JEREMIA 37

₁Setekia morwa Josia a busa e le kgosi mo boemong jwa ga Konia morwa Jehoiakime, yo Nebukateresare kgosi ya Babilone o mmeileng kgosi mo lefatsheng la Juta. ₂Go ne go le ene, le batlhanka ba gagwe, le batho ba lefatshe; ga ba a ka ba reetsa mafoko a ga Jehofa, a o a buileng ka moperofeti Jeremia.

₃Kgosi Setekia a roma Jehukale morwa Shelemia, le Sefania morwa Maaseia moperesiti, kwa go Jeremia moperofeti, a re: “A ko o re rapelele mo go Jehofa Modimo wa rona.” ₄Jaana Jeremia a bo a ntse a tsamayatsamaya mo bathong, gonne ba ne ba ise ba mo tsenye mo ntlong ya kgolegelo. ₅Ntwa ya ga Faro e ne e bolotse kwa Egepeto; mme e rile Bakalatea ba ba tlhaselang Jerusalema ba e utlwela, ba bothologa kwa Jerusalema.

₆Foo lefoko la ga Jehofa la tla mo go moperofeti Jeremia, la re: ₇“Jehofa, Modimo wa Iseraele o bua jaana, a re: Bua jaana le kgosi ya Juta, yo o lo romileng kwa go nna go tla go mpotsa; ‘Bona, ntwa ya ga Faro, e e tsileng go lo thusa, e tlaa boela kwa Egepeto, lefatshe la ga yone. ₈Bakalatea ba tlaa tla gape, ba tlhabana le motse o; mme ba tlaa o gapa, ba o fisa ka molelo.’ ₉Jehofa a bua jaana, a re: Lo se ka lwa itsietsa lwa re: ‘Bakalatea ba tlaa re tlogela ka mmaanete;’ gonne ga ba ketla ba tloga. ₁₀Gonne le fa lo ka bo lo ne lo kgemethile ntwa yotlhe ya Bakalatea ba ba tlhabanang le lona, mme ga sala fela ba ba tlhabilweng mo go bone, le fa go ntse jalo ba ne ba tlaa nanoga, mongwe le mongwe mo mogopeng wa gagwe, ba fisa motse o ka molelo.”

₁₁Ga dirala, e rile ntwa ya Bakalatea e bothologa kwa Jerusalema ka go boifa ntwa ya ga Faro, ₁₂foo Jeremia a tswa mo Jerusalema, a re o ya lefatsheng la Benjamine, a ya go amogela kabelo ya gagwe a le teng mo gare ga batho. ₁₃Ya re a le fa kgorong ya Benjamine, go ne go le mogolwane wa tebelo teng, yo leina la gagwe go tweng Irija, morwa Shelemia, morwa Hanania; a tshwara Jeremia moperofeti, a re: “O ntse jaana o ngwegela kwa Bakalateeng.”

₁₄Foo Jeremia a re: “Ke maaka; ga ke ngwegele kwa Bakalateeng;” mme a se ka a mo reetsa; jalo Irija a tshwara Jeremia, a mo isa kwa dikgosaneng. ₁₅Dikgosana tsa galefela Jeremia, tsa ba tsa mo itaya tsa mo tsenya mo ntlong ya kgolegelo, mo ntlong ya ga Jonathane mokwadi; gonne ba ne ba ntshitse yone ntlo ya kgolegelo. ₁₆E rile Jeremia a sena go fitlha mo ntlong ya molete, le mo dingaleng tsa kgolegelo, mme Jeremia a sa bolo go nna teng malatsi a le mantsi; ₁₇foo Setekia kgosi a roma a ya go mo lere; kgosi ya mmotsa mo sephiring mo ntlong ya yone, ya re: “A go na le lefoko lengwe le le tswang kwa go Jehofa?”

Jeremia a re: “Le gone.” Gape a ba a re: “O tlaa tsenngwa mo seatleng sa kgosi ya Babilone.” ₁₈Gape Jeremia a raya kgosi Setekia, a re: “Ke go leofetse mo go eng, le fa e le batlhanka ba gago, le fa e le batho ba, fa e bo ne ne lo ntsentse mo ntlong ya kgolegelo jaana? ₁₉Ba kae jaanong baperofeti ba lona ba ba lo perofeseditseng, ba re: ‘Kgosi ya Babilone, ga e ketla e tla go tlhabana le lona, le fa e le lefatshe le’? ₂₀Jaana ke a go rapela kgosi, morena wa me, o nkutlwe; ke a go rapela, a mokokotlelo wa me o amogelwe fa pele ga gago; o se ka wa ba wa mpusetsa kwa ntlong ya ga Jonathane mokwadi, nka tla ka swela teng.”

₂₁Foo Setekia kgosi a laola, mme ba tsenya Jeremia mo lwapeng lwa balebedi, ba mo naya ka malatsi otlhe senkgwe se le sengwe fela se se tswang mo mmileng wa babesi ba senkgwe, ga tsamaya senkgwe sotlhe sa fela mo motseng. Jeremia a nna jalo mo lwapeng lwa balebedi.