IINDUMISO 2

₁Yini na ukuba iintlanga zenze imbuthumbuthu,

Izizwe zicamange into engeyakonto?

₂Ookumkani behlabathi bazimisile,

Izidwangube zabhunga

NgoYehova nangoMthanjiswa wakhe;

₃Besithi, Masiziqhawule iimbophelelo zabo,

Sizilahle izintya zabo kuthi.

₄Ohleli emazulwini úyahleka,

INkosi iyabagculela.

₅Iya kwandula ithethe kubo ngomsindo wayo,

Ibakhwankqise ngokuvutha kwayo.

₆Ithi, Mna ke ndimmisile ukumkani wam

Phezu kweZiyon, intaba yam engcwele.

₇Athi yena, Ndiya kuwuvakalisa ummiselo:

UYehova uthe kum, ÙnguNyana wam wena;

Mna namhla ndikuzele.

₈Cela kum, ndikuníke iintlanga zibe lilifa lakho,

Iziphelo zehlabathi zibe zezakho.

₉Ùya kuzivikiva ngentonga yentsimbi,

Uzihlekeze, zinge zizitya zodongwe.

₁₀Ngoko ke, nina bokumkani, qiqani;

Bagwebi basehlabathini, yalekani.

₁₁Mkhonzeni uYehova nisoyika,

Gcobani nithuthumela.

₁₂Mangeni uNyana, hleze aqumbe, nitshabalale endleleni,

Ngokuba ungáhle uvuthe umsindo wakhe.

Hayi, uyolo lwabo bonke abazímela ngaye!