MATIOSI 23

₁Ndi hone Yesu a tshi amba na magogo khathihi na vhafunziwa vhawe ₂a ri, “Vhaḓivhi vha Maṅwalo na Vhafarisei vho ima vhuimoni ha Mushe. ₃Itani-ha zwoṱhe zwine vha ni vhudza, ni zwi tevhedze, hone vhone vhaṋe ni songo vha edzisa; vha vhea milayo ine vhone vhaṋe vha si tevhedze. ₄Vha vhofha maputo a lemelaho vha hwesa vhathu, ngeno vhone vhaṋe vha sa a kwami na nga munwe zwawo. ₅Zwoṱhe zwine vha ita vha itela u vhonwa nga vhathu fhedzi: ṱhohoni dzavho na zwanḓani vha vhofha mabannda mahulwane ane khao vha ṅwala vese dza Bivhili, kha badzhi dzavho vha rungelela mashaphu malapfulapfu. ₆Vha nanga madzulo a phanḓa minyanyani na sinagogoni. ₇Vha funa u loshwa khoroni na u pfi ‘Vhafunzi!’ ₈Fhedzi inwi ni songo tenda u pfi ‘Vhafunzi’; mufunzi waṋu ndi muthihi, inwi noṱhe ni tou vha vharathu na vhakomana. ₉Na u ita muthu, ‘Khotsi’ fhano shangoni ni songo zwi ita; Khotsi aṋu ndi muthihi, ndi wa ṱaḓulu. ₁₀Ni songo tenda u pfi ‘Vharangaphanḓa’; murangaphanḓa waṋu ndi muthihi, ndi Mesia. ₁₁Ane a vha muhulwane waṋu nga a vhe ene mushumeli waṋu; ₁₂ngauri ane a ḓihudza u ḓo ṱukufhadzwa; ane a ḓiṱukufhadza u ḓo huliswa.

₁₃“Ni ḓo zwi vhona inwi vhaḓivhi vha Maṅwalo na Vhafarisei; vhahoi ndinwi! Ni khielela vhathu nnḓa ha muvhuso wa Mudzimu. Inwi vhaṋe a ni dzheni, na dovha na dzivhisa vhane vha funa u dzhena.

₁₅“Ni ḓo zwi vhona inwi vhaḓivhi vha Maṅwalo na Vhafarisei; vhahoi ndinwi! Ni wela lwanzhe na buḓekanya mashango ni tshi ṱoḓa muthu muthihi ane na nga mu rembulusela kha lutendo lwaṋu; matsiko u ralo ha vha u mu ita muthu o fanelaho hele u fhira inwi kavhili.

₁₆“Ni ḓo zwi vhona inwi vhane ngeno ni mabofu na endedza vhaṅwe; ni ri arali muthu a tshi ana nga nnḓu ya Mudzimu a zwi na mushumo, hone arali a tshi ana nga musuku u re nḓuni ya Mudzimu ndi hone o ḓivhofha. ₁₇Matsilu o pofulaho ndinwi. Matsina tshihulwane ndi tshifhio? Ndi musuku kana ndi nnḓu ya Mudzimu ine ya ita na musuku uri u vhe mukhethwa? ₁₈Na dovha na ri arali muthu a tshi ana nga aḽiṱari a zwi na mushumo, fhedzi arali a tshi ana nga nduvho i re khayo, ndi hone o ḓivhofha. ₁₉Mabofu ndinwi! Matsina tshihulwane ndi tshifhio? Ndi nduvho kana ndi aḽiṱari ine ya ita na nduvho uri i vhe khethwa? ₂₀Ngauralo ane a ana nga aḽiṱari u ana ngayo na nga tshiṅwe na tshiṅwe tshi re khayo. ₂₁Zwi ḓi nga ane a ana nga nnḓu ya Mudzimu u ana ngayo na nga Mudzimu ane a dzula khayo. ₂₂Zwi ḓi nga ane a ana nga ḽiṱaḓulu u ana nga khuluṋoni ya Mudzimu a dovha a ana na nga Ene Mudzimu o dzulaho khayo.

₂₃“Ni ḓo zwi vhona, inwi vhaḓivhi vha Mulayo na Vhafarisei; vhahoi ndinwi! Ni bvisa tsha fumi tsha miroho ya nngu na muxe na luṋonya, na litsha u khunyeledza tshihulwane tsha Mulayo: a ni tsha londana, a ni na mbilutshilidzi, a ni fulufhedzei. Matsina ndi zwone zwe na vha no fanela u zwi ita, na zwiḽa zwiṅwe ni si zwi litshe. ₂₄Ni endedza vhaṅwe ngeno inwi ni mabofu, inwi vhane na miṋa vhunyunyu ngeno gamela ni tshi mila nayo.

₂₅“Ni ḓo zwi vhona inwi vhaḓivhi vha Maṅwalo na Vhafarisei; vhahoi ndinwi! Ni ṱanzwa khavho na ndilo nga nnḓa, ngeno ngomu zwo fara zwe na zwi wana nga vhuvemu na tseḓa. ₂₆Vhafarisei, mabofu ndinwi, thomani u ṱanzwa khavho ngomu hayo, ndi hone na nnḓa i sa ḓo vha na tshika.

₂₇“Ni ḓo zwi vhona inwi vhaḓivhi vha Maṅwalo na Vhafarisei; vhahoi ndinwi! Ni fana na zwalo zwo nakiswaho: zwi naka nga nnḓa, ngeno ngomu zwo ḓala marambo a vho faho na tshika. ₂₈Na inwi no ralo: vhathu vha tshi ni vhona ni nga ni vhavhuya, ngeno ngomu haṋu vhu vhufhura fhedzi na vhuvhi.

₂₉“Ni ḓo zwi vhona inwi vhaḓivhi vha Maṅwalo na Vhafarisei; vhahoi ndinwi! Ni vusa matombo a zwalo zwa vhaporofita, na ṱama zwalo zwa vhavhuya, ₃₀na ri, ‘Ngavhe hu vhe riṋe vhe ra tshila misi ya vhomakhulukuku ndi musi ri songo shulula-vho malofha a vhaporofita sa vhone.’ ₃₁Ni tshi ralo ha vha u ḓiambulula uri ni vhana vha vho vhulahaho vhaporofita. ₃₂Ndi zwone, ṱhaphudzani-ha zwe vhokhotsi aṋu vha siedza. ₃₃Dziṋowa ndinwi, ni maḓana a mavuluvulu, khaṱhulo ya u poswa heleni ni ḓo i ponyoka hani-ha? ₃₄Ndi zwine nda ri ndi ḓo ni rumela vhaporofita na vhaṱali na vhaḓivhi vha Maṅwalo. Vhaṅwe vhavho ni ḓo vha vhulaha, vhaṅwe na vha vhamba zwifhambanoni, vhaṅwe na vha rwa nga nnzi sinagogoni dzaṋu na vha tovhola vha bva kha uno muḓi vha shavhela kha uḽa, ₃₅hu u itela uri malofha oṱhe a vhavhuya o shululwaho fhano fhasi a vhilwe kha inwi, u bva kha Abele we a vha a si na mulandu, u swika kha Zakaria ṅwana wa Berekia we na mu vhulaha vhukati ha nnḓu ya Mudzimu na aḽiṱari. ₃₆Zwino ipfani-ha: oṱhe a ḓo vhiliwa kha vhathu vha musalauno.

₃₇“Hee iwe Jerusalema! Ndi amba Jerusalema, hewe une we u vhulaha vhaporofita, vhaḓinḓa vha Mudzimu vho rumiwaho kha inwi na vha kanḓa nga matombo! Nṋa ndi kangana ndi tshi ri ndi kuvhatedze vhana vhau vhoṱhe sa khuhu i tshi kuvhatedza khukhwana dzayo nga phapha, hone iwe u si tende! ₃₈Zwino ndi hone-ha no ṅaledzelwa nnḓu yaṋu; Mudzimu o i ṱutshela. ₃₉Ndi a ni vhudza ndi ri, a ni tsha ḓo mmbona hu vhuye hu ḓe musi une na ḓo ri, ‘Nga hu rendwe a ḓaho nga dzina ḽa Muṋe washu!’ ”