USirakhi 29

₁Bonke abanesihawu bayababoleka omakhelwane babo; ngokwenza njalo, bagcina imiyalo. ₂Mboleke umakhelwano wakho ngesikhathi sokudinga kwakhe; mkhokhele lapho sekufanele umkhokhele. ₃Gcina isethembiso sakho wethembeke kuye, uyothola okudingayo ngaso sonke isikhathi. ₄Abaningi bayithatha imali yokwebolekwa njengenhlanhla ewele esandleni, bese behlukumeza labo ababasizileyo. ₅Omunye uze agaqe phansi, aqabule ngisho izandla zikamakhelwane ukuze abolekwe, futhi akhulume ngenhlonipho lapho esafuna ukubolekwa, kodwa lapho sekufike isikhathi sokuyikhokha bese ehudula izinyawo, ayikhokhe ngokwenza izethembiso ezingasho lutho, bese engagculiseki ngesikhathi asinqunyelwayo. ₆Uma enokumkhokhela amkweletayo, woba unenhlanhla uma ethole uhafu wemali yakhe, uyakukubona lokho njengenhlanhla. Uma engakwazi ukukhokha, obolekiwe uqola omunye ngemali yakhe, bese emenza isitha sakhe ngokungadingekile, useyokumkhokhela ngezinhlamba nangokumjivaza, esikhundleni sokuba amkhokhele ngokuthokoza, akwenze lokho ngokweyisa. ₇Abaningi abafuni ukubolekisa hhayi, ngoba bengamaqonqela, kodwa ngenxa yokwesaba ukuqolwa kungafanele.

₈Noma kunjalo, mbekezelele osesimeni esibucayi, kodwa ungamenzi ahlale elindele iminikelo yakho. ₉Basizeni abampofu ngenxa nje yemiyalo, ningababuyiseli emuva bengaphethe lutho esandleni esikhathini sokweswela kwabo. ₁₀Lahlekelwa isiliva lakho ngenxa yomfowenu noma umngani, ungayivumeli ingcebo yakho igqwale phansi kwetshe noma ilahleke. ₁₁Igcine ingcebo yakho njengokuyaliwe nguSomandla, iyakukuzuzela ukwedlula igolide. ₁₂Gcina iminikelo enqolobaneni yakho, iyakukuhlenga ngesikhathi sobunzima; ₁₃ingcono kunesihlangu nomkhonto oqinileyo, futhi iyokukulwela nesitha sakho.

₁₄Umuntu olungileyo uyisiqiniseko kumakhelwana wakhe, kodwa lowo ofelwe unembeza uyomdicilela phansi. ₁₅Ungaze wakhohlwa umusa walowo okumele ezikweletini, ngokuba unikele impilo yakhe ngenxa yakho. ₁₆Isoni sihlaphaza impahla yalowo osimelele ezikweletini, ₁₇kuthi nomuntu ongakwazi ukubonga alahle umhlengi wakhe. ₁₈Ukuma njengesiqiniseko kulimaze abaningi ababemi kahle, futhi kubajikijela ngapha nangapha okwamadlambi olwandle; kuxoshele abebenamandla ekudingisweni, baba yimihambima phakathi kwezizwe. ₁₉Isoni sizilethela usizi ngokwamukela ukumela omunye ezikweletini; ukuxosha kwaso ingcebo kusihudulele emacaleni amaningi. ₂₀Msize umakhelwano wakho ngokusemandleni akho, kodwa qaphela ungawi nawe.

₂₁Izidingo zempilo ngamanzi, isinkwa, izingubo zokugqoka, kanye nendlu yokuhlala. ₂₂Ingcono impilo yompofu kodwa abe ephansi kophahla lwakhe kunokudla okumnandi emzini wabantu. ₂₃Yeneliswa ngokuncane noma ngokuningi, futhi awunakuthola nkonondo ngokuba yisivakashi. ₂₄Kuyimpilo embi nenyanyisayo ukuthunga imizi yabantu; uma uyisivakashi ungaze wawuvula umlomo wakho nhlobo; ₂₅ungazenzi umninindlu ube ungesiye, bese upha abantu okuphuzwayo kodwa ungaze wabongwa muntu, kunalokhu, uyozwa amazwi azinsunsu afana nalana: ₂₆“Woza lapha, mfokazi, lungisa itafula; ake ngidle lokho okuphethe.”

₂₇“Hamba manje mfokazi, ngoba sekufike isimenywa esihloniphekile; umfowethu usefikile ukuzongivakashela, futhi ngidinga indlu yezihambi.”

₂₈Kulukhuni kumuntu onozwela ukuthwala ukuthethiselwa indawo yokuhlala kanye nokuthukwa ngokuboleka imali.