Baruke o bala molaetsa o o mo momenong wa lokwalo mo tempeleng
1Ga dirala, ya re ka ngwaga wa bone wa ga Jehoiakime morwa Josia, kgosi ya Juta, lefoko le, la tla mo go Jeremia le tswa kwa go Jehofa, la re: 2“Tsaya momeno mongwe wa lokwalo, mme o kwale mo go one mafoko otlhe a ke a buileng nao ke nyatsa Iseraele, le Juta, le merafe yotlhe, go simolola ka letsatsi le ke buileng nao ka lone, go simolola ka metlha ya ga Josia, go tla mo lobakeng lwa gompieno. 3E ka tla ya re gongwe ba ntlo ya Juta ba utlwele bosula jotlhe jo ke ikaeletseng go bo ba direla; gore ba bowe, mongwe le mongwe mo tseleng ya gagwe e e bosula; gore ke ba itshwarele boikepo jwa bone le boleo jwa bone.”
4Foo Jeremia a bitsa Baruke morwa Neria; mme Baruke a tsaya mo molomong wa ga Jeremia mafoko otlhe a Jehofa, a o a buileng nae, a a kwala mo momenong wa lokwalo. 5Jeremia a laola Baruke, a re: “Ke tswaletswe; ke retelelwa ke go ya kwa ntlong ya ga Jehofa. 6Ke gone a go ye wena, mme o bale mafoko a ga Jehofa a a mo momenong o o o kwadileng, o a tsaya mo molomong wa me, o a bale mo ditsebeng tsa batho mo ntlong ya Jehofa, ka letsatsi la go ikitsa go ja; le gone o a bale mo ditsebeng tsa Bajuta botlhe ba ba tswang mo metseng ya bone. 7E ka tla ya re gongwe ba isa mekokotlelo ya bone fa pele ga Jehofa, mme ba boe mongwe le mongwe mo tseleng ya gagwe e e bosula; gonne bogale jwa ga Jehofa bo bogolo, le tšararego ya gagwe e o e buileng ka ga batho ba.” 8Baruke morwa Neria a dira ka fa go tsotlhe tse Jeremia moperofeti o di mo laoletseng, a bala mo lokwalong mafoko a ga Jehofa, mo ntlong ya ga Jehofa.
9Jaana ga dirala, ya re ka ngwaga wa botlhano wa ga Jehoiakime morwa Josia, kgosi ya Juta, ka kgwedi e e ferang o le mongwe fela, batho botlhe ba ba mo Jerusalema, le botlhe ba ba tlang mo Jerusalema ba tswa mo metseng ya Juta, ba kua go ikitsa go ja fa pele ga Jehofa. 10Foo Baruke a bala mo lokwalong mafoko a ga Jeremia, a a bala mo ntlong ya ga Jehofa, mo ntlwaneng ya ga Gemaria morwa Shafane mokwadi, mo lwapeng lwa godimo, fa botsenong jwa kgoro e ntšha ya ntlo ya ga Jehofa, a a bala mo ditsebeng tsa batho botlhe.
Molaetsa o o mo momenong o balelwa baeteledipele
11E rile Mikaia morwa Gemaria, morwa Shafane a sena go utlwa mafoko otlhe a ga Jehofa a a mo lokwalong, 12a fologela kwa ntlong ya kgosi, a ya mo ntlwaneng ya mokwadi, mme bonang, dikgosana tsotlhe tsa bo di dutse gone, e bong Elišama mokwadi, le Delaia morwa Shemaia, le Elenathane morwa Akebore, le Gemaria morwa Shafane, le Setekia morwa Hanania, le dikgosana tsotlhe. 13Foo Mikaia a ba kakanyetsa mafoko otlhe a o a utlwileng ka Baruke jaaka a bala lokwalo mo ditsebeng tsa batho. 14Ke gone ka moo dikgosana tsotlhe tsa roma Jehudi morwa Nethania, morwa Shelemia, morwa Kuši, kwa go Baruke, ba re: “Tsaya momeno o o badileng mo go one mo ditsebeng tsa batho, mme o tle nao.” Jalo Baruke morwa Neria a tsaya momeno, a ya nao kwa go bone. 15Ba mo raya, ba re: “Dula, mme o o bale mo ditsebeng tsa rona.” Jalo Baruke a o bala mo ditsebeng tsa bone. 16Jaana ga dirala, e rile ba sena go utlwa mafoko ao otlhe, ba retologanela ka poifo, ba raya Baruke, ba re: “Ruri mafoko otlhe a re tlaa a bolelela kgosi.” 17Mme ba botsa Baruke, ba re: “A ko o re bolelele, o kwadile jang mafoko otlhe a ka molomo wa gagwe?”
18Foo Baruke a ba fetola, a re: “O ne a mpolelela mafoko otlhe a ka molomo, mme ka a kwala ka enke mo Lokwalong.”
19Foo dikgosana tsa raya Baruke tsa re: “Ya o iphitlhe, wena le Jeremia; go se ka ga itse ope kwa lo leng teng.”
Kgosi e tshuba lokwalo
20Ba ya ba tsena kwa kgosing kwa lwapeng; ba bo ba beile momeno mo ntlwaneng ya ga Elišama mokwadi, mme ba bolela mafoko otlhe mo ditsebeng tsa kgosi. 21Jalo kgosi ya roma Jehudi a ya go lere momeno; a o tsaya mo ntlwaneng ya ga Elišama mokwadi, mme Jehudi a o bala mo ditsebeng tsa kgosi, le mo ditsebeng tsa dikgosana tsotlhe tse di emeng fa kgosing. 22Jaana kgosi ya bo e ne e dutse mo ntlong ya mariga go le kgwedi e e ferang o le mongwe fela; go ne go tuka molelo mo leiswaneng fa pele ga yone. 23Ga dirala, ya re Jehudi a sena go bala ditsebe di le tharo kgotsa di le nne, kgosi ya o sega ka thipana, ya o latlhela mo molelong o o mo iswaneng, ga tsamaya momeno otlhe wa jewa ke molelo o o mo iswaneng. 24Mme ba bo ba sa boife, le fa e le go ikgagola diaparo, le fa e le kgosi, le fa e le ope wa batlhanka ba yone ba ba utlwileng mafoko otlhe ao. 25Gape Elenathane le Delaia le Gemaria, ba ne ba rapetse kgosi gore e se ka ya fisa momeno; mme ya gana go ba utlwa. 26Kgosi ya laola Jerameele morwa kgosi, le Seraia morwa Aseriele, le Shelemia morwa Abeteele, gore ba ye go tshwara Baruke mokwadi le Jeremia moperofeti; mme Jehofa a ba fitlha.
Jeremia o kwala lokwalo lo longwe
27Foo lefoko la ga Jehofa la tla mo go Jeremia, kgosi e sena go fisa momeno, le mafoko a Baruke o a kwadileng ka molomo wa ga Jeremia, la re: 28“Ba o tseye momeno o mongwe, o kwale mo go one mafoko otlhe a pele, a a ne a le mo momenong wa ntlha, o Jehoiakime kgosi ya Juta o o fisitseng. 29Ka ga Jehoiakime kgosi ya Juta, o bue, o re: ‘Jehofa o bua jaana, a re: O fisitse momeno oo, wa re: Ana o kwaletseng mo go one, wa re: Kgosi ya Babilone e tlaa tla ruri e senya lefatshe le, e ba e fedisa motho le kgomo teng? 30Ke gone ka moo Jehofa o bua jaana a re, ka ga Jehoiakime kgosi ya Juta: Ga a ketla a dirana le ope yo o tlaa dulang mo setulong sa ga Dafite sa bogosi; mme setoto sa gagwe se tlaa latlhelwa kwa ntle motshegare, se nne mo mogoteng le bosigo mo serameng. 31Ene le losika lwa gagwe le batlhanka ba gagwe ke tlaa ba beletsa boikepo jwa bone; mo go bone, le mo banning ba Jerusalema, le mo banneng ba Juta, ke tlaa tlisa bosula jo ke bo buileng ka ga bone, mme ba se ka ba utlwa.’ ”
32Foo Jeremia a tsaya momeno o mongwe, a o neela Baruke mokwadi morwa Neria; mme ene a kwala mo go one ka molomo wa ga Jeremia mafoko otlhe a lokwalo lo Jehoiakime kgosi ya Juta o lo fisitseng ka molelo; mme a okediwa ka mafoko a mangwe a le mantsi a a tshwanang nao.
