1La tirihiselaka, Xikwembu xi ta n'wi rihisela na yena,
kutani xi ta hlaya swidyoho swa yena.
2Rivalela munhukuloni loyi a ku dyoheleke,
kutani u ta rivaleriwa swidyoho swa wena loko u khongela.
3Xana loko munhu a hlundzukela makwavo,
a nga langutela ku rivaleriwa hi Xikwembu ke?
4Xana loko a nga tsetseleli munhukulobye,
a nga langutela ku khongela leswaku a rivaleriwa swidyoho swa yena ke?
5Xana loko yena a nga munhu wa nyama a ri ni vukari,
i mani loyi a nga ta n'wi rivalela swidyoho swa yena ke?
6Tsundzuka leswi swi nga ta ku humelela emakumu ka vutomi bya wena, kutani u tshika rivengo,
ehleketa leswaku u fanele ku fa ni ku bola, kutani u hlayisa milawu ya Xikwembu.
7Tsundzuka swileriso swa xona, kutani u nga hlundzukeli munhukuloni.
Ehleketa ntwanano wa Loyi a nga henhla-henhla, kutani rivalela munhukuloni swidyoho swa yena.
Ta ku phikisana
8Tshika ku phikisana, kutani u ta sivela swidyoho,
hikuva ku hlundzuka ku pfuxa madzolonga.
9Mudyohi ú vanga mpfilumpfilu exikarhi ka vanghana,
ni rivengo exikarhi ka lava hanyaka hi ku rhula.
10Tihunyi to tala ti pfurhisa ndzilo swinene,
ni munhu wo oma nhloko, ú pfuxa madzolonga layo tala.
Vukari bya munhu byi fambelana ni vukulu bya yena,
ku hlundzuka ka yena ku fambelana ni ku tala ka rifuwo ra yena.
11Mphikisano wa xihatla wu pfuxa madzolonga,
kutani mholovo ya xihatla yi vanga ku halata ka ngati.
12Loko u pfurhetela makala ma ta pfurha,
loko u tshwutela marhi ehenhla ka wona, ma ta timeka,
kutani swiendlo leswimbirhi leswi swi endliwa hi nomu wun'we wa wena.
Ku vulavula hi vukari
13Rhukana muhlevi ni muxisi,
hikuva va lovisile vanhu lavo tala lava hanyaka hi ku rhula.
14Ku lumbeta swi onhile vanhu vo tala,
swi va hangalasile exikarhi ka vanhu vambe,
swi herisile miti ya matimba
ni ku tlhantlha miti ya vakulukumba.
15Ku lumbeta swi hambanisile nsati ni nuna,
swi tekerile vavasati mihandzu ya mintirho ya vona.
16La yingisaka munhu loyi a lumbetaka, a nga ka a nga kumi ku wisa,
hambi ku ri ku hanya hi ku rhula.
17Laha ximoko xi baka kona ka pfimba,
kambe ririmi ri tshova marhambu.
18Vanhu lava lovisiweke hi ku lumbeta va tele
ku tlula lava dlayiweke hi tlhari.
19Ku katekile munhu loyi a nga siki lumbetiwaka,
loyi a nga siki hlanganaka ni vukari bya kona,
loyi a nga siki rhwalaka joko ra kona
ni ku bohiwa hi timpecana ta kona,
20[hikuva joko ra kona i ra nsimbhi
ni timpecana ta kona ti tika swinene.]
21Ku lumbeta ku vanga rifu ro vavisa,
hambi xi ri xivandla xa vafi xi antswa ku tlula ku lumbetiwa.
22Vakhongeri a va hluriwi hi ku lumbeta,
va nga ka va nga hisiwi hi malangavi ya kona.
23Ku lumbeta ku hlula lava tshikeke Xikwembu,
ku ta pfurha exikarhi ka vona, kutani ku nge timeriwi.
Ku ta va bvanyangeta tanihi nghala
ni ku va handzulela tanihi yingwe.
24Tivonele leswaku u biyelela hinkwaswo leswi u nga na swona hi rihlampfu ra mitwa,
lotlelela silivhere ni nsuku wa wena.
25Tikarhate swinene hi leswi u vulavulaka swona,
pima rito ra wena rin'wana ni rin'wana, u tikhoma eku vulavuleni ka wena.
26Tivonele leswaku u nga tshuki u dyoha hi ririmi ra wena,
kutani u ta wela emavokweni ya nala loyi a ku tumbelelaka.
