Matilo lamantshwa ni misava leyintshwa.
1Kutani ndzi vona tilo lerintshwa ni misava leyintshwa; hikuva tilo lero sungula ni misava leyo sungula a swi hundzile, ni lwandle a ri nga ha ri kona.
2Ndzi vona ni muti lowo kwetsima, Yerusalema lowuntshwa, lowu xikaka hi le tilweni eka Xikwembu, wu tilunghisile kukota mutekiwa la tibombiseleke nuna wa yena. 3Kutani ndzi twa rito lerikulu ri huma exiluvelweni, ri ku: “Vonani tabernakela ya Xikwembu exikarhi ka vanhu; xi ta aka na vona, ri ta va tiko ra xona, kutani Xikwembu xi ta va na vona hi xiviri xa xona, xi va Xikwembu xa vona. 4Xikwembu xi ta hlangula mihloti hinkwayo emahlweni ya vona, kutani rifu a ri nga ha vi kona, a ku nga ha vi na nkosi, hambi ku ri ku kolola, kumbe ku vaviseka, hikuva leswo sungula swi hundzile.”
5Kutani la tshamiseke exiluvelweni a ku: “Vonani; hinkwaswo ndzi swi endla leswintshwa.” A ku eka mina: “Tsala, hikuva marito lawa, ma tiyile, i ya ntiyiso.” 6A engeta a ku eka mina: “Swi herile! Hi mina Alfa na Omega, ku sungula ni ku hela. Loyi a nga ni torha, ndzi ta n'wi nyika ntsena mati ya xihlovo xa vutomi. 7Loyi a nga ta hlula, u ta dya ndzhaka ya swoleswo; ndzi ta va Xikwembu xa yena, yena a va n'wananga. 8Kambe loko ma ri matoya, ni lava nga pfumelangiki, ni va manyala, ni vadlayi, ni vaoswi, ni vangoma va mavunwa, ni lava khongelaka swifaniso swa swikwembu, ni vahembi hinkwavo, ku averiwa ka vona ku le tiveni leri pfurhaka ra ndzilo ni xivavula; laha, i rifu ra vumbirhi.”
Yerusalema lowuntshwa.
9Kutani ntsumi yin'wana ya leta ntlhanu na timbirhi leti tameleke swimbitana swa ntlhanu na swimbirhi, leswi teleke makhombo ya ntlhanu na mambirhi ya ku hetelela, yi ta yi vulavula na mina, yi ku: “Tana, ndzi ta ku kombisa mutekiwa, la nga nsati wa Xinyimpfana.” 10Kutani yi ndzi yisa hi moya entshaveni leyikulu, leyo leha, yi ndzi kombisa muti lowo kwetsima, Yerusalema, lowu xikaka hi le tilweni eka Xikwembu, wu ri ni ku kwetsima ka Xikwembu; rivoningo ra wona ri fana ni ribye ra nkoka lowukulu, kukotisa ribye ra yaspere, leri vonikelaka kukota kristala. 11Wu rhendzeriwe hi rirhangu lerikulu, lero leha; wu ngheniwa hi tinyangwa ta khume na timbirhi; tintsumi ta khume na timbirhi ti yime etinyangweni ta wona; 12kutani mavito ma tsariwile kona, ma nga mavito ya tinxaka ta khume na timbirhi ta vana va Israele: 13Hi tlhelo ra vuxa, tinyangwa tinharhu, hitlhelo ra le n'walungwini, tinyangwa tinharhu, hitlhelo ra le dzongeni, tinyangwa tinharhu, hitlhelo ra vupeladyambu, tinyangwa tinharhu.
14Rirhangu ra muti ri ni masungulo ya khume na mambirhi, lawa ku tsariweke eka wona mavito ya khume na mambirhi ya vaapostola va khume na vambirhi va Xinyimpfana. 15Loyi a vulavulaka na mina, a a ri ni mpimo wa rihlanga ra nsuku ku ta pima muti, ni tinyangwa ta wona, ni rirhangu ra wona.
16Muti a wu ri ni matlhelo ya mune, ku leha ka wona a ku ringana ni ku anama ka wona. Kutani yi pima muti hi rihlanga wu ri ni tistadiya ta 12 000; ku leha, ni ku anama, ni ku tlakuka a ku ringana. 17A pima ni rirhangu ra wona, a kuma swisungunhu swa 144 hi mpimo wa munhu, wu nga wa ntsumi. 18Rirhangu ra muti a ri akiwile hi ribye ra yaspere; muti wona, wu ri nsuku lowu tengeke, lowu fanaka ni nghilazi leyi tengeke. 19Kutani masungulo ya rirhangu ra muti a ma sasekisiwile hi maribye ya nkoka ya tinxakaxaka. Masungulo yo rhanga ma ri ya yaspere; ya vumbirhi, ya safiri; ya vunharhu, ya kalkedoni; ya vumune, ya emeralda; 20ya vuntlhanu, ya sardonisi; ya ntlhanu na rin'we, ya sardiyo; ya ntlhanu na mambirhi, ya krisolita; ya ntlhanu na manharhu, ya berila; ya ntlhanu na mune, ya topazi; ya khume, ya krisopurasi ya khume na rin'we, ya yakinta; ya khume na mambirhi, ya ametisita. 21Tinyangwa ta khume na timbirhi a ti ri tiperela ta khume na timbirhi; nyangwa yin'wana ni yin'wana yi ri perela yin'we. Huvo ya muti a wu ri nsuku lowo saseka, lowu fanaka ni nghilazi leyi vonikelaka.
22Loko yi ri tempele, a ndzi yi vonanga eka wona, hikuva Hosi, Xikwembu xa matimba hinkwawo hi yona tempele ya wona, ni Xinyimpfana. 23Kutani muti a wu na ku voningiwa hi dyambu ni n'weti, hikuva wu voningiwa hi ku kwetsima ka Xikwembu, na xona Xinyimpfana i rivoningo ra wona. 24Matiko ma ta famba eku vonakaleni ka wona, ni tihosi ta misava ti ta neha kona ku kwetsima ka tona. 25Tinyangwa ta wona ti nga ka ti nga pfariwi ni nhlekanhi, hikuva vusiku a byi nga ha vi kona; 26kutani va ta tisa eka wona ku kwetsima ni ku dzuneka ka matiko. 27A ku na xilo xa thyaka lexi nga ta nghena kona, hambi la endlaka manyala ni mavunwa; kambe ku ta nghena ntsena lava tsariweke ebukwini ya vutomi ya Xinyimpfana.
