Daniele 3

₁Hosi Nebukadnetsara a endla xifaniso xa nsuku; ku leha ka xona a ku ri 30 m ni ku anama ka xona a ku ri 3 m. A xi yimisa erivaleni ra Dura, exifundzheni xa Babilona, ₂kutani a rhamba tihosana, ni tindhuna letikulu ni letitsongo, ni vatsundzuxi va yena, ni vahlayisi va xuma xa tiko, ni vaavanyisi, ni vahlayisi va milawu, hinkwavo va ri vatirhela-mfumo va swiyimo swa le henhla, va ta va ta khangula xifaniso lexi a xi yimiseke. ₃Kutani vakulukumba lava hinkwavo va swiyimo swa le henhla, va ya khangula xifaniso lexi yimisiweke hi hosi Nebukadnetsara, va fika va yima emahlweni ka xona. ₄Kutani mutivisi wa timhaka ta tiko a huwelela swinene, a ku: “N'wina hinkwenu vanhu va tinxaka hinkwato, n'wina mi vulavulaka tindzimi to hambana-hambana, xileriso xa hosi hi lexi: ₅Loko mi twa mhalamhala, ni xitiringo, ni xitende, ni haripa, ni nkatara, ni nanga, ni swichaya-chayani swin'wana, mi fanele ku nkhinsama mi khongela xifaniso xa nsuku lexi yimisiweke hi hosi Nebukadnetsara. ₆Loyi a nga ta ala ku nkhinsama a khongela, ú ta hatla a khomiwa, a hoxiwa ekheleni ra ndzilo lowu pfurhaka hi matimba.”

₇Kutani loko vanhu hinkwavo, va tinxaka hinkwato lava vulavulaka tindzimi to hambana-hambana, va twa mhalamhala, ni xitiringo, ni xitende, ni haripa, ni nkatara, ni swichaya-chayani swin'wana, va nkhinsama, va khongela xifaniso xa nsuku lexi endliweke hi hosi Nebukadnetsara.

₈Enkarhini wolowo, ku humelela Vakalediya van'wana, va fika eka hosi Nebukadnetsara va mangalela Vayuda, ₉va ku: “We hosi, hanya hilaha ku nga heriki! ₁₀Hosi, hi wena u vekeke nawu lowu nge, munhu un'wana ni un'wana la twaka mhalamhala, ni xitiringo, ni xitende, ni haripa, ni nkatara, ni nanga, ni swichaya-chayani swin'wana, a a nkhinsame a khongela xifaniso xa nsuku, ₁₁kutani loyi a nga ta ala ku nkhinsama a khongela, ú ta hoxiwa ekheleni ra ndzilo lowu pfurhaka hi matimba. ₁₂Kambe ku na Vayuda van'wana lava u va vekeke ku va tindhuna ta xifundzha xa Babilona, vona i Xadraka, na Mexaka, na Abedi-Nego. Hosi, vavanuna lava a va ku xiximi, swikwembu swa wena a va na mhaka na swona, hambi xifaniso lexi u xi yimiseke xa nsuku, a va xi khongeli.”

₁₃Nebukadnetsara a hlundzuka swinene, kutani a lerisa leswaku Xadraka, na Mexaka, na Abedi-Nego va tisiwa emahlweni ka yena. Kutani ku endliwa tano. ₁₄Nebukadnetsara a va vutisa a ku: “Xana i ntiyiso leswaku we Xadraka, na we Mexaka, na we Abedi-Nego, a mi na mhaka ni swikwembu swa mina, ni leswaku xifaniso xa nsuku lexi ndzi xi yimiseke, a mi xi khongeli xana? ₁₅Kutani sweswi, loko mi lava ku pona, nkhinsamani mi khongela xifaniso lexi ndzi xi yimiseke, enkarhini lowu mi nga ta twa mpfumawulo wa mhalamhala, ni xitiringo, ni xitende, ni haripa, ni nkatara, ni nanga, ni swichaya-chayani swin'wana. Loko mi nga endli sweswo, mi ta hatla mi khomiwa, mi hoxiwa ekheleni ra ndzilo lowu pfurhaka. Xana xi kona xikwembu lexi xi nga mi ponisaka emavokweni ya mina xana?”

₁₆Xadraka, na Mexaka, na Abedi-Nego va hlamula hosi va ku: “We Nebukadnetsara, mhaka leyi u yi vulaka, hina a hi boheki ku yi hlamula. ₁₇Loko ho tshuka hi hoxiwa ekheleni ra ndzilo lowu pfurhaka, Xikwembu xa hina lexi hi xi tirhelaka, xi ta hi humesa, xi hi kutsula ni le mavokweni ya wena. ₁₈Kambe hambiloko xi nga hi kutsuli, swi tive we hosi leswaku hina a hi nga gandzeli swikwembu swa wena, kumbe ku nkhinsamela xifaniso xa nsuku lexi u xi yimiseke.”

₁₉Kutani Nebukadnetsara a hlundzuka ku tlula mpimo; loko a languta Xadraka, na Mexaka, na Abedi-Nego, nghohe ya yena yi hundzuka; kutani a lerisa malandza ku hlanganyeta ndzilo, ku hisa ka wona ku tlula ka 7 leswi a wu hamba wu hisisa xiswona. ₂₀Kutani a lerisa tinhenha tin'wana ta yena leswaku ti boha Xadraka, na Mexaka, na Abedi-Nego, ti va hoxa ekheleni ra ndzilo lowu pfurhaka hi matimba. ₂₁Kutani tinhenha ti boha vavanuna lava, ti va hoxa ekheleni ra ndzilo va ri ni swiambalo swa vona hinkwaswo. ₂₂Leswi a ku tirhiwa hi ku landzelela nawu wa hosi, ni leswi ndzilo a wu hlanganyetiwile ngopfu, malangavi ya wona ma dlaya tinhenha leti a ti dlidlimbetela Xadraka, na Mexaka, na Abedi-Nego endzilweni. ₂₃Kutani vavanuna lava vanharhu, Xadraka, na Mexaka, na Abedi-Nego, va wela ekheleni ra ndzilo va bohiwile.

₂₄Kutani hosi Nebukadnetsara a hatla a yima, a vulavula ni vatsundzuxi va yena, a ku: “Ndza hlamula! Xana a hi hoxanga vavanuna vanharhu ntsena endzilweni lava a va bohiwile xana?” Kutani vatsundzuxi va hlamula hosi va ku: “Ina hosi, u vula swona!” ₂₅Nebukadnetsara a ku: “Kambe sweswi, ndzi vona vavanuna va mune, naswona a va bohiwanga, va tifamba-fambela exikarhi ka ndzilo, kambe a va tshwi; wanuna lowa vumune, ú fana na xin'wana xa swikwembu.”

₂₆Kutani Nebukadnetsara a tshinela enon'weni wa khele ra ndzilo, a ku: “Wena Xadraka, na Mexaka, na Abedi-Nego, n'wina malandza ya Xikwembu xa le henhla-henhla humani mi ta haleno!” Hiloko Xadraka, na Mexaka, na Abedi-Nego va huma endzilweni. ₂₇Kutani tihosana, ni tindhuna letikulu ni letitsongo, ni vatsundzuxi va hosi, va hlengeletana va ta va ta xiyaxiya vanhu lava, kutani va vona leswaku ndzilo a wu va endlanga nchumu, hambi yi ri misisi ya vona a yi vavukanga, ni swiambalo swa vona a swi tshwanga, ku ri hava ni risema leri kombaka leswaku a va ri endzilweni. ₂₈Nebukadnetsara a ku: “Xikwembu xa Xadraka, na Mexaka, na Abedi-Nego, a xi dzunisiwe, hikuva xi rhumerile ntsumi ya xona ku ta ponisa malandza ya xona lawa ya xi tshembeke. Malandza lawa a ma yingisanga xileriso xa mina hosi; ma hlawurile ku nyiketa miri wa wona leswaku wu xanisiwa, ku ri na ku khongela swikwembu swin'wana, ma fularhela Xikwembu xa wona. ₂₉Kutani sweswi ndzi veka nawu lowu nge: Munhu un'wana ni un'wana loyi a nga ta vulavula swo biha hi Xikwembu xa Xadraka, na Mexaka, na Abedi-Nego, ú ta phatluleriwa a fa, muti wa yena wu hundzuka rhumbi, hikuva a ku na xikwembu xin'wana lexi nga ponisaka vanhu hi ndlela leyi.” ₃₀Kutani hosi yi veka Xadraka, na Mexaka, na Abedi-Nego exiyin'weni xa le henhla exifundzheni xa Babilona.