ESEKIELE 3

₁Huno a mmbudza a ri, “Iwe ṅwana wa muthu, iḽa zwe wa ṋewa; iḽa kubugu hoku u kone u yo amba na vhathu vha Israele.”

₂Ndi hone nṋe ndi tshi aṱama mulomo, a nṋea kubugu uri ndi ḽe, ₃a ri, “Iwe ṅwana wa muthu, iḽa u fure nga kubugu kune nda khou u ṋea.” Nṋe nda ku ḽa, nda pfa ku tshi ḓifha unga mutoli.

₄Ndi hone a tshi amba na nṋe a ri, “Iwe ṅwana wa muthu, iya kha vhathu vha Israele u vha vhudze zwe nda u vhudza. ₅A thi khou u ruma kha lushaka lu no amba luambo lusili lu konḓaho, ndi khou u ruma kha vha hau vha Israele. ₆A thi khou u ruma kha tshakha khulwane dzine dza amba nyambo dzisili dzi konḓaho, dzine wa sa ḓo ṱalukanya maipfi adzo. Arali ndo vha ndo u ruma khavho, vho vha vha tshi ḓo u thetshelesa; ₇hone vha hau vha Israele vha nga si u thetshelese, ngauri na Nṋe a vha tendi u nthetshelesa. Vhoṱhe vhathu vha Israele vha na tshipimbi na tshikhuna. ₈Hone zwino, ndi ḓo ita uri na iwe u vhe na tshipimbi na tshikhuna unga vhone. ₉Ṱhoho yau ndi ḓo i konḓisa ya nga daimane; daimane yo khwaṱha u fhira ḽihangahwe. Zwenezwo u songo vha ofha, u songo vha tetemela ngauri ndi vhathu vha mashandukwa.”

₁₀Ndi hone a tshi ri, “Iwe ṅwana wa muthu, u elelwe zwoṱhe zwine nda u vhudza, thetshelesa zwavhuḓi, ₁₁u kone u ya ha vha hau vho thubwaho. U vha vhudze u ri, ‘Muṋe wa zwoṱhe Yahavee u ralo!’ nangwe vha thetshelesa kana vha si thetshelese!”

₁₂Muya a ntakula, murahu hanga nda pfa mubvumo muhulu wa ipfi ḽi tshi ri, “Nga hu rendwe vhugala ha Muṋe washu henefho hune a dzula hone.” ₁₃Wo vha u mukosi wa phapha dza zwiḽa zwivhumbwa zwi tshi khou rwana, na mubvumo wa milinga i re tsini hazwo, mukosi muhulu.

₁₄Muya a ntakula a ṱuwa na nṋe, nda ṱuwa mbilu yanga yo dinalea nda pfa ndo ḓalelwa, tshanḓa tsha Muṋe washu tsho vha tshi tshee tsho ntsikeledza. ₁₅Nda swika Thele Avivi, mathubwani tsini na mulambo wa Khebara he vha vha vha tshi dzula hone; nda dzula navho maḓuvha maṱanu na mavhili ndó hanganea.

₁₆Ho no fhela maḓuvha maṱanu na mavhili ipfi ḽa Muṋe washu ḽa amba na nṋe la ri, ₁₇“Iwe ṅwana wa muthu, ndo u vhea uri u vhe mulindi wa vhathu vha Israele. Misi yoṱhe u tshi pfa ipfi ḽanga, u vha kaidze nga dzina ḽanga. ₁₈Arali nda amba na muvhi nda ri: ‘U ḓo fa,’ iwe wa si mu kaidze wa si ambe wa mu kaidza a laṱa maitele awe o vhifhaho uri a tshile, zwenezwo ene u ḓo fela vhuvhi hawe, hone a fa ndi ḓo ri ndi mulandu wau. ₁₉Huno arali wa kaidza muvhi, ene a si laṱe vhuvhi hawe, zwenezwo ene u ḓo fela vhuvhi hawe, iwe wa vha wo ḓitshidza.

₂₀“Arali muvhuya a si tsha fulufhedzea a vho ita vhuvhi a ḓiretshela tshikwekwe, na onoyo u ḓo fa; nge wa kundwa u mu kaidza, u ḓo fela vhuvhi hawe, zwe a ita a tshi kha ḓi fulufhedzea a zwi tsha ḓo humbulwa, hone Nṋe a fa ndi ḓo ri ndi mulandu wau. ₂₁Huno arali wa kaidza muvhuya a si tshinye, ene a ḓiilisa vhutshinyi, vhukuma u ḓo tshila nge a kaidzwa, na iwe-vho wa vha wo ḓitshidza.”

₂₂Musi ndi tshee henengei tshanḓa tsha Muṋe washu tsha mpfara, a ri, “Takuwa, ibva u ye govhani; ndi ḓo amba na iwe henefho.” ₂₃Nṋe nda takuwa nda ya govhani; henefho ho vha hu na vhugala ha Muṋe washu, vhu tshi nga vhugala he nda vhu vhona mulamboni wa Khebara; nṋe nda wa nga tshifhaṱuwo. ₂₄Muya wa Muṋe washu a dzhena kha nṋe a nnyimisa, a amba na nṋe. Muṋe washu a amba na nṋe a ri, “Iyo ḓihoṋela nḓuni yau. ₂₅Iwe ṅwana wa muthu, zwino u ḓo ṱuwa u tshi vhofhiwa; vha ḓo u vhofha wa si tsha ṱangana na vhaṅwe. ₂₆Ndi ḓo ita uri lulimi lwau lu nambatele marinini; u ḓo vha tshimuma wa kundwa u vha kaidza, ngauri ndi vhathu vha mashandukwa. ₂₇Musi ndi tshi amba na iwe, ndi ḓo u vula mulomo, iwe wa vha vhudza wa ri, ‘Muṋe wa zwoṱhe Yahavee u ralo.’ Ane a ḓo thetshelesa, litsha a thetshelese; ane a si thetshelese, litsha a si thetshelese; hufha vhe vhathu vha mashandukwa.