Yuditi 15

₁Loko masocha ya Vaasiriya ma twa leswi humeleleke, ma hlamala ngopfu. ₂Ma rhurhumela hi ku chava lokukulu, kutani ma baleka hi xihatla ma nga yimelananga, ma hangalaka hinkwako erivaleni ni le swintshabyaneni. ₃Lama a ma govile eswintshabyaneni leswi rhendzelaka Betuli, na wona ma baleka. Kavaloko un'wana ni un'wana loyi a a ri socha exikarhi ka Vaisraele, a ma hlongorisa.

₄Kutani Uziya a rhumela vavanuna eBeta-Matsayimi, ni le Bebayi, ni le Khova, ni le Kola, ni matlhelo hinkwawo ya tiko ra Israele, ku ya tivisa leswi nga humelela ni ku khutaza Vaisraele hinkwavo leswaku va hlongorisa valala va vona, va va herisa. ₅Kuteloko Vaisraele va twa leswi, hinkwavo va hlongorisa Vaasiriya, va va dlayetela ku ya fika eKhova. Vaisraele hinkwavo va le Yerusalema ni va le tikweni ra swintshabyana na vona va hlongorisa valala, loko va twa leswi humeleleke emixaxeni ya Vaasiriya. Na vona Vaisraele va le Giliyadi ni va le Galeliya va rhendzela Vaasiriya, va va dlayetela ku ya fika eDamaska ni ku hundza kona.

₆Vanhu van'wana va Betuli va rhelelela va ya emixaxeni ya Vaasiriya, va yi phangha, kutani va kuma rifuwo lerikulu kona. ₇Loko masocha ya Vaisraele ma vuya eku dlayeni, na wona ma phangha leswi saleke emixaxeni ya Vaasiriya. Miti ni swimitana hinkwaswo swa le rivaleni ni swa le swintshabyaneni na swona swi kuma swo tala swa leswi swi phanghiweke, hikuva a swi tele ngopfu.

₈Kutani Yoyakimi Muprista lonkulu, ni va huvo-nkulu ya Vaisraele, lava akeke eYerusalema, va ta ku ta vona leswinene leswi HOSI Xikwembu xi swi endleleke Israele ni ku ta vona Yuditi ni ku n'wi xeweta. ₉Loko va hlangana na yena, hinkwavo va n'wi tlangela va ku: “Muti wa Yerusalema wu tidzunisa hi wena, u ntwalo lowukulu wa Vaisraele, rixaka ra hina ri tinyungubyisa swinene hi mhaka ya wena! ₁₀U endlile hinkwaswo leswi u ri wexe, u endlele Vaisraele leswinene ngopfu, kutani Xikwembu xi tsaka ha swona. HOSI Xikwembu xa matimba hinkwawo a xi ku katekise hilaha ku nga heriki.”

Kavaloko Vaisraele hinkwavo va hlamula va ku: “Amen.”

₁₁Vaisraele va phangha mixaxa ya Vaasiriya masiku ya 30. Va nyika Yuditi ntsonga wa Holofani ni swibya hinkwaswo swa yena swa silivhere ni mimbedo ni swimbitana ni swingolongondzwana swa yena hinkwaswo. Yuditi a teka hinkwaswo leswi, a rhwexa meyila ya yena, a pana tigolonyi ta yena, a swi tlhandlekela eka tona. ₁₂Vavasati va Israele hinkwavo va hlengeletana ku vona ni ku tlangela Yuditi, van'wana va vona va n'wi cinela. Yuditi a teka switluka, a swi nyika vavasati lava a va ri na yena. ₁₃Yena ni lava a va ri na yena va tiambexa nhloko hi tiharhi ta matluka ya mitlhwari. Kutani Yuditi a famba emahlweni ka vanhu hinkwavo, a rhangela vavasati hinkwavo eku cineni. Vavanuna hinkwavo va Israele va ri karhi va n'wi landzelela, va tamerile matlhari ya vona, va ambala vuhlalu bya swiluva, va ri karhi va yimbelela.