RISIMU RA TINSIMU 8

₁Oho! Loko ngi u ri makwerhu,

La an'weke emaveleni ya manana!

Loko ngi ndzi hlangana na wena ehandle, a ndzi ta ku ntswontswa,

Kutani ngi ndzi nga ri na ku soriwa.

₂Ingi ndzi ku heleketa, ndzi ku yisa endlwini ya manana;

Wena u ta ndzi lerisa,

Mina ndzi ku nwisa vhinyo ya ku nandziha,

Ni leswi tsokombelaka swa magirenada ya mina.

₃Voko ra yena ra ximatsi a ri ve ehansi ka nhloko ya mina,

Kutani a a ndzi singarhele hi lera xinene!

₄Ndza mi lerisa, n'wina vanhwanyana va Yerusalema,

Mi nga n'wi hiti, ni loko ku ri ku pfuxa murhandziwa wanga,

Loko a nga si swi rhandza.

₅I mani loyi a tlhandlukaka, a pfa emananga,

A tiseketele eka murhandziwa wa yena?

Ndzi ku pfuxile u ri ehansi ka mirhi ya maapula,

Laha u velekiweke kona hi mana wa wena,

U twile ku vaviseka kona loyi a ku velekeke.

₆Ndzi teke, ndzi va embilwini ya wena kukotisa mfungho,

Kukotisa mfungho evokweni ra wena;

Hikuva rirhandzu ri ni matimba ku fana ni rifu,

Makwanga ma tiya kukotisa xivandla xa vafi.

Ku hiseka ka wona i ku hiseka ka ndzilo,

I langavi ra Yehovha.

₇Mati lamakulu ma nga ka ma nga timi rirhandzu,

Ni milambu yi nga ka yi nga ri kukuti.

Hambi munhu a nga humesela rirhandzu rifuwo hinkwaro ra yindlu ya yena,

U ta soriwa ntsena.

₈Hi ni makwerhu lontsongo wa wanhwanyana,

La nga siki va na mavele;

Hi ta endla yini hi makwerhu,

Siku va nga ta ta n'wi vuta?

₉Loko ngi ri ri rirhangu,

Hi ta aka ehenhla ka rona makhokholo ya silivhere;

Loko ngi yi ri nyangwa,

Hi ta yi pfala hi rivanti ra kedari.

₁₀Ndzi rirhangu, ni mavele ya mina ma fana ni makhokholo,

Hikwalaho emahlweni ka yena ndzi fana ni loyi a kumeke ku rhula.

₁₁Solomoni a a ri ni nsimu ya vhinya le Baala-Hamoni;

A yi vekile emavokweni ya vahlayisi;

Un'wana ni un'wana a humesela mihandzu ya yona tixikele ta silivhere ta khume ra madzana.

₁₂Vhinya ya mina, leyi nga ya mina kunene, ndzi ta yi hlayisa;

Tixikele ta khume ra madzana i ta wena, Solomoni,

Ni madzana mambirhi eka lava hlayisaka mihandzu ya yona!

₁₃Wena la tshamaka emasin'wini!

Vanakulorhi va rhandza ku twa rito ra wena.

Wa nga ndzi twisa rona!

₁₄Suka, u tsutsuma, murhandziwa wanga!

Kukotisa ntswele ya mhala, kumbe rhole ra timbavala,

Etintshaveni ta mirhi ya risuna!