IINDUMISO 38

₁Yehova, musa ukundohlwaya únoburhalarhume,

Ungandithethisi únobushushu:

₂Ngokuba iintolo zakho zitshoné kum,

Sehla kanzima kum isandla sakho.

₃Akukho ndawo iphilileyo enyameni yam, ngenxa yokubhavuma kwakho;

Akukho kuphila emathanjeni am, ngenxa yezono zam.

₄Ngokuba ubugwenxa bam bugqithile entlokweni yam,

Bundisinda njengomthwalo onzima.

₅Iyanuka, iyabhiqiza imivumbo yam,

Ngenxa yokumatha kwam.

₆Ndiyapenapena, ndisibekeke kakhulu;

Yonke imini ndihamba-hamba ngezimnyama zokuzila.

₇Ngokuba kuyatshisa emihlubulweni yam,

Akukho ndawo iphilileyo enyameni yam.

₈Ndiqobekile, ndityumkile kakhulu;

Ndibhongiswa kukugcuma kwentliziyo yam.

₉Nkosi yam, úphambi kwakho wonke umnqweno wam,

Nokuncwina kwam akusithele kuwe.

₁₀Iphaphu lam liyabetha, ndiphelélwe ngamandla;

Ukukhanya kwamehlo am, nako oko, akukho kum.

₁₁Abandithandayo nowethu bamele mgama ekubethweni kwam,

Nezalamane zam zimi kude.

₁₂Bandithiyele abafuna umphefumlo wam;

Abangxamele ukuba ndihlelwe bububi bathetha izinto zokweyelisela,

Bacamanga inkohliso imini yonke.

₁₃Ke mna ndinjengesithulu, andiva;

Njengesidenge esingawuvuliyo umlomo waso.

₁₄Ndinjengomntu ongeva nto,

Omlomo ungenakuthethisa.

₁₅Ngokuba ndilindéle kuwe, Yehova;

Kuya kuphendula wena, Nkosi yam, Thixo wam,

₁₆Ngokuba ndithi, Hleze bandivuyelele

Bona abo bangázikhulisayo kum ekutyibilikeni konyawo lwam.

₁₇Ngokuba ndihlalele ukujingxela,

Umvandedwa wam uphambi kwam amaxesha onke.

₁₈Ngokuba ndiya kubuxela ubugwenxa bam;

Ndinesithukuthezi ngenxa yesono sam.

₁₉Ke zona iintshaba zam ziphilile, ziziimfidi;

Baninzi abandithiyileyo bexoka;

₂₀Abandibuyekeza ngobubi esikhundleni sokulungileyo

Bayandichasa, ngenxa yokuphuthuma kwam okulungileyo.

₂₁Musa ukundishiya, Yehova;

Thixo wam, musa ukuba kude nam.

₂₂Khawuleza undincede,

Nkosi yam, Msindisi wam.