UYOBHI 21

₂Yivani, nikuve ukuthetha kwam;

Kube ziintuthuzelo zenu oku.

₃Ndithwaleni, ndithethe nam;

Nigculele emva kwamazwi am.

₄Mna, inkalazo yam isemntwini yini na?

Khona bekungani ukuba ungazekaneki umoya wam?

₅Bhekani kum, nimangaliswe;

Bekani isandla emlonyeni.

₆Okunene, ndakùkhumbula, ndisuka ndikhwankqiswe,

Nenyama yam ibanjwe kukududuzela.

₇Yini na ukuba abangendawo badle ubomi,

Babe badala, kananjalo bomelele, babe namandla?

₈Imbewu yabo iqinile phambi kwabo, inabo;

Nabaphume embilinini wabo basemehlweni abo.

₉Izindlu zabo zinoxolo, kungekho kunkwantya,

Nentonga kaThixo ayibafikeli.

₁₀Inkunzi yabo iyazeka ingahlohleli;

Imazi yabo iyazala ingaphunzi.

₁₁Bayawakhuphela njengomhlambi amakhwenkwe abo,

Nabantwana babo bayadloba.

₁₂Baphakamisa ilizwi benengqongqo nohadi,

Bavuye lilizwi logwali.

₁₃Bayayigqiba imihla yabo ngokuchwayitha,

Behle ngephanyazo ukuya kwelabafileyo.

₁₄Bathi kuThixo, Suka kuthi,

Asikunanzile ukuzazi iindlela zakho.

₁₅Úyini na uSomandla, ukuba simkhonze?

Kusinceda ntoni na ukumjoka?

₁₆Yabona, azisesandleni sabo izinto zabo ezilungileyo;

Iqhinga labangendawo malibe lee kum.

₁₇Kukangaphi na ke isibane sabangendawo sicinywa?

Kubafikela ukusindeka kwabo?

Ababele uThixo izintya ngomsindo wakhe?

₁₈Babe njengengca enqunqiweyo phambi komoya,

Njengomququ ohlaselwa sisaqhwithi?

₁₉Nìthi, UThixo ububekela abantwana babo ubutshinga babo.

Makabuphindezele kubo ngokwabo, bazi bona;

₂₀Makayibone inkxwaleko yabo amehlo abo,

Babusêle ubushushu boSomandla.

₂₁Ngokuba bayinanze ngani bona indlu yabo emva kwabo,

Lakuqhitshulwa inani leenyanga zabo?

₂₂Úya kufundiswa ukwazi uThixo na,

Lowo ugweba abaphezulu?

₂₃Omnye ufa emandleni okwakhe ukuphila,

Onwabile kanye, echulumachile.

₂₄Iimvaba zakhe zizele ngamasi,

Nomongo wamathambo akhe utyebile.

₂₅Omnye ufa úkrakra umphefumlo wakhe,

Engadlanga zinto zilungileyo.

₂₆Balala ndawonye eluthulini,

Iimpethu ziyabagubungela bobabini.

₂₇Yabona, ndiyazazi iingcinga zenu,

Namayelenqe enindigonyamela ngawo.

₂₈Xa nithi, Iphi na indlu yesibhovubhovu?

Iphi na intente ebalulekileyo yabangendawo?

₂₉Anibuzanga na kwabadlula ngendlela?

Imiqondiso yabo ninako na ukuyikhanyela?

₃₀Ukuba ngemini yokusindeka wanqandwa ongendawo,

Ngemini yokuphuphuma umsindo wemkiswa?

₃₁Ngubani na ongaxela ebusweni bakhe indlela yakhe?

Enzé into yena, ngubani na oya kuphindezela kuye?

₃₂Usiwa emangcwabeni yena,

Alinde esigangeni.

₃₃Anencasa kuye amagada esihlambo;

Emva kwakhe kulandela lonke uluntu,

Nangaphambi kwakhe belungenakubalwa.

₃₄Ningáthini na ke ukundithuthuzela ngeento ezingento,

Iimpendulo zenu zisele zibubumenemene nje?