumu ya ku tsaka i tingana.
14Wa mbilu leyi tidyelelaka u ta phiriwa hi mikhuva ya yena,
Kambe la lulameke u ta xurha hi leswi nga embilwini ya yena.
15Murivali u pfumelela marito hinkwawo,
Kambe la nga ni ku anakanya u xiya laha a kandziyaka kona.
16La tlhariheke u ni xichavo, kutani u papalata swo biha,
Kambe xihunguki xi honisa ntsena, xi titshemba.
17Munhu la angwetlaka ku kariha u endla swo hunguka,
Wa timhaka ta lunya wa vengiwa.
18Ndzhaka ya varivali i ku rivala,
Kambe va ku anakanya va tirhwexa harhi ya vutivi.
19Lavo biha va korhamela emahlweni ka lavanene,
Ni va mona etinyangweni ta lavo lulama.
20Xisiwana xi vengiwa ni hi la vandzamaneke na xona,
Kambe vanakulobye va mufuwi va tele.
21La sandzaka warikwavo wa dyoha,
Kambe ku katekile munhu la nga ni vunene eka xisiwana.
22Lava kanelaka swo biha a va lahleki xana?
Kambe leswinene ni ntiyiso i swa lava kanelaka vunene.
23Ntirho wun'wana ni wun'wana wu ni hakelo,
Kambe ku vulavula ka milomu ku helela endlaleni.
24Rifuwo ra lavo tlhariha i harhi ya vuhosi ya vona,
Loko byi ri vuhunguki bya xihunguki i vuhunguki ntsena.
25Mbhoni leyinene yi lamulela mimoya ya vanhu,
Loko yi ri leya vunwa yi phyaphyarha mavunwa ntsena.
26Exichabyeni xa Yehovha ku ni ku tshemba ka xiviri,
Kutani eka vana va yena i xichavelo.
27Ku chava Yehovha i xihlovo xa vutomi
Ku tingawurisa vanhu emakheleni ya rifu.
28Ku twala ka hosi i ku tala ka vanhu,
Kambe ku pfumaleka ka vanhu i ku onhaka ka n'wana wa hosi.
29La hlwelaka ku kariha u ni ku anakanya lokukulu,
Kambe wa mbilu ya tihanyi, u tshovela vuhunguki.
30Ku tsaka ka miri i mbilu leyo basa,
Kambe mona i ku bola ka marhambu.
31La xanisaka xisiwana u sandza muendli wa xona,
Kambe la nga ni vunene eka xisiwana, wa n'wi dzunisa.
32Mudyohi u wisiwa hi ku dyoha ka yena,
Kambe la lulameka u ni ku tshemba ni le ku feni ka yena.
33Vutlhari byi akile embilwini ya munhu wa ku anakanya,
Kambe miehleketo ya swihunguki ya tiviwa.
34Ku lulama ku kurisa tiko,
Kambe ku homboloka i xisandzu xa matiko.
35Nandza wo tlhariha u dzuneka eka hosi,
Kambe yi venga loyi a khomisaka tingana.
