SIRAKA 13

₁Mongwe le mongwe yo o amang sekontere o tlaa tlala lešwe, mme yo o itsalanyang le moikgantshi o tlaa tšhwana nae.

₂O se ka wa leka go sikara mokgweleo o o go imelang go feta selekanyo. O se ka wa itsalanya le motho yo o nonofileng e bile a humile go go feta. O bapisetsang nkgo le pitsa ya tshipi? Ka e tlaa re di thulana nkgo e thubege.

₃Mohumi o fosetsa motho mme a ipelafatshe. Mohumanegi ene lefa a foseditšwe a mome molomo.

₄Fa O na le thuso mo mohuming o tlaa go ja ntsoma, fela fa O se na thuso epe mo go ene o tlaa go hularela.

₅Fa O ruile sengwe, o tlaa nna nao, o tlaa go jela dilo tsotlhe a sa kgathale.

₆Fa a go tlhoka, o tlaa go tsietsa, a go tshega-tshegise, a bo a go solofetse. O tlaa bua nao ka loleme lo lo boretšhana, a go reye a re, “O tlhokang?”

₇O tlaa go tlhabisa ditlhong ka dijo tsa gagwe tse di monate. Go fitlhelela a go tlhotlhora gabedi, gararo; a bo a feleletse ka go go dira lesilo. E re a rakana nao tsatsi lengwe a bo a go sinalla, a go komakomela ka tlhogo.

₈O bone O se ka wa tsiediwa, mme ka mokgwa oo wa šwabisiwa ka ntlha ya boeleele jwa gago.

₉Fa mogapa-maikutlo mongwe a go laletsa, O itsemeletse, mme o tlaa go laletsa go feta.

₁₀O se ka wa ipaya kwa pele, e se re kgotsa wa kgaphelwa kwa thoko. Fela O se ka wa emela kgakala, e se re kgotsa wa itebadiwa.

₁₁O se ka wa mo tšhwara jaaka molekane wa gago, kgotsa wa ikanya bothakga jwa gagwe jwa go bua, gonne o ikaeletse go go leka go bua thata mo ga gagwe, mme o tlaa nnela a go tlhatlhoba a ntse a itshegi-tshegisa.

₁₂Motho yo o ipuapuelang fela o setlhogo, ga a tshabe go go betsa kgotsa go go golega.

₁₃O itise, mme O itlhokomele thata, gonne O rwaletse setlhako le mutlwa.

₁₄Fa e ka re O ntse O robetse wa utlwa dilo tse, tsoga! O rate Morena mo botshelong jotlhe jwa gago, mme O mo rapele a go boloke.

₁₅Sebopiwa sengwe le sengwe se rata sa mofuta wa sone, mme motho mongwe le mongwe o rata mokaulengwe wa gagwe.

₁₆Sebopiwa sengwe le sengwe se tsamaya le mofuta wa sone, mme motho o kgomarela motho yo o tšhwanang nae.

₁₇Phiri e ka utlwana jang le konyana? Mme moleofi le ene o ka utlwana jang le mosiami?

₁₈Go ka nna kagiso jang fa gare ga phiri le ntša? le gone, fa gare ga mohumi le mohumanegi, go ka nna kagiso jang?

₁₉Ditonki tsa naga ke mojo wa ditau tsa sekaka, go ntse jalo, bahumanegi le bone ke ditsomiwa tse dikgolo tsa bahumi.

₂₀Moikgantshi ga a beye boikokobetso sebete, mme mohumi le ene o tenwa ke mohumanegi.

₂₁Fa mohumi a kgokgoetsega o tshegediwa ke ditsala tsa gagwe; mme fa mohumanegi a wa, o kgoromediwa le ke ditsala tsa gagwe tota.

₂₂Fa mohumi a relela, o tshwarwa ke bathusi ba bantsi, lefa a ipuela diphirimisi fela o a akgolwa. Fa mohumanegi a relela, o omanyediwa go relela moo; lefa a ka a bo a bua sengwe se se utlwalang ga go na ope yo o mo kgathalelang.

₂₃Fa mohumi a bua mongwe le mongwe o a didimala, mme se a se buang se bokwa tota. Fa mohumanegi a bua batho ba re, “E a bo e le mang yoo?” Mme fa a ka thetheekela, ba tla bo ba mo kgorometse, ba mo dige.

₂₄Khumo e siame fa e se na sebe, mme baikepi ba ithaya ba re lehuma le bosula.

₂₅Pelo ya motho e bopa tebego ya gagwe, e e ntlafatsa kgotsa e e senya.

₂₆Sesupo sa pelo e e molemo ke sefatlhogo se se itumetseng; go loga diane ke tiro e e lapisang.