I Vamakabiya 15

₁Antiyoko wa vunkombo n'wana Demetriyo wo sungula, loyi a a ri eswihlaleni swa Vagriki, a rhumela papila eka Simoni Muprista lonkulu ni murhangeri wa Vayuda, ni le ka Vayuda hinkwavo. Papila ra kona hi leri nge:

₂“Eka wena Simoni Muprista lonkulu ni murhangeri wa Vayuda, ni ka n'wina hinkwenu va ka Yuda, mina hosi Antiyoko ndzi ri: ‘Xewani!’ ₃Tanihi laha mi swi tivaka hakona, mfumo wa vatata wa mina wu phanghiwile hi vakanganyisi, kutani ndzi tilunghiserile ku ya wu teka, leswaku ndzi wu vuyisela exin'weni lexi a wu ri ka xona khale. Ndzi hlengeletile mavuthu layo tala ya vathoriwa, ndzi lulamisile ni tingalava ta nyimpi. ₄Ndzi tilulamisela ku fika etikweni hi tingalava leti, leswaku ndzi ya hlasela lava phangheke tiko ra mina ni lava onheke miti leyo tala ya mfumo wa mina.

₅“Hikokwalaho ke, ndzi tiyisa ku ntshunxiwa ka n'wina eka mihlengo hinkwayo ni le ka tihakelo hinkwato, hilaha tihosi leti ti ndzi rhangeleke ti mi ntshunxeke hakona. ₆Ndzi mi pfumelela ku tifulela mali leyi nga ta tirhisiwa etikweni ra n'wina. ₇Ndzi ntshunxa Yerusalema ni Xivandla lexo hlawuleka eka mihlengo hinkwayo. Matlhari hinkwawo lama mi nga ma lulamisa ni makhokholo lawa mi nga ma aka, lawa sweswi mi nga eka wona, i swa n'wina. ₈Swikweleti hinkwaswo leswi mi swi kolotaka eka xuma xa vuhosi ni swin'wana leswi mi nga ta swi kolota, swi ta tshikiwa ku sukela sweswi ni hilaha ku nga heriki. ₉Xikan'we-kan'we loko ndzi ta va ndzi tlhelerile eku fumeni ka tiko ra mina, ndzi ta ku fundzha wena Simoni, ni vanhu va wena, ni Tempele; hikokwalaho ndhuma ya wena yi ta tikomba emisaveni hinkwayo.”

₁₀Hi lembe ra 174 Antiyoko wa vunkombo a hlasela tiko ra vatata wa yena. Mavuthu hinkwawo ma ya eka yena, Trifoni a sala ni ma nga ri mangani ntsena. ₁₁Antiyoko wa vunkombo a hlongorisa Trifoni, kutani Trifoni a tsutsumela emutini wa Dori kusuhi ni lwandle. ₁₂A swi vona leswaku ú le khombyeni lerikulu, hikuva masocha ya yena a ma n'wi sukerile. ₁₃Kavaloko Antiyoko wa vunkombo a govela Dori, a ri ni masocha ya 120 000 yo famba hi milenge na vagadi va 8 000 va tihanci. ₁₄Hi ku pfuniwa hi tingalava ta yena, a rhendzela muti wolowo, ku ri hava na un'we loyi a pfumeleriwaka ku huma kumbe ku nghena eka wona.

₁₅Enkarhini wolowo, Numeniya ni lava a a ri na vona va fika eYerusalema, va huma eRhoma va ri ni papila leri tsaleriweke tihosi ni matiko yo hambana-hambana, leri nge:

₁₆“Eka wena hosi Pitolemi, mina Lukiyo muyimeri wa Varhoma, ndzi ri: ‘Xewani!’ ₁₇Varhumiwa va Vayuda lava va nga vanghana ni vaseketeri va hina, va tile eka hina ku ta pfuxeta ntwanano wa khale, ni xinakulobye, ni ku seketelana, va rhumiwile hi Simoni Muprista lonkulu ni Vayuda hinkwavo. ₁₈Va hi terile ni nyiko ya xitlhangu lexikulu xa nsuku lexi tikaka 685 kg. ₁₉Hikokwalaho hi twananile ku tsalela tihosi ni matiko, leswaku va nga tshuki va karhata Vayuda, kumbe ku hlasela miti ni tiko ra vona, kumbe ku seketelana ni lava va va lwisaka. ₂₀Hi twananile ku amukela xitlhangu xo huma eka vona. ₂₁Hikokwalaho ke, loko vanhu va tihanyi va tshuka va balekile eYudiya, kutani va kombela ku tumbela etikweni ra n'wina, va nyiketeni eka Simoni Muprista lonkulu, leswaku a va ba hi ku landza nawu wa ka vona.”

₂₂Lukiyo a rhumela papila ro fana ni leri eka hosi Demetriyo wa vumbirhi, ni le ka Atalo, ni le ka Ariyarate, ni le ka Arisake, ₂₃ni le ka matiko hinkwawo lama landzelaka: Sampisame, na Sparta, na Delosi, na Minda, na Sikiyoni, na Kariya, na Samosi, na Pampfiliya, na Lukiya, na Halikarnaso, na Rhodesa, na Faseli, na Kosi, na Side, na Arado, na Goritina, na Kinida, na Kipra, na Kirene. ₂₄Tsalwa ra papila leri ri rhumeriwa ni le ka Simoni Muprista lonkulu.

₂₅Hosi Antiyoko wa vunkombo a rhendzela muti wa Dori nakambe, a ya emahlweni ni ku wu hlasela hi ku endla swifaya-makhumbi; kutani a pfalela Trifoni ni masocha ya yena kona, a va sivela ku huma hambi ku ri ku nghena. ₂₆Kavaloko Simoni a rhumela Antiyoko wa vunkombo tinhenha ta 2 000 ku ya n'wi pfuna, a rhumela ni silivhere, ni nsuku, ni matlhari layo tala. ₂₇Kambe Antiyoko wa vunkombo a ala ku swi amukela, a onha ntwanano lowu a a wu endlile na Simoni eku sunguleni, a hundzuka nala wa yena. ₂₈A rhumela Atenobi, un'wana wa vanghana va yena, ku ya kanela timhaka na Simoni hi marito lama nge: “U le ku fumeni ka Yopa, na Gazara, ni khokholo ra Yerusalema, yi nga miti leyi yi nga hansi ka mfumo wa mina. ₂₉U hlaserile swifundzha swa miti yoleyo, u onhile tiko swinene, kutani u tekile ni ku fuma tindhawu leto tala emfun'weni wa mina. ₃₀Hikokwalaho ke, ndzi tlherisele miti leyi u yi tekeke ni ndzuvo wa tindhawu leti u ti tekeke handle ka mindzilekana ya Yudiya. ₃₁Kumbe ematshan'wini ya swona, ndzi rhumele silivhere ya 20 500 kg, ni yin'wana silivhere ya 20 500 kg yo riha leswi u nga swi onha ni mihlengo leyi u nga yi humesangiki. Handle ka swona, ndzi ta ku hlasela.”

₃₂Kavaloko Atenobi, munghana wa hosi Antiyoko wa vunkombo, a ta eYerusalema. Kakuloko a vona vuxongi bya yindlu ya Simoni, ni swibye swa nsuku kumbe swa silivhere leswi a swi ri emapulangini ya makhumbi ya xivava xa ku dyela eka xona, ni loko a vona rifuwo hinkwaro rin'wana ra Simoni, a hlamala ngopfu. Kutani Antenobi a byela Simoni marito ya Antiyoko wa vunkombo, ₃₃kambe Simoni a n'wi hlamula a ku: “A hi si tshama hi teka tiko ra van'wana, hambi ku ri nchumu wihi na wihi lowu nga wa van'wana. Hi tekile ntsena ndzhaka ya vatata wa hina, leyi yi nga tshama yi tekiwa hi valala va hina hi ndlela leyi nga lulamangiki. ₃₄Sweswi i nkarhi wa leswaku hi tihlayisela ndzhaka leyi ya vatata wa hina. ₃₅Hi tlhelo ra miti ya Yopa na Gazara leyi u yi lavaka, a yi ri miti leyi a yi hi onhela swinene, hina ni tiko ra hina. Hambiswiritano, ematshan'wini ya yona hi ku nyika silivhere ya 410 kg.”

Atenobi a nga hlamulanga nchumu, ₃₆kambe a tlhelela hi ku hlundzuka eka Antiyoko wa vunkombo, kutani a fika a n'wi tivisa marito ya Simoni, a n'wi tivisa ni ta vuxongi bya yindlu ya yena ni hinkwawo leswi a nga swi vona kona. Kutani Antiyoko wa vunkombo a hlundzuka ku tlula mpimo.

₃₇Kavaloko Trifoni a balekela emutini wa Ortosiya. ₃₈Kutani Antiyoko wa vunkombo a veka Kandebe ku va ndhunankulu exifundzheni lexi nga kusuhi ni lwandle, a n'wi nyika masocha yo famba hi milenge ni vagadi va tihanci. ₃₉A n'wi lerisa ku ya hlasela tiko ra Yudiya ni ku pfuxa muti wa Kedroni, a tiyisa ni tinyangwa ta wona, leswaku a ta lwa na Vayuda. Antiyoko wa vunkombo a ya emahlweni ni ku hlongorisa Trifoni.

₄₀Kavaloko Kandebe a fika eYamina, a sungula ku xanisa Vayuda ni ku hlasela Yudiya ni ku khometela vanhu a va dlaya. ₄₁A pfuxa muti wa Kedroni, kutani a veka eka wona masocha yo famba hi milenge ni vagadi va tihanci, leswaku va ta huma kona ku ya lwa ni ku rindza magondzo ya Yudiya, hilaha hosi Antiyoko wa vunkombo a n'wi leriseke hakona.