Vutlhari 2

₁Lavo homboloka va hoxa loko va tibyela va ku:

“Vutomi bya hina byi komile ngopfu, byi tele mahlomulo.

A ku na nchumu wo sivela rifu.

Ku hava na un'we loyi a rheleleke a ya exivandleni xa vafi a tlhela a vuya.

₂Hi velekiwile swi nga languteriwanga,

hi ta hundza onge a hi vanga kona.

Ku hefemula ka hina ku hangalaka kukota musi,

ku ehleketa ka hina ku vangiwa hi ku ba ka timbilu ta hina.

₃Loko mbilu yo timeka, miri wa hina wu ta hundzuka nkuma,

ku hefemula ka hina ku ta hangalaka tanihi ximoyana.

₄Vito ra hina ri ta nyamalala evanhwini,

mintirho ya hina yi nga ka yi nga ha tsundzukiwi hi munhu.

Vutomi bya hina byi ta hatla byi hundza kukota papanyana,

byi ta hangalaka tanihi hunguva leyi n'okisiwaka hi ku hisa ka dyambu.

₅Masiku ya ku hanya ka hina ma hatla ma hundza tanihi ndzhutinyana.

Siku ra ku fa a ri balekiwi, ri vekiwile,

ku hava loyi a nga ri tlherisaka.”

₆Lavo homboloka va tibyela va ku:

“Tanani, a hi titsakiseni hi leswinene leswi nga kona,

hi tiphina emisaveni hilaha hi tiphineke hakona evuhlangini bya hina hi nga ri na mhaka na nchumu.

₇A hi nweni vhinyo yo durha, hi xurha, hi ya lava swinun'hweriso swa nkoka.

Hi nga tshiki xiluva ni xin'we lexi balekaka enkarhini wa ximun'wana.

₈A hi tibombiseni hi tiharhi ta swiluva swa mavalavala swi nga si vuna.

₉A hi hlanganeni hinkwerhu, hi titsakisa hi makwanga ya hina,

hi siya hinkwako switsundzuxo swa kona.

Hi ko ku averiwa ka hina ni ndzhaka ya hina!

₁₀“Hi ta xanisa swisiwana leswi lulameke;

tinoni ni lava dyuhaleke, a hi nga va xiximi.

₁₁Hi ta tivula lavo lulama loko hi ri ni matimba yo kuma leswi hi swi navelaka.

Lava tsaneke a va vuyeriwi hi nchumu.

₁₂A hi tumbeleleni lavo lulama,

hikuva va hi karhata ni ku kaneta swiendlo swa hina.

Va hi tshinya loko hi tlula nawu,

loko hi tshika mikhuva ya vatata wa hina, va hi veka nandzu.

₁₃Va vula leswaku va tiva Xikwembu,

va tivula vana va xona.

₁₄Makungu ya hina va ma sivela,

kutani a ha ha lavi ku va vona.

₁₅Mahanyelo ya vona a ma fani ni ya van'wana,

tindlela ta vona ti hambana ni ta hina.

₁₆Lavo lulama va ehleketa leswaku mahanyelo ya hina ma soleka swinene,

tindlela ta hina va ti papalata onge ti nyamile.

Va tshemba leswaku hi vona ntsena va nga ta fa hi ntsako,

va tidzunisa va vula leswaku Xikwembu i tata wa vona.

₁₇Hi ta vona loko va vulavula ntiyiso,

hi ta xiya leswi nga ta humelela esikwini ra ku fa ka vona.

₁₈Loko lavo lulama va ri vana va Xikwembu, xona xi ta va pfuna,

xi ta va ponisa emavokweni ya valala va vona.

₁₉A hi va ringeni hi ku va hlekula ni ku va xanisa swinene,

kutani hi ta vona loko va ri ni musa hakunene,

ni leswaku va tiyisela ku fika kwihi.

₂₀Hi ta va avanyisela rifu ro khomisa tingana,

hikuva va vula leswaku Xikwembu xi ta va sirhelela.”

₂₁Lavo homboloka va anakanya hi ndlela leyi, kambe va lahlekile,

ku homboloka ka vona ku va pfala mahlo.

₂₂A va tivanga makungu ya Xikwembu ya le xihundleni,

hakelo ya vutomi lebyo hlawuleka, byo pfumala xisolo, a va yi langutelanga.

₂₃Xikwembu xi tumbuluxile vanhu leswaku va hanya hilaha ku nga heriki,

xi va endla hi xifaniso xa xona, va fana na xona.

₂₄Rifu ri nghenile emisaveni hikwalaho ka mavondzo ya Diyavulosi,

kutani lava va n'wi landzaka va ta lova.