Pesalema 82

₁Modimo o eme mo phuthegong

ya ona Modimo;

o atlhola fa gare ga medimo.

₂“Lo tlaa atlhola ka go sa siamang

ka lobaka lo lo kaye,

lo tlotla sebele sa baikepi? Sela.

₃Atlholelang bahumanegi le masiela;

direlang ba ba patikwang le batlhoki

tshiamo.

₄Falodisang bahumanegi le batlhoki;

ba gololeng mo seatleng sa baikepi.

₅Ga ba itse,

le gone ga ba tlhaloganye;

ba kgarakgatshega mo lefifing;

metheo yotlhe ya lefatshe

e a tshikinyega.

₆Ke rile: ‘Lo medimo,

lotlhe lo bomorwa Mogodimodimo.’

₇Le fa go ntse jalo

lo tlaa swa jaaka batho fela,

lo tlaa wa jaaka nngwe

ya dikgosana.”

₈Tloga o eme Modimo,

o atlhole lefatshe;

gonne o tlaa rua merafe yotlhe fela.