SIRAKA 27

₁Batho ba le bantsi ba leofile ka gore ba ne ba batla go boelwa mo papading; mongwe le mongwe yo o batlang go huma o tšhwanetse go nna setlhogo.

₂Sebe se itshotlhometsa fa gare ga go rekisa le go reka, fela jaaka lomapo lo sotlhomela mo phatlhanyaneng e e fa gare ga maje a mabedi.

₃Fa motho a sa ikakatlele ka tlhwaafalo ka go boifa Morena, ntlo ya gagwe e tla digwa.

₄Fa go kelekiwa puo ya motho go tlaa senoga se se leng bosula mo go ene, fela jaaka e a re go sefiwa, malele a bonwa mo godimo ga sefe.

₅Motho o lekwa mo motlotlong wa gagwe fela jaaka dijana tse di bopilweng ke mmopi di lekwa mo sebesong.

₆Mafoko a motho a senola maikutlo a gagwe fela jaaka maungo a senola gore tshimo e setlhare se golang mo go yone e ntse jang.

₇E se ka ya re motho a ise a bue wa mmoka, gonne batho ba lekwa ka gone go bua.

₈Fa O latelela tshiamo O tlaa bo O nne nayo. O bo O e apare jaaka seaparo sa moletlo.

₉Dinonyane di utlwana le tsa mofuta wa tsone, tshiamo le yone e boela mo go ba ba tshelang ka yone.

₁₀Sebe se lalela ba ba dirang phoso, fela jaaka tau e lalela setsomiwa sa yone.

₁₁Mosiami o tlhola a tlotla ka botlhale, mme seeleele se fetoga-fetoga fela jaaka ngwedi.

₁₂O leke go bona phatlha ya go tšwa mo masilong, fa O le fa gare ga batho ba ba nang le tlhaloganyo O iketle.

₁₃Go tlotla ga dieleele go a tena, ditshego tsa bone di magogojwa mo ditlhapeding tsa bone tse di tletseng sebe.

₁₄Puo ya dithogano tse di mašwe e sosobanya moriri, go gagautlana ga bone go ka dira gore O itšwale ditsebe.

₁₅Komano ya batho ba ba ikgogomosang e isa polaanong, go botlhoko go utlwa go gobololana ga bone.

₁₆Motho yo o senolang diphiri o latlhegelwa ke go tlotliwa gotlhe, mme ga a kitla a bo a bona tsala e a utlwanang nayo.

₁₇O rate tsala ya gago mme O e ikanye, fela fa O ka senola diphiri tsa yone O se ka wa bo wa tlhola O e latelela; ₁₈gonne O sentse botsala jwa mokaulengwe wa gago fela jaaka motho a tle a bolaye mmaba wa gagwe.

₁₉O tlogetse tsala ya tsamaya mme ga O kitla o bo o e tšhwara, fela jaaka nonyane e O e lesitseng ya tšhwamoga.

₂₀O se ka wa e latelela, e kgakala, e siile jaaka tshepe e tshaba serai.

₂₁Gonne ntho e ka nna ya fapiwa, le kgobololo ya itšhwarelwa, fela motho yo o senotseng sephiri ga a kake a solofela sepe.

₂₂Motho yo o kopetsang leitlho ka bolotsanyana o loga maano a go dira ditiro tse di sa siamang, ga go na ope yo o ka mo faposang mo go direng jalo.

₂₃Fa O le teng o tla bua monate, a kgatlhegela mafoko a gago thata; fela fa O se yo o ipuela dilo disele. a bo a dire gore mafoko a gago e ne e kete a a kgopisa.

₂₄Go na le dilo di le dintsi tse ke di tlhoileng, fela motho yo o ntseng jaana ke mo tlhoile go feta tsotlhe. Morena le ene o mo tlhoile.

₂₅Motho yo o kolopelang leje kwa godimo, O a tle a le kolopele mo godimo ga tlhogo ya gagwe, go betsa ga bolotsana go masego-mabedi a a ntshang dintho.

₂₆Motho yo o epang lemena o a tle a wele mo go lone, mme yo o thaisang o a tle a wele mo seraing sa gagwe.

₂₇Bosula bo boela mo mothong yo o bo dirang, le mororo a sa itse kwa bo tšwang teng.

₂₈Puo ya papiso e e sotlang le kgobololo ke dilo tse di supang gore motho o a ikgantsha; fela pusoloso e a bo e ntse e mo laletse jaaka tau.

₂₉Serai se tlaa tšhwara botlhe ba ba itumelelang go wa ga mosiami, mme botlhoko bo tlaa ba fetsa ba ise ba šwe.

₃₀Kilo le bogale ke dilo tse di mašwe le tsone, mme tsoopedi di fitlhelwa mo moleofing.