1 MAKABISE 5

₁E rile ditšhaba tse di gaufi di utlwa fa aletara e agilwe gape le Felo ga Boitshepo go tlhabolotšwe gore go nne jaaka go ne go ntse pele tsa gakala mo go mašwe. ₂Tsa bo di ikaelela go bolaaka batho botlhe ba setšhaba sa ga Jakoba ba ba neng ba nna nabo. Tsa simolola go bolaya le go koba baagi ba e neng e le Bajuta.

₃Judase a tlhasela bomorwa Esau kwa Idumaea, mo kgaolong ya Akarabattene kwa ba neng ba tlhasetse Baiseraele ka go ba dikaganyetsa teng. A ba ripitletsa a bo a ba thopa. ₄A bo a gakologelwa bosula jwa bomorwa Baeane ba ba neng ba le letšhwenyo e bile ba thaisa batho ka go ba lalela mo ditseleng. ₅Ya re a ba kganeletse mo dikagong tsa bone tse di goletseng godimo e bile a ba dikaganyeditse, a ikanela go ba feleletsa. Ke fa a tshuba dikago tse tsa bone a fisetsa mongwe le mongwe wa bone mo go tsone. ₆Ya re a tloga foo, a kgabaganyetsa kwa Maamoniteng kwa a neng a fitlhela mophato o o nonofileng wa ntwa gone le namane e tona ya batho ba eteletšwepele ke Timotheuse. ₇A tlhabana nabo gantsi, a ba alola, a ba kgemetha. ₈Ya re a sena go gapa Jasere le metsana e e gaufi nae, a boela kwa Judaea.

₉Jaanong baheitane ba ba neng ba le kwa Gileate ba ne ba ipopaganyetsa go tlhasela Baiseraele ba ba neng ba nna mo kgaolong ya bone, gore ba ba bolaake. Fela ba ne ba tshabela mo kagong ya phemelo ya Dathema, ₁₀mme ba romelela Judase le bomorwarraagwe lokwalo lo lo reng, “Baheitane ba ba gaufi le rona ba dumalanye go re feleletsa. ₁₁Mme ba ipaakanyetsa go kokoanela kago ya phemelo e re tshabetseng mo go yone; Timotheuse e le ene yo o eteletseng mephato ya bone pele. ₁₂Itlhaganele O tle go re namola mo diatleng tsa bone, gonne re setse re latlhegetšwe thata. ₁₃Ba ga rona botlhe ba ba neng ba nna le Matubia ba bolailwe, basadi ba bone la bana ba gapiwa, ditsa-bone tsa phamolwa mme mophato o o ka neng o ne o na le batlhabani ba le 1 000 wa felelediwa.”

₁₄Ya re lokwalo lo sa ntse lo balwa fela ga goroga barongwa ba bangwe ba tšwa Galelea, ba gagoletšwe, ba tla ka dikgang tse di reng, ₁₅“Batho ba Petolemaise, Tire le Sidone ba itšhwaragantse le mephato ya baheitane botlhe ba Galelea go re bolaya.”

₁₆Ya re Judase le batho ba utlwa selo se, ba epa pitso e kgolo go akantshana ka se se neng se ka direlwa ba ga bone ba ba neng ba gateletšwe le gone ba tlhasetšwe ke baba ba bone. ₁₇Judase a raya morwarraagwe Simone a re, “Itlhophele banna, mme O ye go namola ba ga eno ba ba kwa Galelea, fa nna le morwarre Jonathane re ya Gileate.” ₁₈A bo a tlogela Josefa, Morwa Sekaria le moeteledipele wa batho ba Asaria ba na le setlhotšhwana se sengwe sa lekoko la batlhabani kwa Judaea go mo femela. ₁₉Mme a ba laela a re, “Tlhokomelang batho ba, mme lo se ka lwa tlhasela baheitane go fitlhelela re boa.” ₂₀Simone a rebolelwa banna ba le 3 000 go tsamaya nabo mo letsholong lwa go ya Galelea. Mme Judase a neelwa ba le 8 000 go ya Gileate.

₂₁Simone a tsena mo Galelea, a tlhasela baheitane gantsi, mme a ba unyalatsa. ₂₂A ba khukhela gore ba bo ba fitlhe kwa kgorong ya Petolemaise. Ba latlhegelwa ke banna ba ka nna 3 000, ba a neng a ba tseela dithopo. ₂₃A tsamaya ka Bajuta ba Galelea le Arebatta, ka basadi ba bone le bana le loruo lwa bone lotlhe, mme a ba tsisa Judaea ka boitumelo jo bogolo.

₂₄Fa tse di ntse di diragala Judase Makabeuse le morwarragwe Jonathane ba ne ba kgabaganya noka ya Jorodane, mme ba ralala sekaka malatsi a le mararo, ₂₅kwa ba neng ba rakana le Manabataea gone, ba ba neng ba utlwana nabo ba bo ba ba bolelela tsotlhe tse di neng di diragaletse bakaulengwe ba bone ba ba neng ba le kwa Gileate. ₂₆Ba ba bolelela gore ba bantsi ba bone ba ne ba tšwaletšwe Bosera le Bosoro, Alema, Kasefo, Makede le Karenaine, e leng metse e e thekeleditšweng yotlhe. ₂₇Ba bangwe bone ba kganeletšwe mo metseng ya Gileate. Mme baba ba ne ba ikaeletse go tlhasela le go gapa yone metse e e thekeleditsweng e, gone ka moso, le go feleletsa batho botlhe ba ba neng ba le mo go yone ka letsatsi le le lengwefela.

₂₈Judase le lekoko la gagwe la batlhabani ba bo ba fapoga ka tsela ya sekaka, ba ya Bosera. Ya re a sena go gapa motse oo, a kgemetha banna le basimane botlhe ka tšhaka. A thopa motse, a bo a o tshuba. ₂₉Ka phirimane a tšwa foo. Ba lala ba tsamaya go fitlhelela ba bo ba fitlha kwa kagong ya phemelo ya Dathema. ₃₀Fa masa a sa, ba bona segopa sa baba ba sa ntse ba aega dilere le dibetsa tsa ntwa, go gapa kago e ya phemelo, e le go re tlhaselo ke gone fela e simologang. ₃₁Ya re Judase a bona gore tlhaselo e setse e simologile le gore batho ba goeletsa One wa Legodimo, mekgosi ya bone e tlhakatlhakanye le melelo ya diphala le go kua go gontsi, ₃₂a raya banna ba lekoko la gagwe la ntwa a re, “Lo lweng gompieno banna, lo lweleng ba ga lona.”

₃₃Ya re a sena go kgaoganya lekoko la gagwe ditlhopa tse tharo, a tlhasela baba ba gagwe a ba tlhaga kwa morago, diphala di lelediwa godimo, dithapelo di goelwa godimo. ₃₄Batlhabani ba makoko a ga Timotheuse ya re a lemoga gore ke Makabeuse, ba inaya naga, ba mo tshaba. Makabeuse a ba fenya fela mo go mašwe, ga bo ga wa banna ba ka ne ba le 8 000 ba bone motsing oo.

₃₅Ya re a tšwa foo, a lebagana le Alema. A mo tlhasela mme a mo gapa. A bolaya nna yotlhe ya teng. A mo thopa a bo a mo fisa. ₃₆Ke fa jaanong a ya go gapa Kasefo, Makede, Bosore le metse e mengwe e e neng e sa ntse e setse ya Gileate.

₃₇Morago ga ditirafalo tse, Timotheuse a kokoanya mophato o mongwe a ya go thibelela go lebagana le Rafone ntlheng e nngwe ya molatšwana. ₃₈Judase a romela banna go ya go keleka bothibelelo, mme ya re ba boa ba feta ba bolela ba re, “Baheitane ba botlhe ba ba re dikologileng ba mo mokoanetse, ba dira namane e tona ya lekoko la ntwa. ₃₉O thusiwa ke bathapiwa ba Maarabia. Ba thibeletse ntlha ele ya molatswana. Mme ba setse ba ipaakanyeditse go re tlhasela.” Ke fa Judase a ya go ba tlhasela.

₄₀Mme ya re a atamela molatšwana ka makoko a gagwe Timotheuse a raya balaodi ba lekoko la gagwe la ntwa a re “Fa a ka kgabaganya pele, ga re kake ra ba ra emelana nae, ka gonne o tla re fekeetsa. ₄₁Fela fa a ka tshaba, a ba a thibelela ka kwa ga molatšwana re tla kgabaganyetsa ka kwa go ene, mme jaanong ke rona ba re tla mo fekeetsang.” ₄₂Mme ya re fela Judase a fitlha fa molatšwaneng a baya bakwadi ba batho go bapa le one molatšwana o, a bo a ba laela a re, “Lo se ka lwa ba lwa dumelela ope go thibelela, botlhe ba tšhwanetse go ya go tlhabana.” ₄₃Ya nna ene wa ntlha go kgabaganyetsa ka kwa babeng, batho ba mo setse morago. Baheitane botlhe ba ba neng ba le fa pele ga bone ya re ba fenngwa ba latlha dibolao tsa bone mme ba tshabela mo lolwapeng lo lo boitshepo lwa Karenaime. ₄₄Bajuta ya re pele ba gapa motse, mme morago ga moo ba tshuba lolwapa, ba fisa mongwe le mongwe yo o neng a le mo teng ga lone. Ka mokgwa oo, Karenaime a fenngwa. Mme baba ba se ka ba bo ba tlhola ba emelana le Judase.

₄₅Ke fa Judase jaanong a phutha Baiseraele botlhe ba ba neng ba nna mo Gileate, ba bannye le ba bagolo, ka basadi ba bone, le bana ba bone. Ya nna kokoano e tona. A bo a ba isa kwa lefatsheng la Juda. ₄₆Ba fitlha kwa Eferone. O e ne e le motse o o thatafaditšweng ka go thekelediwa, tsela e o ralala. Ka ba ne ba ka se ka ba o potologa ka fa kgotsa ka fa, go ne go se na se ba ka se dirang fa e se go o ralala fela. ₄₇Fela batho ba motse ba ba itsa go feta. Mme ba phakelela dikgoro ka maje. ₄₈Ke fa Judase a ba romelela molaetsa o wa kagiso, a re, “A ko lo mmeng re kgabaganye lefatshe la lona, gore re ye go fitlha kwa ga rona. Ga go na ope yo o tlaa lo utlwisang botlhoko, re ne re kopa go iphetela ka dinao fela.” Fela ba nna ba gana go mmulela.

₄₉Judase ke fa a laela gore botlhe ba bolelelwe go re mongwe le mongwe a eme fa a teng. ₅₀Batlhabani ba gagwe ba aba ntwa, Judase a tlhola a tlhasetse motse a bo a lala a ntse a o tlhasetse. Wa tsena mo diatleng tsa gagwe. ₅₁A bolaya banna botlhe ba motse ka tšhaka, a o leleanya. A thopa motse mme a o ralala a gataka ditopo fela. ₅₂Bajuta jaanong ba kgabaganya noka ya Jorodane, ba tsena mo lebaleng go lebagana le Bethsana. ₅₃Judase a nna a kgothatsa ba ba neng ba kgobegile marapo, a tla a ntse a tsenya batho moko-o-thata go fitlhelela ba bo ba tsena kwa lefatsheng la Juda. ₅₄Ba tlhatloga Thaba ya Sione ka boitumelo le boipelo. Ba feta ba ntsha ditshupelo tse di fisiwang gotlhe ka gore ba ne ba boile ba bolokegile ba ntse ba itekanetse, go se na le fa e le ope yo a neng a ba latlhegetse.

₅₅Jaanong e ne ya re fa Judase le Jonathane ba ntse ba le mo lefatsheng la Gileate mme Simone morwarraagwe ene a le kwa Galelea fa pele ga Petolemaise, ₅₆Josefa morwa Sekaria, le Asaria, ba ba neng ba laola lekoko la ntwa, ba utlwa ka ga dirito tsa bone tsa bonatla le ka fa ba neng ba fentse ka teng mo tlhabanong ya bone. ₅₇Ba bo ba re, “A le rona re ke re itumise, re ye go lwa le ditšhaba tse di re dikologileng tse.” ₅₈Ke fa ba laela banna ba mephato ya bone mme ba ya go tlhasela Jamnia. ₅₉Fela Goregiase o ne a tšwa mo motseng, a na le banna ba gagwe go thulana nabo. ₆₀Josefa le Asaria ba unyaladiwa, mme ba lelekwa ba bo ba fitlha kwa melelwaneng ya Judaea. Ga šwa Baiseraele ba ka nna 2 000 ka letsatsi le. ₆₁Ka mokgwa oo, batho ba garaswanngwa ka gore ba ne ba se ka ba reetsa Judase, ba mpa ba ikanya bonatla jwa bone. ₆₂Batho ba e be e se ba lotso lo lo neng lo neilwe thata ya go golola Iseraele.

₆₃Fela mogale yo go tweng Judase yole, le bomorwarraagwe ba ne ba tsholetšwe kwa godimo, ba tlotlwa gongwe le gongwe mo Iseraele le mo gare ga ditšhaba tsotlhe gongwe le gongwe kwa maina a bone a neng a utlwala. ₆₄Batho ba ba kokoanela ba ba boka.

₆₅Judase a tšwa a na le bomorwarraagwe a ya go lwa le Maedomite mo lefatsheng le le ntlheng ya Borwa. A hupetsa Heberone le metsana e e o dikologileng. A diga dikago tsa one tsa phemelo. A tshuba dikago tse di godileng tsa phemelo tse di neng di o thekeleditse. ₆₆Ya re a tšwa foo, a tlhamalalela kwa lefatsheng la Mafilisitia a raletse Marisa. ₆₇Mo gare ga ba ba neng ba bolailwe ga bo go le baprista bangwe ka botlaela, ba neng ba tsenye mo ntweng ba batla go bontsha bopelokgale jwa bone. ₆₈Morago ga moo Judase a lebagana le Asotuse, e neng e le kgaolo ya Mafilisitia. A pitikolola dialetara tsa bone. A fisa ditšhwantsho tse di setilweng tsa medimo ya bone. A bo a boela kwa lefatsheng la Juda. A tlogela metse ya bone e thopilwe tota.