Genesa 37

₁Yakobo a a tshama etikweni ra Kanana laha tata wa yena a a luverile kona. ₂Lawa i matimu ya ndyangu wa Yakobo.

Loko Yosefa a ri ni malembe ya 17, a a risa swifuwo leswitsongo swin'we ni vamakwavo, vana va Biliha na Zilipa vasati va tata wa yena. Yosefa a a hamba a vuya a rungulela tata wa yena swilo leswo biha leswi vamakwavo a va swi endla. ₃Yakobo a a rhandza Yosefa ku tlula vamakwavo wa yena lavan'wana, hikuva a a n'wi kumile eku dyuhaleni ka yena. Hiloko a n'wi rhungela xiambalo lexo leha, xa mavoko yo leha. ₄Kuteloko vamakwavo va vona leswaku tata wa vona ú rhandza Yosefa ku tlula vona hinkwavo, va sungula ku n'wi venga, va nga ha vulavuli na yena hi ndlela leyinene.

₅Siku rin'wana, Yosefa a lorha norho; kuteloko a byela vamakwavo, vo ya va n'wi venga swinene. ₆Yosefa a ku ka vona: “Twanani norho lowu ndzi wu lorheke: ₇A hi ri karhi hi boha tinyandza emasin'wini, kutani nyandza ya mina yi suka yi yima, hiloko leta ka n'wina ti yi rhendzela, ti yi nkhinsamela.” ₈Vamakwavo va ku ka yena: “Xana u vula leswaku hakunene u nga va hosi ya hina u hi fuma xana?” Kutani va ya va n'wi venga swinene hikokwalaho ka milorho ya yena ni leswi a swi vulavulaka. ₉Yosefa a lorha norho wun'wana, kutani a byela vamakwavo a ku: “Ndzi lorhile norho wun'wana: Ndzi vona dyambu, ni n'weti, ni tinyeleti ta 11 swi ndzi nkhinsamela.” ₁₀Kuteloko Yosefa a byela tata wa yena ni vamakwavo, tata wa yena a n'wi holovela a ku: “Norho lowu u wu lorheke wu vula yini xana? Xana ku ta va na siku leri mina ni mana wa wena ni vamakwenu, hi nga ta ku nkhinsamela xana?” ₁₁Hiloko vamakwavo va n'wi vondzoka, kambe tata wa yena a nga yi rivalanga mhaka leyi.

₁₂Siku rin'wana vamakwavo wa Yosefa va ya va ya risa swifuwo swa tata wa vona kusuhi ni muti wa Xikeme. ₁₃Kutani Yakobo a ku ka Yosefa: “Vamakwenu va le ku riseni ka swifuwo eXikeme, kutani wena tana ndzi ku rhuma eka vona.” Yosefa a ku: “Hi mina loyi!” ₁₄Yakobo a ku ka yena: “Sweswi, famba u ya va pfuxela, u kamba ni swifuwo, kutani u vuya u ta ndzi rungulela mahungu ya kona.” Kutani Yosefa a suka eka Nkova wa Hebroni, a ya fika eXikeme. ₁₅Kutani wanuna un'wana a kuma Yosefa a ri karhi a rhendzeleka enhoveni, a n'wi vutisa a ku: “U lava yini xana?” ₁₆Yosefa a ku: “Ndzi lava vamakwerhu. Ndzi kombela leswaku u ndzi byela laha va riselaka kona swifuwo.” ₁₇Kutani wanuna loyi a ku: “Laha va sukile, ndzi twile va ku: ‘A hi yeni eDotani.’ ” Kutani Yosefa a famba a landza vamakwavo, a ya va kuma eDotani. ₁₈Kutani va n'wi vona a ha ta hi le kule. Loko a nga si fika laha a va ri kona, va endla makungu ya ku n'wi dlaya ₁₉va byelana va ku: “N'wamilorho hi loyi wa ta! ₂₀A hi n'wi khomeni hi n'wi dlaya, hi n'wi hoxa eka rin'wana ra makhele lama nga kona, kutani hi ta ya vula leswaku ú dyiwile hi swiharhi swa nhova. Hi ta vona leswaku milorho ya yena wa ha ta yi lorhela kwihi!” ₂₁Loko Rhuveni a twa mhaka leyi, a ringeta ku ponisa Yosefa emavokweni ya vona; a ku: “Hi nga n'wi dlayi!” ₂₂Rhuveni a ya emahlweni a ku ka vona: “Mi nga tshuki mi halata ngati; n'wi hoxeni ekheleni kwala mananga, kambe mi nga tshuki mi n'wi vavisa.” Rhuveni a a endlela ku ponisa Yosefa, leswaku a ta n'wi tlherisela eka tata wa yena. ₂₃Loko Yosefa a fika eka vamakwavo, va n'wi hluvula xiambalo lexo leha, xa mavoko yo leha, lexi a a xi ambarile, ₂₄kutani va n'wi khoma va n'wi hoxa ekheleni. Khele leri a ri nga ri na mati, a ma phyile.

₂₅Kutani va ya tshama ehansi va dya swakudya. Kuteloko va tlakusa mahlo, va vona ntlawa wa Vaiximaele lava a va huma eGiliyadi, va ri ni tikamela leti rhwaleke mirhi ya nkoka ni ya risuna ya tinxaka-xaka, va yi yisa etikweni ra Egipta. ₂₆Hiloko Yuda a ku ka vamakwavo: “Loko hi dlaya makwerhu kutani hi tumbeta mhaka ya kona, hi ta vuyeriwa hi yini xana? ₂₇A hi n'wi xaviseleni Vaiximaele, hi nga tshuki hi n'wi vavisa, hikuva i makwerhu; hina na yena hi ngati yin'we.” Kutani vamakwavo wa Yuda va pfumela. ₂₈Vamidiyani lava fambaka va xava ni ku xavisa swilo, va hundza hi laha vamakwavo wa Yosefa a va ri kona, hiloko va humesa Yosefa ekheleni va n'wi xavisela Vaiximaele hi mali ya tisilivhere ta 20. Kutani Vaiximaele va ya na Yosefa le Egipta.

₂₉Kuteloko Rhuveni a ya ekheleni, o kuma leswaku Yosefa a nga kona, kutani a handzulela swiambalo swa yena, ₃₀a ya eka vamakwavo a fika a ku: “Mufana luya a nga kona, kutani sweswi mina ndzi ta ya kwihi xana?” ₃₁Hiloko va dlaya mbuti, va teka xiambalo xa Yosefa va xi peta engatini, ₃₂kutani va teka xiambalo lexi xo leha xa mavoko yo leha, va xi yisa eka tata wa vona, va ku: “Hi thumbhile xiambalo lexi; hi kombela leswaku u xi languta, u vona loko xi ri xiambalo xa n'wana wa wena kumbe xi nga ri xona.” ₃₃Kutani Yakobo a xi languta, a ku: “Lexi i xiambalo xa n'wananga. Swiharhi swa nhova swi n'wi dyile, Yosefa n'wananga ú phatluleriwile!” ₃₄Hiloko Yakobo a handzulela swiambalo swa yena, kutani a ambala leswo khwaxa, a rila n'wana wa yena masiku layo tala. ₃₅Vana va yena hinkwavo va xinuna ni va xisati va ya va ya n'wi khongotela, kambe yena a ala ku khongoteriwa, a ku: “E-e, ndzi ta kala ndzi fa ndzi landza n'wananga exivandleni xa vafi ndza ha rila.” Kutani Yakobo a rila n'wana wa yena hi ndlela yoleyo. ₃₆Enkarhini lowu, Vamidiyani a va xavisile Yosefa eka Potifaro etikweni ra Egipta. Potifaro a a ri un'wana wa vatirheli va hosi Faro, naswona a a ri ndhuna ya varindzi.