Eliša o thusa mosadi wa motlholagadi
1Mosadi mongwe wa basadi ba bomorwa baperofeti a isa selelo kwa go Eliša, a re: “Motlhanka wa gago, monna wa me, o sule; o a itse fa motlhanka wa gago a ne a boifa Jehofa; mme motho yo go tshotsweng dilo molato mo go ene o tsile go itseela bana ba me ba babedi go ba ntsha batlhanka.”
2Eliša a mo raya a re: “Ke tlaa go direlang? Mpolelela, o na le eng mo ntlong?” A re: “Lelata la gago ga le na sepe mo ntlong, fa e se nkgwanyana ya lookwane.”
3Foo a re: “Ya o adime dinkgwana mo go bagaeno botlhe fela, e bong dinkgwana tse di se nang sepe; o di adime di se dinnye. 4O tsene mo ntlong, o itswalele mo teng le bomorwao, o bo o thele lookwane mo dinkgwaneng tseo tsotlhe; tse di tletseng o di beye fa thoko.”
5Jalo a tloga fa go ene a ya a itswalela le bomorwawe; bone ba isa dinkgwana kwa go ene, ene a di thela. 6Ga dirala ya re dinkgwana di sena go tlala, a raya morwawe a re: “Ba o nteretse nkgwana e nngwe gape.” A mo raya a re: “Ga go tlhole go le nkgwana epe.” Mme lookwane lwa ema. 7Foo a tla a bolelela monna wa Modimo. Ene a re: “Ya o rekise lookwane, o duele molato wa gago, o tshele ka lo lo tlaa salang, wena le bomorwao.”
Eliša le mosadi wa mohumi wa Mošuneme
8Ga dirala ya re ka letsatsi lengwe Eliša a fetela kwa Shuneme, kwa go ne go na le mosadi mongwe yo mogolo teng, mosadi a mo rapela thata gore a je dijo. Ga nna jalo, gongwe le gongwe fa a feta, a fapogele gone a ye go ja dijo. 9Mosadi a raya monna wa gagwe a re: “Ke lemoga fa monna yo o tlholang a feta ka rona e le monna yo o itshepileng wa ga Jehofa. 10Ke a go rapela, a re ke re dire ntlwana mo lorakong; re mo alele bolao gone, le lomati lwa bojelo, le setulo, le setlhomo sa lobone; go tlaa dirala go re fa a tla ka rona a fapogele gone.”
11Ga dirala ya re ka letsatsi lengwe, a tla gone, a fapogela mo ntlwaneng, a rapama gone. 12A raya Gehasi motlhanka wa gagwe a re: “Bitsa Mošuneme yoo.” Ya re a sena go mmitsa, a tla a ema fa pele ga gagwe. 13A mo raya a re: “O reye mosadi o re: Bona, o re bolokile ka poloka yotlhe e; o ka direlwang? A o rata go buelelwa kwa kgosing, kgotsa mo molaoding wa ntwa?” Mosadi a mo fetola a re: “Ke agile fela mo bathong ba gaetsho.”
14Mme a re: “Ana foo o ka direlwang?” Gehasi a re: “Ruri, ga a na ngwana wa mosimane, le monna wa gagwe o tsofetse.”
15A re: “Mmitse.” Ya re a sena go mmitsa, a tla a ema fa mojakong. 16Eliša a re: “E tlaa re go le nako eno, fa motlha o fitlhile, o tlaa tlamparela ngwana wa mosimane.” Mme mosadi a re: “Nnyaa, morena wa me, monna wa Modimo, o se ka wa aketsa lelata la gago.”
17Mme mosadi a ithwala, a bona ngwana wa mosimane mo lobakeng loo, motlha o sena go fitlha, jaaka Eliša a mo reile.
18E rile ngwana a sena go gola, ga dirala ya re ka letsatsi lengwe, a tswela kwa go rraagwe kwa baseging ba mabele. 19A raya rraagwe a re: “A tlhogo ya me! a tlhogo ya me!” A raya motlhanka wa gagwe a re: “Mo ise kwa go mmaagwe.” 20E rile a sena go mo tsaya, a mo isitse kwa go mmaagwe, a dula mo mangoleng a gagwe go ya motshegareng, a itse go swa. 21Mmaagwe a ya a mmaya mo bolaong jwa monna wa Modimo, a mo tswalela, mme a tswa. 22A bitsa monna wa gagwe a re: “Ke a go rapela, a ko o nthomele motlhanka mongwe, le esela nngwe, gore ke sianele kwa monneng wa Modimo, ke itse go tla.”
23Monna a re: “O elang kwa go ene gompieno? Ga go rogwe kgwedi, e bile ga go Sabata.” Mosadi a re: “Nnyaa, lesa go siame fela.” 24Foo a belesa esela, a raya motlhanka wa gagwe a re: “E kgweetse, re tsamaye; o se ka wa ntiya mo loetong fa ke sa go laole jalo.” 25Jalo a tsamaya, a ya a fitlha kwa monneng wa Modimo kwa thabeng ya Karemele. Ga dirala ya re monna wa Modimo a mmona a sa le kgakala, a raya motlhanka wa gagwe Gehasi a re: “Bona, mosadi wa Mošuneme ke yole. 26A ko o siane o ye go mo kgatlhantsha, o mo reye o re: A go molemo koo go wena? A go molemo koo monneng wa gago, a go molemo koo ngwaneng?” Mosadi a fetola a re: “Go molemo.” 27Ya re a fitlha kwa monneng wa Modimo kwa thabeng, a mo tshwara dinao. Gehasi a atamela a re o a mo kgorometsa; mme monna wa Modimo a re: “Mo lese, gonne mowa wa gagwe o hutsafetse mo teng ga gagwe; Jehofa o go ntobetse, ga a ka a mpolelela.”
28Foo mosadi a re: “A nkile ka eletsa ngwana wa mosimane mo moreneng wa me? A ga a re: O se ka wa ntsietsa?”
29Foo a raya Gehasi a re: “Ikokwaele lotheka, o tseye tsamma ya me mo seatleng, o tsamaye; fa o kopana le mongwe, o se ka wa mo dumedisa; fa mongwe a go dumedisa, o se ka wa mo araba; mme o fitlhe o beye tsamma ya me mo sefatlhogong sa ngwana.”
30Mma ngwana a re: “Jaaka Jehofa a tshedile, le jaaka mowa wa gago o tshedile ga nketla ke go tlogela.” A nanoga, a sala mosadi morago. 31Gehasi a ba fetela pele, a fitlha a baya tsamma mo sefatlhogong sa ngwana; mme go ne go se na lentswe, le fa e le kutlo. Ka ntlha ya moo a boa a tla go mo kgatlhantsha, a mmolelela a re: “Ngwana ga a tsoge.”
32Ya re Eliša a sena go tla mo ntlong, bonang, ngwana a bo a sule, a bile a beilwe mo bolaong jwa gagwe. 33Foo a tsena, a ikgoseletsa mo ntlong ba le babedi nae, a rapela Jehofa. 34A ya a rapama mo godimo ga ngwana, a baya molomo wa gagwe mo molomong wa gagwe, le matlho mo matlhong a gagwe, le diatla tsa gagwe mo diatleng tsa gagwe; a ikotlololela mo go ene; mme nama ya ngwana ya thuthafala. 35Foo a boa, a tsamayatsamaya mo ntlong gangwe fela; a ba a ya a ikotlololela mo go ene; mme ngwana a ethimola gasupa, ngwana a ba a budulola matlho. 36A bitsa Gehasi, a re: “Bitsa motho yo wa Mošuneme.” A bitsa mosadi. Ya re a sena go tsena kwa go ene, a re: “Tsaya morwao.” 37Foo a tsena, a wela fa dinaong tsa ga Eliša, a ikobela fa fatshe; a tsaya morwawe, mme a tswa.
Dikgakgamatso tse dingwe gape tsa ga Eliša
38Eliša a boela gape kwa Gilegale; go ne go le leuba mo lefatsheng; bomorwa baperofeti ba ne ba dutse fa pele ga gagwe. Mme a raya motlhanka wa gagwe a re a tlhatlaye pitsa e kgolo, a apeele bomorwa baperofeti logodu. 39Mongwe a tswela kwa nageng a ya go ga merogo, mme a fitlhela menamo, a gokga mosumo mongwe mo go yone wa tlala ka kobo ya gagwe, a tla a o gabelela mo pitseng ya logodu; gonne ba ne ba sa o itse. 40Ba tsholela banna bao, gore ba je. Ga dirala ya re ba ja logodu ba goa ba re: “Monna wa Modimo wee, go na le loso mo pitseng!” Mme ba retelelwa ke go e ja. 41A re: “Lereng boupe.” A bo fagela mo pitseng, a re: “Tsholelang batho gore ba je.” Mme ga bo go sa tlhole go le molato ope mo pitseng.
42Ga tla monna mongwe a tswa Baale-Šališa, a lereditse monna wa Modimo dinkgwe tsa mabutswapele, dinkgwe tsa barele di le 20, le diako tse dintšha tsa mabele mo kgetsing ya gagwe. Mme a re: “Nayang batho ba je.” 43Mme motlhanka wa gagwe a re: “Wa reng? A ke ke beye go mo fa pele ga banna ba le lekgolo?” Mme ene a re: “Naya batho fela, gore ba je; gonne Jehofa o bua jaana, a re: ‘Ba tlaa ja ba ba ba sadisa.’ ” 44Mme a se baya fa pele ga bone, mme ba ja, ba sadisa, jaaka lefoko la ga Jehofa.
