TIPISALEMA 33

₁Tsakelani Yehovha, n'wina lava lulameke!

Ku vonga ku fanele vanhu va ku lulama.

₂Twarisani Yehovha hi haripa,

N'wi yimbeleleni hi timbila ta khume ra tingoti.

₃Yimbelelani yena risimu lerintshwa!

Mi pfumisa timbila ni marito ya n'wina!

₄Hikuva rito ra Yehovha ri lulamile,

Ni mitirho hinkwayo ya yena yi tshembekile;

₅U rhandza ku lulama ni ku tenga;

Misava yi tele hi vunene bya Yehovha.

₆Matilo ma endliwile hi rito ra Yehovha,

Ni vandla hinkwaro ra wona hi ku hefemula ka nomu wa yena.

₇A hlengeleta mati ya lwandle ma endla nhulu,

A veka swidziva evuhlayiselweni.

₈Misava hinkwayo a yi chave Yehovha!

Vaaki hinkwavo va misava a va rhurhumele emahlweni ka yena!

₉Hikuva wa vula, kutani xilo xi kona;

Wa lerisa, kutani swi humelela.

₁₀Yehovha u onha makungu ya vamatiko;

Wa endla mianakanyo ya matiko swahava.

₁₁Makungu ya Yehovha ma tiyile hi laha ku nga heriki;

Mianakanyo ya mbilu ya yena yi yima etinxakeni hinkwato.

₁₂Ku katekile tiko leri Yehovha a nga Xikwembu xa rona!

Ni vanhu lava a tihlawuleleke ku va ndzhaka ya vona!

₁₃Yehovha u languta a ri ematilweni,

U vona vana hinkwavo va vanhu.

₁₄Endhawini leyi a akeke eka yona,

U languta vaaki hinkwavo va misava;

₁₅Hi yena la vumbeke timbilu ta vona hinkwavo,

La anakanyaka ku endla hinkwako ka vona.

₁₆Hosi a yi ponisiwi hi nyimpi leyikulu,

Nhenha a yi tshunxiwi hi matimba lamakulu

₁₇Hanci ya hluleka ku ponisa,

Munhu a nga hlayisiwi hi matimba hinkwawo ya yona.

₁₈Vonani, mahlo ya Yehovha ma le henhla ka lava n'wi chavaka,

Ehenhla ka lava tshembaka vunene bya yena,

₁₉Ku tshunxa mimoya ya vona eku feni,

Ni ku va hanyisa enkarhini wa ndlala.

₂₀Mimoya ya hina yi titshembele Yehovha;

U mupfuni wa hina ni switlhangu swa hina.

₂₁Hikuva timbilu ta hina ti n'wi tsakerile,

Hikuva hi tshembile vito ra yena lero kwetsima.

₂₂Oho Yehovha! Tintswalo ta wena a ti ve ehenhla ka hina,

Kukotisa leswi hi ku languteleke!