1Yohane n'wana Simoni, a suka eGazara, a ya vikela tata wa yena leswi Kandebe a swi endleke. 2Simoni a vitana Yudasi na Yohane, vana va yena lavakulu, kutani a ku eka vona: “Mina, ni vamakwerhu, ni ndyangu wa tatana, hi lwile tinyimpi ta Vaisraele ku sukela evutsongwanini bya hina ku fikela namuntlha, kutani hakanyingi swilo swa hina swi fambile kahle, hi swi kotile ku ponisa Vaisraele eminkarhini leyo tala. 3Sweswi ndzi dyuhele, kambe n'wina mi vavanuna hi musa wa Xikwembu. Tekani ndhawu ya mina ni ya vamakwerhu, humani mi ya lwela tiko ra hina. Xikwembu a xi ve na n'wina.”
4Kavaloko Yohane a hlengeleta tinhenha ta 20 000 ta Vaisraele, ni masocha yo famba hi milenge, ni vagadi va tihanci, kutani va huma ku ya lwa na Kandebe. Nivusiku va ya gova eModeni. 5Nimixo swinene va pfuka va kongoma erivaleni. Va vona masocha layo tala yo famba hi milenge ni vagadi va tihanci lava a va ta ku ta lwa na vona. A ku ri ni xinambyana exikarhi ka mavuthu ya Vayuda ni ya valala. 6Yohane ni masocha ya yena va yima va jamelana ni valala. Kakuloko Yohane a vona leswaku masocha ya yena a ma chava ku pela xinambyana, a rhanga a xi pela, kutani masocha ya yena na wona ma xi pela ku n'wi landza. 7Yohane a avanyisa mavuthu ya yena, a veka vagadi va tihanci exikarhi ka masocha yo famba hi milenge, hikuva vagadi va tihanci va valala a va tele ku tlula mpimo. 8Kavaloko Vayuda va yimba tinanga, Kandebe ni masocha ya yena ma hluriwa, kutani layo tala ya wona ma dlayiwa. Lama saleke, ma tsutsumela ekhokholweni ra wona ra Kedroni. 9Yudasi makwavo wa Yohane, a vavisiwa enyimpini, kambe Yohane a hlongorisa valala ku kondza va ya fika eKedroni, muti lowu akiweke hi Kandebe. 10Valala van'wana va balekela eswihondzweni leswi a swi ri emasin'wini ya Azoto, kutani Yohane a hisa muti lowu. Hi siku leri, ku dlayiwa valala va kwalomu ka 2 000, kutani Yohane a tlhelela eYudiya a hlayisekile.
Ta ku dlayiwa ka Simoni ni vana va yena vambirhi
11Simoni Muprista lonkulu, a hlawula Pitolemi n'wana Abubu ku va murhangeri wa rivala ra Yeriko. Pitolemi a a fuwe ngopfu, 12hikuva a a ri mukon'wana wa Simoni. 13Pitolemi a a ri munhu wa makwanga, a navela ku fuma tiko hinkwaro, kutani a kungela ku dlaya Simoni ni vana va yena. 14Simoni swin'we ni vana va yena Matatiya na Yudasi, va endzela miti ya tiko ku vona swilaveko swa yona. Hi n'hweti ya Xebati, yi nga n'hweti ya vu-11, hi lembe ra 177, va fika eYeriko. 15Pitolemi loyi a a ha ri ni makungu ya ku dlaya Simoni ni vana va yena, a va amukela exikhokholwanini xa Doko lexi a a xi akile. A va lulamisela swakudya swo tala, kambe a tumbeta masocha ya yena kona. 16Kakuloko Simoni ni vana va yena va pyopyiwile, Pitolemi ni masocha ya yena va huma laha a va tumberile kona va hlome mabanga, va nghena xikan'we endlwini ya nkhuvo, va dlaya Simoni, ni vana va yena vambirhi, ni malandza man'wana ya yena. 17Hi xiendlo xolexo xa vukanganyisi, Pitolemi a tlherisela leswo lulama hi leswo homboloka.
18Kavaloko Pitolemi a tsala papila ro vikela hosi Antiyoko wa vunkombo leswi humeleleke, a n'wi kombela leswaku a n'wi rhumela mavuthu ya ku n'wi pfuna ku teka miti ni tiko, swi va swa yena. 19A rhumela van'wana eGazara ku ya dlaya Yohane. A rhumela ni mapapila eka vafambisi va mavuthu, a va byela ku ta eka yena, leswaku a ta va nyika nsuku, ni silivhere, ni tinyiko tin'wana. 20A rhumela van'wana ku ya teka Yerusalema ni xintshabyana xa Tempele. 21Kambe munhu un'wana a rhanga a ya vikela Yohane eGazara leswaku tata wa yena ni makwavo va file ni leswaku Pitolemi ú rhumerile masocha ku ta n'wi dlaya. 22Loko Yohane a twa mahungu lawa, a hlamala ngopfu, kambe leswi a a lumiwe ndleve, ú kotile ku khoma ni ku dlaya lava a va rhumeriwile ku ta n'wi dlaya.
23Mintirho yin'wana hinkwayo ya Yohane, ni tinyimpi ta yena, ni swiendlo swa yena swa vunhenha leswi a swi endleke, ni ta makhumbi lawa a ma akeke, ni ta leswi a swi kumeke swa nyuku wa yena, 24swi tsariwile hinkwaswo eka “Buku ya matimu” ya vupristankulu bya yena, ku sukela loko a vekiwile ku va Muprista lonkulu ematshan'wini ya tata wa yena.
