NHLAVUTELO 22

₁Kutani ntsumi yi ndzi kombisa nambu wa mati ya vutomi, lowu tengeke kukotisa kristala, wu huma exiluvelweni xa Xikwembu, ni xa Xinyimpfana. ₂Exikarhi ka xivandla xa muti, entlhandlukweni wun'wana ni wun'wana wa nambu, a ku ri ni murhi wa vutomi, lowu tswalaka mihandzu ya khume na mimbirhi, wu tswala mihandzu hi n'hweti yin'wana ni yin'wana, kutani matluka ya murhi lowo, i ya ku horisa matiko. ₃Anathema a yi nga ha vi kona, xiluvelo xa Xikwembu ni xa Xinyimpfana xi ta va kona, kutani malandza ya xona ma ta xi tirhela; ₄va ta vona mombo wa xona; vito ra xona ri ta tsariwa emimombyeni ya vona. ₅Kutani vusiku a byi nga ha vi kona, a va nga ha pfumari ku vonakala ka rivoni, hambi ku ri ku vonakala ka dyambu, hikuva Hosi Xikwembu xi ta va voningela, kutani va ta fuma hi masiku ni masiku.

₆Kutani yi ku eka mina: “Timhaka leti, ti tiyile, i ta ntiyiso; Hosi, Xikwembu xa mimoya ya vaprofeta; xi rhumile ntsumi ya xona yi ta kombisa malandza ya xona leswi nga ta humelela sweswi. ₇Vonani, ndzi hatlisa ndzi ta.” Ku katekile la hlayisaka timhaka ta vuprofeta bya buku leyi!

₈Hi mina Yohane loyi a nga vona swilo leswo ni la nga ti twa. Kuteloko ndzi swi yingisile ni ku swi vona, ndzi tiwise ehansi, ndzi khinsama emilengeni ya ntsumi leyi ndzi kombiseke swilo leswo. ₉Kambe yi ku eka mina: “U nga endlisi sweswo, hikuva ndzi nakulorhi entirhweni, ni wa vamakwenu va vaprofeta, ni wa lava hlayisaka marito ya buku leyi; gandzela Xikwembu.”

₁₀Yi engeta yi ku eka mina: “U nga tshuki u lema hi mfungho timhaka ta vuprofeta bya buku leyi, hikuva nkarhi wu kusuhi. ₁₁La nga lulamangiki, a a engete a va la nga lulamangiki; la tinyamisaka a a engete a tinyamisa; la lulameke a a engete a endla hi ku lulama; ni la kwetsimaka a a engete a tikwetsimisa.”

₁₂“Vonani, ndzi hatlisa ndzi ta, ndzi tamela hakelo ya mina, ndzi ta hakela un'wana ni un'wana hi leswi ringanaka ku tirha ka yena. ₁₃Hi mina Alfa na Omega, lowo rhanga ni lowo hetelela, wa ku sungula ni wa makumu. ₁₄Ku katekile lava basisaka tinguvu ta vona, va ta lulameriwa hi ku dya murhi wa vutomi, ni ku nghena emutini hi tinyangwa ta wona! ₁₅Kambe ehandle, i timbyana, ni vakanganyisi, ni vaoswi ni vadlayi ni lava gandzelaka swifaniso swa swikwembu, ni hinkwavo lava rhandzaka vunwa ni lava tirhaka hi byona.

₁₆“Mina Yesu, ndzi rhumile ntsumi ya mina ku vula vumbhoni bya timhaka teto etikerekeni. Hi mina rimitsu ni rixaka ra Davhida, ni nyeleti leyi voningaka ya mixo.”

₁₇Moya ni Mutekiwa va ri: “Tana!” Ni la yingisaka, a vule a ku: “Tana!” Ni la nga ni torha, a a te; ni la swi rhandzaka, a a teke ntsena mati ya vutomi.

₁₈Ndza tiyisa vumbhoni bya mina eka un'wana ni un'wana la yingisaka vuprofeta bya buku leyi, leswaku loko munhu a yi engetelela, Xikwembu xi ta engetelela ehenhla ka yena makhombo lama tsariweke ebukwini leyi. ₁₉Kutani loko un'wana a hunguta timhaka tin'wana ta buku ya vuprofeta lebyi, Xikwembu xi ta hunguta ku averiwa ka yena emurhini wa vutomi, ni le mutini lowo kwetsima, swi nga leswi tsariweke ebukwini leyi.

₂₀Loyi a tiyisaka vumbhoni bya timhaka leti, a ku: “Ina, ndza ta sweswi!” Amen! Tana, Hosi Yesu!

₂₁Tintswalo ta Hosi Yesu a ti ve ni vahlawuriwa hinkwavo!

Amen!