EKESODO 27

₁“Sebeso o se dire ka dikgong tsa mokala, boleele jwa sone bo nne jwa dimetara di le 2,2 le boatlhamo bo nne jwa dimetara di le 2,2; sebeso se nne dintlha di le nne tse di lekalekanang; bogodimo jwa sone bo nne jwa dimetara di le 1,3. ₂O dire dinaka tsa sone di nne mo diphakeng tse nne tsa sone; dinaka tsa sone di direlwe gongwe fela naso go se na kgaogano, mme o se manege kgotlho. ₃O se direle diolela melora tsa sone le digopa melora tsa sone, le megotšana ya sone, le dikgogetsa nama tsa sone, le ditsaya melelo tsa sone; dilwana tsotlhe tsa sone o di dire ka kgotlho. ₄O se direle leiso le le setlatla ka kgotlho, se se logilweng selotloa, mme lotloa loo o lo direle melepo e le mene ya kgotlho mo dintlheng tsa lone tse nne. ₅O lo huhumetse ka fa tlase ga maemo a a dikologileng sebeso, gore lotloa lo fitlhe kwa bogareng jwa ditlhakore tsa sebeso. ₆O direle sebeso disikaro, disikaro tsa mokala, mme o di manege kgotlho. ₇Disikaro tsa sone di somelwe mo melepong ka fa ditlhakoreng tse pedi tsa sebeso fa se sikarwa. ₈O se dire kgapa ka dimati; jaaka o kaetswe mo thabeng, o se dire fela jalo.

₉“O dire lolwapa lwa motlaagana; ntlheng e e lebileng kwa borwa, lolwapa lo dire le matsela a a lepeletseng a leloba le le boleta le le otlhilweng bosesane, a lo nne boleele jwa dimetara di le 44 ka ntlha e nngwe; ₁₀maotwana a lone a nne 20, le ditlhako tsa one di nne 20, tsa kgotlho, dikgoge tsa maotwana le dipalelo tsa one di nne tsa selefera. ₁₁Le gone ntlheng ya botsheka mo boleeleng jwa one go nne matsela a a lepeletseng a a boleele jwa dimetara di le 44, maotwana a lone a nne 20, ditlhako tsa one di nne 20; dikgoge tsa maotwana le dipalelo tsa one a di nne tsa selefera. ₁₂Le boatlhamo jwa lolwapa ntlheng ya bophirimatsatsi a bo dire le matsela a a lepeletseng a le dimetara di le 22; maotwana a one a nne some, le ditlhako tsa one di nne some. ₁₃Boatlhamo jwa lolwapa ntlheng ya botlhabatsatsi bo nne dimetara di le 22. ₁₄Matsela a a lepeletseng a ntlha e nngwe ya mojako a nne boleele jwa dimetara di le 6,6, maotwana a one a nne mararo le ditlhako di nne tharo. ₁₅Ntlha e nngwe go nne matsela a a lepeletseng a a dimetara di le 6,6; maotwana a one a nne mararo le ditlhako tsa one di nne tharo. ₁₆Kgoro ya lolwapa a e dire le sebipo se se boleele jwa dimetara di le 9, sa bobududu, le bohibidu jo bo mokgona, le bohibidu jo bo letlhololo, sa leloba le le boleta le le otlhilweng bosesane, sa tiro ya motsantsabetsi; maotwana a sone a nne mane le ditlhako tsa one di nne nne. ₁₇Maotwana otlhe tikologong ya lolwapa a a balelwe ka selefera; dikgoge tsa one e nne tsa selefera, ditlhako tsa one e nne tsa kgotlho. ₁₈Boleele jwa lolwapa a bo nne boleele jwa dimetara di le 44, le boatlhamo bo nne jwa dimetara di le 22 gotlhe, le bogodimo bo nne jwa dimetara di le 2,2, e nne jwa leloba le le boleta le le otlhilweng bosesane, ditlhako tsone e nne tsa kgotlho. ₁₉Dilwana tsotlhe tsa motlaagana, tsa tirelo yotlhe ya one, le dimapo tsa one otlhe, le dimapo tsotlhe tsa lolwapa, a e nne tsa kgotlho.

₂₀“O laole bana ba Iseraele gore ba go leretse lookwane lo lo sa pekwang lwa motlhware, lo lo kgobilweng, go dira lesedi, gore lo tukise lampa ka metlha yotlhe. ₂₁Mo mogopeng wa bophuthegelo, fa ntle ga sesiro se se fa pele ga tshupo, a Arone le bomorwawe ba nne ba go rulaganye fa pele ga Jehofa, ba tsene maitseboa go ya mosong; e nne molao ka bosakhutleng go ya le dikokomana tsa bone, ba dire ba le mo boemong jwa bana ba Iseraele.