RISIMU RA TINSIMU 7

₁Tlhela, tlhela, wena Muxulama,

Tlhela, tlhela leswaku hi ku languta.

Mi langutela yini Muxulama

Kukotisa mijato ya mitlawa mimbirhi?

₂Milenge ya wena yi sasekile swonghasi etintanghwini ta wena, n'wana hosi!

Swirhendzevutana swa ndzhumbi wa wena swi fana ni masindza,

Lowu nga ntirho wa tintlhari.

₃Nkava wa wena i ndzheko lowu sasekisiweke,

Lowu teleke hi vhinyo leyo nandziha;

Khwiri ra wena i nhulu ya koro

Leyi rhendzeriweke hi makhon'wa.

₄Mavele ya wena ma fana ni timhala letitsongo,

Ma kotisa mahahla ya ntswele ya mbavala.

₅Nhamu ya wena yi fana ni khokholo ra tino ra ndlopfu.

Mahlo ya wena ma fana ni mativa ya le Hexiboni,

Ekusuhi ni nyangwa ya Beta-Rabimi;

Nhompfu ya wena yi fana ni khokholo ra Lebanoni,

Leri langutaka tlhelo ra Damaska.

₆Nhloko ya wena yi tlakukile ku fana na Karmele,

Misisi ya nhloko ya wena yi fana ni xivunguvungu;

Hosi yi phasiwile hi mihoro ya yona.

₇U sasekile swonghasi, u rhandzeka ngopfu,

Oho murhandziwa wanga!

Exikarhi ka mitsakiso!

₈Xiyimo xa wena xi fana ni xa ncindzu,

Ni mavele ya wena ma fana ni swichocho swa wona.

₉A ndzi ku:

Ndzi ta khandziya murhi wa ncindzu,

Ndzi ta khoma marhavi ya wona!

Mavele ya wena a ma ve tani hi swidzumba swa vhinya,

Ni ku nun'hwela ka ku hefemula ka wena, tani hi ku nun'hwela ka maapula!

₁₀Nomu wa wena a wu fane ni vhinyo leyo nandziha,

Leyi lulamelaka murhandziwa wa mina,

Leyi rhetemukaka emilon'wini ya lava khudzihelaka!

₁₁Ndzi wa murhandziwa wa mina,

Kutani ku navela ka yena ka ndzi kongoma.

₁₂Tana, murhandziwa wa mina a hi hume hi ya emasin'wini,

Hi ya tshama nivusiku emitini!

₁₃Ni mixo hi ta ya etivhinyeni,

Hi ta vona vhinya loko yi hlukile, ni loko yi balekile swiluva,

Hi vona mirhi ya girenada loko yi baleke swiluva.

Hi kona ndzi nga ta ku nyika rirhandzu ra mina.

₁₄Mirhi ya mandragora yi hangalasa ku nun'hwela ka wona.

Kambe etinyangweni ta hina hi ni mihandzu hinkwayo leyo nandziha,

Leyintshwa ni leya khale.

Ndzi ku hlayisele yona, murhandziwa wanga.