V. PHENYO
Bajuta Ba Tlhasela Bothibelelo Jwa Maasiria
1Ke fa Judithe a ba raya a re, “A ko lo ntheetseng, bakaulengwe. Tsayang tlhogo e lo e pegeng mo godimo ga dithako tsa lona. 2Fa masa a sa mme letsatsi le tlhabile, a monna mongwe le mongwe a tseye dibetsa tsa gagwe, mme monna mongwe le mongwe yo o itekanetseng a tšwe mo motseng. Ba tlhopheleng moeteledi-pele, jaaka e kete lo raya gore lo fologela kwa leboeng lo ya go tlhasela masole-ditlhodi a Maasiria. Fela lo se ka lwa bo lwa fologa.
3“Maasiria a tlaa phutha dibetsa tsa one, a tabogele kwa bothibelelong go ya go tsosa batsamaisi ba one; bone ba tlaa kgologela kwa tanteng ya ga Holofernese mme ga ba na go mo fitlhela. Ke gone ba tlaa gamaregang ke lotshogo ba bo ba sia fa lo tlhasela.
4“Se lona le ba bangwe ba ba nnang mo kgaolong ya Iseraele lo tšhwanetseng go se dira ke gore lo ba leleke, lo ba bolaake fa ba ntse ba kata ka sa mmamorago jaana.
5“Fela pele lo dire jaana, lo mpiletseng Akiore Moammonite gore a tle a bone monna yo o neng a nyatsa Ntlo ya Iseraele a bo a lemoge fa e le ene monna yo o neng a mo romela kwa go rona a ithaya a re ke motho yo o setseng a atlholetšwe go šwa.”
6Ke fa ba laela gore Akiore a tsisiwe a tšwa mo tlung ya ga Usia. Mme e rile fela fa a fitlha a bona tlhogo ya ga Holofernese e tshotšwe ke mongwe mo phuthegong ya batho a wa ka mpa a idibetse.
7Ba mo tsholetsa. Mme a itigela fa dinaong tsa ga Judithe. Ya re a ikgophaladitse jalo a buela kwa godimo a re,
“A o bakwe mo ditanteng tsotlhe tsa Juta,
le mo setšhabeng sengwe le sengwe;
e tlaa ne e re leina la gago le bidiwa
batho ba tšhwarwa ke lotshogo.
8“Jaanong a ko O mpolelele gore tota O ntse O dirang fela mo malatsinyaneng a a fetileng a.” Mme ya re Judithe a kgobokanetšwe ke batho botlhe jalo, a mmolelela sengwe le sengwe se a neng a se dirile go tšwa letsatsing le a neng a tšwa mo Bethulia ka lone go fitlhelela yone nako e a neng a bua ka yone eo. 9Ya re a fetsa, batho ba duduetsa ba letsa megolokwane, ka mantšwe a a kwa godimo, motse wa bo wa sala o duma. 10Mme e rile Akiore a bona ditiro tse dikgolo tse Modimo wa Iseraele o neng o di dirile a dumela mo go one gotlhelele, a a amogela thupiso, a bo a amogelwa mo Tlung ya Iseraele ka bosafeleng.
11Fa masa a sa ba pega tlhogo ya ga Holofernese mo godimo ga dithako tsa phemelo. Monna mongwe le mongwe a tsaya dibetsa tsa gagwe mme ba tšwa ka ditlhopha-tlhopha, ba ya mhapheng wa thaba. 12E rile Maasiria a bona se, ba ya go bolelela baeteledipele ba bone; ba, bone ba ya go lotlegela balaodi ba bone, batsamaisi ba sekete le ba lekgotla ba bangwe botlhe; 13ke fa ba, bone ba ya go lotlega kwa tanteng ya ga Holofernese. Ba raya motlhanka-molebeledi yo o neng a tlhokomela tsa ntlo ba re, “Tsosa morena wa rona, gonne balalanyana ba ke ba, ba a bo ba leka go fologela mo go rona go re tlhasela, ba iphetlhela go thubakwa botlhe!”
14Bagoase a tsena mo teng mme a opa diatla fa pele ga letsela le le neng le kgaoganya tante, a ithaya a re Holofernese o sa ntse a robetse le Judithe. 15Fela ka e ne e kete ga go na ope yo o utlwang, o ne a fenosa letsela mme a tsena mo ntlwaneng ya boroko, a mo fitlhela a sule, a pitikololetšwe fa fatshe mo bodilong, tlhogo e putlilwe mo mmeleng. 16A goela godimo, a lela a sumaka, a galaotega mme a ikgagolakela diaparo. 17Ke fa a ya go tsena mo tanteng e Judithe a neng a nna mo go yone mme le ene a se ka a mo fitlhela. Jaanong a kgwelogela kwa banneng a goa a re, 18“Balalanyana bale ba re tsieditse! Mosadinyana a le mongwefela wa Mohebera o tlhabisitse Ntlo ya ga Nebukatenesare ditlhong. Holofernese o kgophaletse fa fatshe, o sule, o putlilwe tlhogo!” 19E rile baeteledipele ba mophato wa Maasiria ba utlwa selo se, ba ikgagolaka dibaki, ba tobekanye ditlhogo ke letshogo, mme bothibelelo jwa duma ke go goa ga bone le go bokolela ga bone.
