Iseraele o boela gae
1“E tlaa re mo motlheng oo,” go bua Jehofa, “ke tlaa nna Modimo wa ditshika tsotlhe tsa Iseraele, mme ba tlaa nna batho ba me.” 2Jehofa o bua jaana, a re: “Batho ba ba tlogetsweng ke tšhaka ba bonye tlhogonolofatso mo nageng, e bong Iseraele, jale ka ke ne ke ile go mo ikhutsisa.” 3Jehofa bogologolo o kile a mponalela, a re: “Ee, ke go ratile ka lorato lo lo sa khutleng; ke gone ka moo ke go gogileng ka bopelonomi jwa lorato. 4Ke tlaa ba ke go aga, mme o tlaa agiwa, wena kgarebana ya Iseraele; o tlaa ba o kgabisiwa ka meropana ya gago, mme o tlaa tswela mo dipineng tsa ba ba dirang mokete. 5O tlaa ba o tlhoma masimo a mafine mo dithabeng tsa Samaria; batlhomi ba tlaa tlhoma, mme ba tlaa ja loungo lwa gone monate. 6Gonne go tlaa nna letsatsi le balebedi ba ba mo makgabaneng a Eferaime ba tlaa opang mokgosi ka lone ba re: ‘Nanogang, a re tlhatlogeleng kwa Sione, kwa go Jehofa Modimo wa rona.’ ”
7Gonne Jehofa o bua jaana, a re:
“Opelang ka boitumelo ka ga
Jakobe,
lo theleng lošalaba
ka ga yo mogolo wa merafe;
lo boleleng, lo bake, lo re:
‘Jehofa, boloka batho ba gago,
masalela a Iseraele.’
8Bonang, ke tlaa ya go ba tlisa
kwa lefatsheng la botsheka,
ke tlaa ba phutha
kwa dikhutlong tsa lefatshe,
ba na le difofu, le batlhotsi,
mosadi yo o ithweleng,
le yo o mo pelegong ba le mmogo,
ba tlaa boela kwano
ba le lesomo le legolo.
9Ba tlaa tla ka selelo,
ke tlaa ba goga ka mekokotlelo;
ke tlaa ba tsamaisa
fa dinokeng tsa metsi,
mo tseleng e e siameng
e ba se ketlang ba kgokgweetsega
mo go yone;
gonne ke rraabo Baiseraele,
mme Eferaime ke ngwana wa me
wa ntlha.
10“Utlwang lefoko la ga Jehofa,
lona merafe,
lo le kakanye mo ditlhakeng
tse di kwa kgakala;
lo re: ‘Ene yo o faladitseng Iseraele
o tlaa mo phutha,
a mo dibela, jaaka modisa
a tle a dibele letsomane la gagwe.’
11Gonne Jehofa o rekolotse Jakobe,
a mo rekolola mo seatleng
sa yo o ne a le thata bogolo go ene.
12Ba tlaa tla ba opela
mo thoteng ya Sione,
ba tlaa sailela mmogo
kwa molemong wa ga Jehofa,
kwa mabeleng,
le kwa bojalweng jwa mofine,
le kwa lookwaneng,
le kwa loonyaneng lwa letsomane
le lwa matlhape;
mowa wa bone
o tlaa nna jaaka tshimo
e e nosiwang;
mme ga ba ketla ba tlhola
ba hutsafala gope.
13Foo kgarebane e tlaa itumela
mo pineng,
le makau le banna bagolo mmogo;
gonne khutsafalo ya bone
ke tlaa e fetola boitumelo,
ke tlaa ba gomotsa,
ke ba itumedisa,
ba tswa mo bohutsaneng jwa bone.
14Ke tlaa thethebatsa mowa wa
baperesiti ka mafura,
le batho ba me
ba tlaa kgora molemo wa me,”
go bua Jehofa.
Morena o itshwarela Iseraele
15Jehofa o bua jaana, a re:
“Go utlwala lentswe mo Rama,
khutsafalo, le selelo se sebe,
Ragele o lelela bana ba gagwe;
o gana go gomodiwa
ka ga bana ba gagwe,
ka ba seyo.”
16Jehofa o bua jaana, a re:
“Thiba lentswe la gago mo selelong,
le matlho a gago mo dikeleding,
gonne tiro ya gago e tlaa duelwa,”
go bua Jehofa;
“mme ba tlaa ba ba boa
kwa lefatsheng la mmaba.
17Go na le tsholofelo
ka ga bokhutlo jwa gago,”
go bua Jehofa;
“mme bana ba gago
ba tlaa ba ba boela molelwaneng
o e leng wa bone.
18Ruri ke a bo ke utlwile Eferaime
a itelela, a re:
‘O mpeditse, mme ka bediwa,
jaaka namane e e sa tlwaelang
jokwe;
a ko o ntshokolole,
mme ke tlaa sokologa;
gonne o Jehofa Modimo wa me.
19Ruri ya bo e rile ke sena
go sokololwa,
ka ikwatlhaya;
ke sena go rutwa,
ka ipata serope;
ka tlhajwa ke ditlhong,
ee, ka sosobagana,
ka gonne ke ne ke rwele kgobo
ya bokau jwa me.’
20A Eferaime ke morwaake
yo o rategang?
A ke ngwana yo o kgatlhang?
Gonne jaaka ke ntse ke mo nyatsa
ke be ke ntse ke mo gakologetswe
ka thata;
ke gone ka moo mala a me
a ba a ntse a mo huduegela;
ruri ke tlaa mo utlwela botlhoko,”
go bua Jehofa.
21“Itlhomele dikai tsa tsela,
o itirele ditlhaloganyetso tsa ditsela;
lebisa pelo ya gago kwa tseleng
ya mheru, e bong tsela
e o kileng wa tsamaya ka yone;
ba o boe,
wena kgarebana ya Iseraele,
ba o boele mo metseng e ya gago.
22O tlaa nna o ya kwa le kwa
ka lobaka lo lo kaye
wena mosetsana wa tenego?
Gonne Jehofa o tlhodile sengwe
se seša mo lefatsheng,
ke go re mosadi
o tlaa dikanyeletsa monna.”
Botshelo jo bo tlang jo bo solofetsang
23Jehofa wa masomosomo, Modimo wa Iseraele, o bua jaana, a re: “Ba tlaa ba ba bua puo e mo lefatsheng la Juta le mo metseng ya teng, mogang ke sokololang botshwaro jwa bone, ba re: ‘A Jehofa a go segofatse, wena bonno jwa tshiamiso, wena thaba e e boitshepo.’ 24Ba Juta le metse yotlhe ya teng ba tlaa nna mmogo mo go lone; balemi ba lefatshe, le ba ba tsamayang le matsomane. 25Gonne ke thethebaditse mowa o o lapileng, le mongwe le mongwe yo o hutsafalang ke mo etleeleditse.”
26Foo ka kubuga, ka leba; mme boroko jwa me bo ne bo le monate mo go nna.
27“Bonang, metlha e etla,” go bua Jehofa, “e ke tlaa jalang ka yone peo ya motho, le peo ya kgomo, mo ntlong ya Iseraele, le mo ntlong ya Juta. 28Mo go tlaa dirala, go re jaaka ke ntse ka nna ka ba lebela go kumola le go thuba, le go pitikolola le go senya, le go utlwisa botlhoko, ke tlaa ba lebela jalo go ba aga le go ba tlhoma,” go bua Jehofa. 29E tlaa re mo metlheng eo ga ba ketla ba tlhola ba bua, ba re: “Borra bana ba jele difine tse di botlha, mme meno a bana a dilafetse.” 30Mongwe le mongwe o tlaa swela boikepo jwa gagwe tota; motho mongwe le mongwe yo o jang difine tse di botlha ke ene meno a gagwe a tlaa dilafalang.
31“Bonang, metlha e e tla,” go bua Jehofa, “e ke tlaa dirang kgolagano e ntšha ka yone le ba ntlo ya Iseraele, le ba ntlo ya Juta. 32E seng ka fa kgolaganong e nkileng ka e dira le borraabo jale mo motlheng o ke ba tshwereng ka letsogo ka one, ka ba ntsha mo lefatsheng la Egepeto; mme kgolagano eo ya me ba ne ba e senya, le fa ke ne ke le monna wa bone,” go bua Jehofa. 33“Kgolagano e ke tlaa e dirang le ba ntlo ya Iseraele morago ga metlha eo ke e,” go bua Jehofa. “Ke tlaa tsenya molao wa me mo teng ga bone, ke o kwala mo pelong tsa bone. Ke tlaa nna Modimo wa bone, le bone ba tlaa nna batho ba me. 34Ga ba ketla ba tlhola ba ruta mongwe le mongwe wa ga gabo, le mongwe le mongwe ngwana a rraagwe, ba re: ‘Itse Jehofa;’ gonne ba tlaa nkitse botlhe fela, go simolola ka yo mmotlana go ya go yo mogolo mo go bone,” go bua Jehofa; “gonne ke tlaa ba itshwarela boikepo jwa bone, le boleo jwa bone ga nketla ke tlhola ke bo gakologelwa gope.”
35Go bua jaana Jehofa,
yo o beileng letsatsi
gore le nne lesedi motshegare,
le melao ya kgwedi le ya dinaledi
gore di nne lesedi mo bosigong;
yo o huduang lewatle,
mme dinteelo tsa lone di faologe;
Jehofa wa masomosomo
ke leina la gagwe.
36“Fa ditao tse,
di tloga fa pele ga me,”
go bua Jehofa,
“foo le losika lwa Iseraele
lo tlaa khutla go tlhola e le morafe
fa pele ga me ka bosakhutleng.”
37Go bua jaana Jehofa, a re:
“Fa legodimo kwa godimo
le ka lekanngwa
le metheo ya lefatshe kwa tlase,
fa e ka hukudiwa,
foo le nna ke tlaa latlha
losika lotlhe lwa Iseraele
ka ntlha ya tsotlhe
tse ba di dirileng,”
go bua Jehofa.
38“Bonang, metlha e etla,” go bua Jehofa, “motse o, o tlaa agelwa Jehofa, go tswa kagong e e godileng ya ga Hananele go ya kgorong ya kgokgotsho. 39Le thapo e e lekanyang e tlaa nama e tlhamalalela kwa lekhubung la Garebe, mme e tlaa menogela kwa Goa. 40Mogogoro otlhe o o ditotototo le o o melora, le matlhagare otlhe go ya kwa molatswaneng wa Kiterone, go ya kwa kgokgotshong ya kgoro ya dipitse ntlheng ya botlhabatsatsi, go tlaa itshepela Jehofa; ga go ketla go tlhola go kumolwa, le fa e le go digwa gope ka bosakhutleng.”
