USirakhi 30

₁Lowo oyithandayo indodana yakhe wohlala eyishaya njalo, ukuze abe nokujabula esebona indlela ekhule yaba yiyo. ₂Lowo oyiqeqeshayo indodana yakhe wofumana inzuzo, uyakuzigqaja ngayo ezihlotsheni. ₃Oyifundisayo indodana yakhe wokwenza izitha zakhe zibe nomhawu, futhi uyothola ukuphakanyiswa phakathi kwabangani bakhe. ₄Lapho uyise esefile kuyoba sengathi usaphila, ngokuba ushiye ngemuva lowo ofuze yena, ₅lowo ambuka esaphila ngentokozo, kwaze kwathi nasekufeni, akaba nalusizi. ₆Ushiye ngemuva umphindiseli wakhe ezitheni zakhe, nalowo oyobuyisela isihe sakhe kubangani bakhe.

₇Lowo ototosa indodana yakhe uyozibopha amanxeba, futhi wobulawa ngubuhlungu benhliziyo njalo njalo. ₈Ihhashi elingaqeqeshwanga liba nenkani enkulu, injalo nendodana engazange inakwe iqeqeshwe iba nekhanda elilukhuni. ₉Totosa ingane, iyokuhlukumeza kakhulu; dlala nayo, iyokugcwalisa ngosizi. ₁₀Ungahleki nayo, funa ube nosizi kanye nayo, bese kuthi ekugcineni ugedle amazinyo. ₁₁Ungayiniki inkululeko ebusheni bayo, futhi ungathalalisi emaphutheni ayo. ₁₂Thobisa intamo yayo ebusheni bayo, ushaye izinhlangothi zayo isencane, uma ungenzi njalo, izakuba nenkani futhi ingakuhloniphi, uyakuba nosizi enhliziyweni ngenxa yayo. ₁₃Iqeqeshe indodana yakho wenze ijoka layo lisinde, ukuze ungathunazwa ukungabi namahloni kwayo.

₁₄Ingcono kakhulu indoda empofu, iphila futhi iqinile emzimbeni kunokuba icebe kodwa ingabi nampilo. ₁₅Impilo nokuqina komzimba kungcono kunegolide, nomzimba ophapheme kunengcebo eningi. ₁₆Akukho ngcebo engcono kunomzimba ophilile, nanjabulo edlula ukuthokoza kwenhliziyo. ₁₇Ukufa kungcono kunempilo yobuhlungu, nokulala kwaphakade kunesifo esingelapheki.

₁₈Izinto ezinhle uma zithelwa emlonyeni ovalekile zifana nomnikelo wokudla obekwe engcwabeni. ₁₉Unalusizo luni umnikelo esithixweni? Ngoba asikwazi ukudla ngisho nakunuka imbala. Unjalo nojeziswe nguSimakade; ₂₀uyabona ngamehlo akhe futhi abubulise okomthenwa lapho egone intombi, unjalo nomuntu owenza okuhle ngempoqo.

₂₁Ungazinikeli osizini, futhi ungazidaleli inkathazo ngamabomu. ₂₂Inhliziyo ethokozile ingukuphila uqobo, futhi ukuthokoza kuyazelula izinsuku zokuphila komuntu. ₂₃Phila ngokuthokoza, ume isibindi, susa kuwe lonke usizi, ngokuba usizi lubhubhise abaningi, futhi akukho mpumelelo kulo. ₂₄Umona nolaka kuyayifinyeza impilo, ukuhlala ngokukhathazeka kusheshe kumgugise umuntu. ₂₅Labo abagcwele ukuthokoza bejabula nasetafuleni labo, bayothola inzuzo ekudleni kwabo.