IINDUMISO 3

₁Yehova, hayi, ukuba baninzi kwabandibandezelayo!

Baninzi abasukela phezulu kum.

₂Baninzi abathi kumphefumlo wam,

Akunalusindiso kuThixo. (Phakamisani.)

₃Ke wena, Yehova, uyingweletshetshe kum,

Uluzuko lwam, umphakamisi wentloko yam.

₄Ndidanduluka kuYehova ngezwi lam,

Andiphendule entabeni yakhe engcwele. (Phakamisani.)

₅Ndalala phantsi, ndalala ubuthongo;

Ndavuka, ngokuba uYehova endixhasa.

₆Andizoyiki izigidi zabantu

Abakhe uluhlu lokulwa ngeenxa zonke kum.

₇Khawusuk' ume, Yehova; ndísindise, Thixo wam;

Ngokuba ùzibetha zonke iintshaba zam emhlathini;

Amazinyo abangendawo ùyawaphula.

₈Usindiso lolukaYehova:

Mayibe phezu kwabantu bakho intsikelelo yakho. (Phakamisani.)